Bulu ya Balau Enologa

Vanovira ottamagela vyaka 40 Aizrayel bali mwiddeddereni. Awene atolotxa sidadi dhinjene dholiba. Nomala ahifiya vakuvi na elabo ya Mowab amaga misasa nikome na Mwinje Jordau, ajedhelaga ovolowa Mwilaboni Yalibeleli Mulugu. Mwene w’o Mowab Balak wahiroma wova wila onele oyelela sidadi yaye. Nona iyene omuwoba mulobwana wakuweliwa Balau wi adhowe o Mowab anyengette akadda Izrayel.

Yehova omwaddela Balau dhahi: ‘Onatagihe wanyengetta akadda Izrayel.’ N’eji, Balau ohikodda odhowa wanyengetta. Mwene Balak omuwoba dila yanawili, vina ohilibela onvaha elobo-elobovi egafuniliye. Balau ohikoddavi. Mmalelani Mulugu omwaddela: ‘Kadhowa, ogafiya waloge bahi dhinauwaddele miyo.’

Balau omusasanyedha bulu waye wi adhowe o Mowab. Iyene ohilibela wanyengetta Aizrayel masiki valogile Yehova wila kakose. Mungelo wa Yehova omutwanyuwela dila ttaru. Balau kawodha omona mungeloya, wawodha omona wali bulu waye bahi. Voroma, bulu mmoneliye mungelo, wile orabela dilaya badhowa mwini. Dila yanawili bulu ehirabela bigudula mwarha, mwarhaya buporeya mweddo wa fumu Balau. Dila yomariha, bulu ehikokora vari va dila. Dila esi dhottaru fumu Balau wela ovada bulu na mutogonyo waniye.

Dila eji yanouraru Yehova ohikosiha wi bulu eloge. Bulu ehinvuza Balau: ‘Ngani fumu, apa munddivadela eni dhahene?’ Balau ohakula: ‘Weyo onddona ninga ddataduwa. Miyo kokana supadda ddigahupa.’ Bulu ehakula: ‘Nyuwo muhiddiwela vyaka dhinjidhene. Koddi ddahiromaga owirelani esene?’

Venevo Yehova ohimoniha Balau mungeloya. Mungelo omvuza: ‘Weyo Balau Yehova kowaddeli wi kudhowe wanyengetta aIzrayel?’ Balau ohakula: ‘Kaddileveleleni. Ddinowiyela.’ Mungelo omwakula: ‘Kadhowa o Mowab, ogafiya waloge bahi dhinuwaddela Nabuya.’

Balau ohisunzavo elobo? Nne. Mmaleliye Balau wahifuna wanyengetta aIzrayel dila ttaru, mwa diladha eso, Yehova wela omushagiha Balau wi aarelihe aIzrayel ottiya wanyengetta. Omamalelowa, aIzrayel amugurumusula Mowab, ahimpa Balau. Koddi Balau komwiwelela Yehova dila yoroma, kagakalilewo?