Anamona a Yehova Anrumela Eni?

‘Ninofuna wiwa na mulomo wawo esile dhinroromeliwe, vowila nihiziwa deretu wila dhipaddi dhotene saka ya akristu enovanyiwa.’ (Merelo 28:22) Asogorheli aba a nlogo na o Roma a vyaka zana dhoroma ahivaha yotagiha yaderetu. Awene afuna ewe kakamwe na anyaya, othiya wawiwavi anamapambiha a otakulu.

Mwakakene, ovanene apa dila dhinjidhene Anamona a Yehova anologiwa mwabure, nanda egahikala onyengetheya ojedhela oziwa ebaribari mwaha wa awene modhela athu ana nsakulano. Dhaene, nihiziveliwa wutapulelamo masunziho mañgonovi a makamaka anrumelihu.

Bibilia, Yezu Kristu na Mulugu

Ninorumela wila, “Malebo otene avudheleliwe na Mulugu nanda bopureyamo”. (2 Timoteo 3:16) Nanda, masiki athu ena valogilani wila iyo kanili akristu, eji kayo ebaribari. Ninovaha onamona wakakene wa murumiwi Peduru modhela Yezu Kristu: “Mutxiddo mwa odhulu kamuli muthu mwina, operhengezeliwe athu, wila niwodhe ovulumutxiwa.”—Merelo 4:12.

Mwa dhaene, vowila Yezu ohiloga wila iyene ddi “Mwana wa Mulugu” vina wila ‘oddirumile miyo ddi Babaga’, Anamona a Yehova anorumela wila Mulugu ddi munddimuwa opitha Yezu. (Joau 10:36; 6:57) Yezu mwinyene wahiziwa wila: “Baba ddi munddimuwa opitha miyo.” (Joau 14:28; 8:28) Dhaene, iyo kaninrumela wila Yezu onoligana na Babaye, ninga munsunzihedha nsunziho na Oraru. Othiya eji, ninorumela wila iyene othanddiwe na Mulugu nanda onimwiwelela Iyene.—Kolosi 1:15; 1 Korinto 11:3.

Mu elogelo ya Etxuabo, nzina na Mulugu ddi Yehova. Bibilia onloga dhahi: “Nyuwo, mokinyu nzina nenyu ddi YEHOVA, nyuwo muli Mudhuludhulu wa elabo ya vati.” (Salmo 83:18, Almeida, edição revista e corrigida) Mowiwanana na mazu aba, Yezu wahika vadhulu vaddiddi nzina na Mulugu, asunzihaga anamafara aye olobela dhahi: “Baba wehu muli odhulu, nzina nenyu nikoddelihiwe.” Nanda iyenene wahilobela wa Mulugu: “Ddihoniha nzina nenyu vari va athu addivahile nyuwo.”—Mateus 6:9; Joau 17:6.

Anamona a Yehova anorumela wila awene anofanyela omutagiha Yezu mwa walaleyela athu nzina na dhifunelo dha Mulugu. Nona, nihithukula nzina na Anamona a Yehova sabwani ninimutagiha Yezu, “Namona Wororomeleya”. (Ovuhulela 1:5; 3:14) Mofanyelela, nlebo na Izaia 43:10 ninloga dhahi naddagana nlogo ninimwimelela Mulugu: “‘Nyuwo muli anamona aga’, ji yologa ya Yehova, ‘indde, mudhari waga omusakulile miyo’.”

Omwene wa Mulugu

Yezu wahasunziha anamafara aye olobela dhahi: “Omwene wenyu odhe”, nanda iyene wahikosa Omwene obu ninga musorho munddimuwa wa osunziha waye. (Mateus 6:10; Lukas 4:43) Anamona a Yehova anorumela wila Omwene wa Mulugu thi nlamulelo natxibarene nina kathi odhulu, ninalamulele elabo ya vati, nanda wila Yezu Kristu ddi Mwene wohoneya othomeliwe Omwene obu. “Omwene oli vadhithurini dhaye”, onloga ddi Bibilia. “Na winjiva wa olamulela wa omwene vina murenddele kunagome.”—Izaia 9:6, 7, Al.

Mwa dhaene, Yezu Kristu kanakale yeka ninga mwene wa nlamulelo na Mulugu. Iyene onela okana alamuleli akwaye odhulu. “Nigavilela na ntidi”, ohileba murumiwi Paulo, “ninela olamulela vina na iyene”. (2 Timoteo 2:12) Bibilia onolagiha wila muthengo wa athu anvenyihiwa mukwani wila alamulele odhulu na Kristu ninga amwene bwa “matxikwi zana na makumi manai na manai abene aguliwe velaboni ya vati”.—Ovuhulela 14:1, 3.

Ninga munkalelagani, malamulelo otene anofanyela okana alamuleliwi, nanda Anamona a Yehova anorumela wila, alamuleli aba a odhulu balivi, mabiliau a athu ena anela okana egumi ya mukalakala. Omagomelowa, elabo ya vati, bili paraizu yokoddela, enela odhala kakamwe na alamuleliwi aba ofanyela a Omwene wa Mulugu, otene bagewelela olamulela wa Kristu na alamuleli akwaye. Dhaene, Anamona a Yehova anororomela moliba vaddiddi wila elabo ya vati txipo kinda etolotxiwaga, vina wila olibela wa Bibilia onela osoriheya: “Aligani anela okana elabo ya vati nanda anela okalamo na mukalakala.”—Salmo 37:29; 104:5.

Ngani, Omwene wa Mulugu onadhe dhavi? Modhela athu otene wiwelela woviperekela nlamulelo na Mulugu? Othiya eji, Bibilia onolagiha mwatxibarene wila odha wa Omwene wa Mulugu onela ofuna wila Mulugu atanale dhilobo dha elabo ya vati: “Mulugu wa odhulu onela wimetxa omwene ohinatolotxiwe. Nanda omwene obu . . . onela watototxa vina onela ogomiha mamwene aba otene, nanda iyene onela wimela na mudhidhi wohimala.”—Danieli 2:44.

Omwene wa Mulugu onadhe mudhidhi gani? Modhela mavuhulo a Bibilia ansoriheya ovanene, Anamona a Yehova anorumela wila Omwene obu onadhe ovanene apa. Ninowuwobela opepesa mavuhulo mañgonovi abene anloga esile dhimpadduwa mwari mwa “masiku omariha” a mukalelo obu wa dhilobo. Mavuhulo aba alebiwe va Mateus 24:3-14; Lukas 21:7-13, 25-31 na 2 Timoteo 3:1-5.

Vowila iyo ‘ninomukwela Yehova, Mulugu wehu, na murima wehu wotene vina egumi yehu yotene, omuthu na guru, vina ninomukwela muthu mukwehu ninga iyo nanyene’, mbwenye kanigaweyile mmukaleloni wa elabo, nlogo obe ethomo. (Markos 12:30, 31) Ninozinddiyeliwa mwilaboni motene sabwa ya okwelana okwene ononeya vari va abali ehu a okristu, abene anfanyeya mmalogoni otene. (Joau 13:35; 1 Joau 3:10-12) Dhaene, ninokanavi mburo wohikosa mpaddi modhela dhilobo dha politika dha malogo aba. Ninotamela okala ninga anamasunza oroma a Yezu, abene alogeliye dhahi: “Awene kankosa mpaddi wa elabo, ninga munkoddelimi okosa mpaddi wa elabo.” (Joau 17:16) Ninorumela wila okalavi mosuguleya na elabo ontapulela orabela mweddelo wonyakuwa obwene wakwaneliwetxe ovanene, vamodha na othambi, wiya, ojeberuwa, oraruwa, na ogonihana alobwanavi, olabihedha wabure wa nikami, wawebedha amilugu osemiwa na dhilobo dhina, dhimalile okoniwa mBibiliani.—1 Korinto 6:9-11; Efeso 5:3-5; Merelo 15:28, 29.

Njedhelo na Musogorho

Anamona a Yehova anorumela wila egumi yehu ya ovanene apa mwilaboni mpu kayo elobo yotene eliwo. Ninorumela wila Yehova ohimuruma Kristu velaboni ya vati wila akuthule nikami naye na egumi ninga yobolo, wila athu awodhe oligana vamentoni va Mulugu vina akele egumi ya mukalakala mmukaleloni muswa wa dhilobo. Ninga mulogeli murumiwi dhahi wa Yezu: “Ovanene ninoliganihiwa na nikami naye.” (Roma 5:9; Mateus 20:28) Anamona a Yehova anomutamalela Mulugu vaddiddi vina Mwanaye sabwa ya mvaho obu wa yobolo ejene enkaniha njedhelo na egumi musogorho.

Anamona a Yehova ahikana nikuluvelo nddimuwa na okana egumi musogorho, yodhela ovenya mukwani musogorho, mutxiddo mwa Omwene wa Mulugu. Ninorumela, ninga munsunzihedha Bibilia, wila muthu agakwa, okalawo waye txibarene ongoma venevale, wila “labonene ntho txibarene dhubuwelo dhaye dhinogoma”. (Salmo 146:3, 4; Ezekieli 18:4; Eklesiaste 9:5) Indde, egumi ya musogorho ya abale akwile eli na Mulugu wawubuwela omavenyelo wa mukwani.—Joau 5:28, 29.

Mpaddi mwina, Anamona a Yehova anororomela vaddiddi wila athu enjene ankalawo ovanene apa anela oviluwa Omwene wa Mulugu ogatolotxa malamulelo a ovanene vina, ninga Noe na mudhi waye mwaviluwelani Vampuloni, awene anela okalawo wila ajevo egumi ya mukalakala mwilaboni ya vati yotxithikiwa. (Mateus 24:36-39; 2 Peduru 3:5-7, 13) Mbwenye, ninorumela wila oviluwa oli mwa muthu osoriha magano a Yehova, ninga munlogela Bibilia: “Elabo enovira . . . mbwenye oddule onkosa efunelo ya Mulugu onela okalawo na mukalakala.”—1 Joau 2:17; Salmo 37:11; Ovuhulela 7:9, 13-15; 21:1-5.

Mowoneyamwene, kili yowodheya ogumanyedha apa dhotene dhinrumela Anamona a Yehova, mbwenye ninowutxemerha wila okane miselu dhina.

Ogaikale ntonyedho ninagu, mengeselo ali apa athukuliwe mBibiliani mwa Tradução do Novo Mundo das Escrituras Sagradas—Com Referências.

[Mutoma wa nikuku 4]

Iyo nihithukula nzina na Anamona a Yehova sabwani ninimutagiha Yezu.