NIPADDUWO 111
Mwanamulobwana Wagonile
O! O! EMPADDUWA apa txini? Mwanamulobwana oddu oginantile vati ohivoreyeya vaddiddi? Kañgana! Mmodha mwa alobwana aba ambudduwa mu numba ddi Paulo! Weyo onomoona vina Timoteo venevale? Mwanamulobwana oddu ogwile va janelani?
Indde, ji ejene wene yapadduwile. Paulo wela wakosela diskursu anamasunza a apano va Troade. Iyene wahiziwa yawila kagawoonile viina mwari mwa mudhidhi mwinjene sabwani mmangwananimwa iyene wahifanyeela odhowa na sikarera. Noona iyene wela okosavi diskursu mpaka vari va mathiyu.
Dhaene, mwanamulobwana oddu ontxemerhiwa Eutiko wagilatile va janelani, nanda bagonelavo. Iyene wahifuthukuwela okothi, nanda bagwa ovenyedha va janelani, ovenya numba yanoraru ya mudhulu mpaka vati! Noona weyo podi woona sabwa enribela murima vaddiddi athu aba. Alobwana aba munvenyihedhani mwanamulobwanaya, ji ejene yovani txibarene. Iyene ohikwa!
Paulo mooneliye wila mwanamulobwanaya ohikwa, iyene ohimuginantela vina ohimukumbatha. Mumaleliye ohiloga dhahi: ‘Kamuribe murima. Iyene mugumi!’ Nanda mugumi wene! Nthi ntikiniho! Paulo wahimwiyihedha okalawo! Ohagalala wahimwadheyela muthithi wotene wa athu.
Awene otene ahiwela o numba ya mudhulu nanda ahija. Paulo ohikosavi diskursu mpaka vati oya. Mbwenye weyo podi okaana ebaribari yawila Eutiko kadhowile ogona viina! Mumaleliye Paulo, Timoteo na abale ankosa oleddo na awene ahiwela sikarera. Weyo onoziwa wego ondowani?
Paulo onogomiha wene oleddo waye wanoraru wa olaleya, nanda oli mu oleddoni waye wowiyelela mmudhi. Mu oleddoni obu Paulo wahikala vyaka tharu mu sidadi ya Efeso bahi. Noona obu oleddo wolapa vaddiddi opitha wanawili.
Muvenyelani va Troade, sikareraya ehiimela va Mileto mudhidhi muñgonovi. Vowila Efeso oli makilometuru mañgonovi a oleddo, Paulo ohatxemerhiha anddimuwa a mulogo wila adhe va Mileto wila iyene aloge na awene dila yomariha. Mumalelani, mufiyeli mudhidhi wa sikarera ovenya, awene ahikubanya vaddiddi sabwa ya omoona Paulo bagadhowa!
Omamalelowa sikareraya ehiyelela o Sezarea. Paulo bali veneva vatakulu va namasunza Filipi, namavuhula Agabo ohimulaga Paulo. Iyene ohiloga wila Paulo agadha o Yeruzalemi onela ofugeliwa. Nanda mwa ebaribari, ji ejene empadduwa. Venevo, mumaleliye okala mu kambura mwari mwa vyaka biili o Sezarea, Paulo ohirumiwa o Roma wila athongiwe na Sezari mulamuleli wa Roma. Ndoweni noone txini epadduwile mu oleddoni wa odhowa o Roma.
Merelo makapitulu 19 mpaka 26.