NIPADDUWO 100
Yezu Mmunddani
MUMALELANI obudduwa mu kambirhinya ya mudhulu, Yezu na arumiwi aye ahidhowa mmunddani mwa Jetsemani. Awene anda veneva dila dhinjidhene. Ovanene Yezu ohapanga wila akale mento vina alobelege. Mumaleliye ohisusavo vañgonovi, nanda ohiworomela vati wila alobele.
Vasogorhova Yezu ohiyelela apale vali arumiwi aye. Weyo onoona ninga awene ankosa eni? Awene anogona! Yezu ohapanga dila tharu wila awene anofanyeela okala mento, mbwenye kadda dila eniyeliye onafanya bagagona. Dila yomariha yiyeliye Yezu ohiloga dhahi: ‘Munwodha dhavi ogona mudhidhi ninga obu?’ Mudhidhiya ohifiya wa miyo operhekiwa mmadani mwa amwiddani aga.’
Mudhidhene obule ohiweya onyagula wa muthithi munddimuwa. Kañgana! Alobwana anodha na masupadda vina miri! Nanda awene ahithukula sakarhi wila dhamoneyege. Mufiyelani vakukuvi, muthu mwina ohibudduwa mmuthithinimwa nanda ohimunyaalela Yezu. Iyene ohimusosona, ninga munooneliwe apa. Mulobwana oddu ddi Yuda Iskarioti! Onimusosonela eni Yezu?
Yezu ohinvuza dhahi: ‘Yuda, weyo onoddiguliha na musosono?’ Indde, musosono obu ezinddiyelo. Eji enowaziwiha alobwana ali na Yuda wila oddu ddi Yezu, mulobwana oddwene oninfunani. Noona amwiddani a Yezu ahisusela osogorho wila amuthidde. Mbwenye Peduru kanaathiye awene omuthukula Yezu s’ohiwanavo. Iyene ohivuula supadda nadhiliyena nanda ohimututuka mulobwana wamwaddamelile. Supaddana nihivonya musorho wa mulobwana oddule nanda banigwadda niyaru naye na mpaddi wa mono woja. Mbwenye Yezu ohiddiginya niyaru na mulobwana oddule nanda ohivulumutxa niyaruna.
Yezu ohimpanga Peduru: ‘Keyihedha supadda nawo mpule mwalani. Kunziwa yawila miyo podi omukumbirha Babi waga wila aarume angelo matxikwi na matxikwi wila addivune?’ Indde, iyene podi okosa ejene! Mbwenye Yezu kamukumbirhile Mulugu wila aarume angelo, sabwani iyene ohiziwa wila mudhidhiya ohifiya wila amwiddani aye amuthukule. Noona iyene ohathiya awene omuthukula. Ndoweni noone txini empadduweli Yezu ovanene.
Mateus 26:36-56; Lukas 22:39-53; Joau 18:1-12.