NIPADDUWO 110

Timoteo—Mukamihedhi Muswa Wa Paulo

MUZOMBWE oddu onimooniwe apa na murumiwi Paulo ddi Timoteo. Timoteo onkala na murala waye mu Listra. Mai waye ontxemerhiwa Eunise nanda bibi waye ddi Loide.

Eji ji dila yanoraru edhile Paulo o Listra. Othamagela yaka modha mundduni, Paulo na Barnabe aahidha veneva dila yoroma mu oleddoni wawa wa olaleya. Nanda ovanene Paulo ohiyela wili na marho waye Sila.

Weyo onoziwa txini enloga Paulo na Timoteo? Iyene ononvuza dhahi: ‘Ogahiziveliwa weedda na Sila vina na miyo? Iyo nigahilabihedha nikamihedho nawo wila naalaleye athu a mimburo dha wolapela.’

Timoteo ohakula wila: ‘Indde, ddigahiziveliwa odhowa.’ Noona mohigoneela mumaleliye Timoteo ohithiya murala waye nanda ohidhowa na Paulo vina Sila. Mbwenye nihinathi osunza mwaha wa oleddo wawa, ndoweni niziwe txini empadduweli Paulo. Dhihivira othamagela vyaka 17 ovenya mudhidhi wamuthwanyuweli Yezu mu dila ya odhowa o Damasku.

Kobuwela, Paulo wahidha o Damasku wila aavoreye anamasunza a Yezu, mbwenye ovanene iyenene namasunza! Vasogorhova amwiddani ena anolaganela ompa Paulo sabwani awene kanziveliwa osunziha waye mwaha wa Yezu. Mbwenye anamasunza ahimukamiha Paulo othawa. Awene ahimwika mmuddangani nanda ahimutitihedha otakulu wa rhinga ya sidadi.

Mumalelani Paulo ohidhowa olaleya o Antiokia. Pa veneva varomile otxemerhiwa anamafara a Yezu wila Akristu. Mumalelani Paulo na Barnabe ahirumiwa ovenya mu Antiokia odhowa olaleya mu oleddoni wa dhilabo dha wolapela. Modha mwa sidadi dhifiyilani ji Listra, Timoteo owaniwaye.

Ovanene, othamagela yaka modha vasogorho, Paulo ohiyelela o Listra mu oleddoni wanawili. Timoteo muvenyeliye na Paulo vina Sila, weyo onoziwa wego odhowilani? Kañgana mapa, vina ndoweni nisunze mimburodha dhiina.

Voroma awene adhowile o Ikonio waddamelile, mumalelani ahidhowa o sidadi yanawili entxemerhiwa Antiokia. Mumalelani awene ahikosa oleddo mpaka o Troade, mumalelani ahidhowa o Filipi, Tesalonika vina Berea. Weyo onomoona Atena va mapani? Paulo ohilaleya wenewale. Mumalelani awene ahilabihedha yaka na jiddiga bagalaleya o Korinto. Omagomelowa awene ahiimela vañgonovi va Efeso. Mumalelani awene ahiyelela o Sezarea na sikarera, nanda ahikosa oleddo mpaka o Antiokia, wenewale ohalile Paulo.

Noona Timoteo ohikosa oleddo wa mazana na mazana a makilometuru, bagamukamiha Paulo olaleya “bili yaderetu” vina wita milogo dhinjidhene dha Okristu. Weyo ogonuwa, onela okala mudhari wororomeleya wa Mulugu ninga Timoteo?

Merelo 9:19-30; 11:19-26; makapitulu 13 mpaka 17; 18:1-22.

Mavuzo a Nsunzo

[Mapa]

(Wi woone Mowakwana, kang’ana manivuru)

Roma

Malta

Tesalonika

Berea

Korinto

Filipi

Atena

Kreta

Troade

Efeso

Mileto

Kolosi

Antiokia

Ikonio

Listra

Antiokia

Sipro

Damasku

Sezarea

Jope

Yeruzalemi

NYAZA ENDDIMUWA (MEDITERANEO)