Bani Txibarene Onlamulela Elabo?

Athu enjene agakulile nivuzo nthi nili vadhulu na nzu nimodha bahi—Mulugu. Mbwenye ja ntapulelo wila kuli epaddi enloga Bibilia wila Yezu Kristu obe Babaye bali alamuleli a ebaribari a elabo eji. Mothiyana, Yezu ohiloga dhahi: “Mulamuleli wa elabo eji onela ovokedhiwa otakulu.” Nanda ohenjedhedha: “Mulamuleli wa elabo onodha. Nanda iyene kana guru vadhulu va miyo.”—Joau 12:31; 14:30; 16:11.

Dhaene, mulamuleli wa elabo eji oli momusadduwela Yezu. Mulamuleli oddu bani?

Makalelo a Elabo Anovaha Monihedho

Masiki na guru dha athu a murima waderetu, elabo enotabuwaga vaddiddi mwari mwa wedda wa mapadduwo. Eji enowakosiha athu a ntanalelo ovuza, dhaene ninga mwavuzeli marafula David Lawrence oddwene wali namaleba: “‘Murenddele Velaboni ya vati’—athu otene anfuna ejene. ‘Osanzaya na athu otene’—malogo otene a elabo anokana mubuwelo obu muthu na mukwaye. Kito, yabureya jivi? Onkoseliwani koddo masiki na dhifunelo dhobaliwana dha malogo?”

Ninga vahikala mavirigano, kayo mwenemo? Oku ofuna wa athu ogali okalawo na mukalakala na murenddele, dila dhinjidhene awene anowiddana nanda anopanana muthu na mukwaye—nanda na otabala vaddiddi! Kona dhopanga dhothabwetxa dhikoseliwe athu amentwene. Athu anolabihedhaga, witxi wopa, mburo wa atxedhiwi, magalume a motho woponyiwa, bomba dha motho, na marhe mena otabala wila asothothe vina apanane muthu na mukwaye s’ohikana supaje.

Weyo onorumela wila athu, abene anfuna murenddele na osanzaya, bowodha, woka, wakosela athu ena dhilobo dhotabala? Guru gani dhinalibiha athu aba okosa merelo aba otakala, athukulelaga okana mikalelo dhinalibihedha okosa dhotabala? Wahiromaga ovivuza akala ohikala guru yotakala, yohoneya, ejene enapakela athu wila akose merelo aba a otimbwini?

Alamuleli a Elabo Eji Ahizinddiyeliwa

Kili yofuneya waganyedha, sabwani Bibilia onolagiha mowoneya wila ohikala muthu woshaga, wohoneya, onawañganela athu ninga vina malogo. Onloga dhahi: “Elabo yotene eli mmadani mwa wabure.” Nanda Bibilia onomuzinddiyela, bagaloga dhahi: “Oddule ontxemerhiwa Ddiabo vina Satana . . . onapupurutxa athu a elabo yotene ya vati enkaliwa.”—1 Joau 5:19; Ovuhulela 12:9.

Mudhidhi dhahi, Yezu “baganyengethiwa na Ddiabo”, iyene kavanyile mabasa a Satana ninga mulamuleli wa elabo eji. Bibilia onotapulela ejile epadduwile venevale: “Ddiabo wahimuthukulela vamwangoni wolapa vaddiddi, nanda ohimutonyihedha mamwene a elabo yotene na ofumawa, nanda ohimpanga dhahi: ‘Dhilobo esi dhotene miyo ddinela wuvaha, ogaddikokorela nanda ogaddebedha miyo.’ Venevale Yezu ohimpanga dhahi: ‘Suka, Satana!’”—Mateus 4:1, 8-10.

Katanalela eji. Satana ohimunyengetha Yezu na onvaha “mamwene a elabo yotene”. Ngani, nvaho obu wa Satana ogahikala munyengetho webaribari kowiliwa iyene kali txibarene mulamuleli wa mamwene abale? Ne, obu kugakalile. Nanda kona wila Yezu kakoddile wila mamwene abale otene a elabo ba Satana, ejene egakosiliye kowiliwa Satana txibarene kalamulela mamwene abale. Dhaene, Satana, Ddiabo, ddi mulamuleli wohoneya wa elabo! Mwa txibarene, Bibilia onimuromola iyene ninga “mulugu wa mikalelo esi dha dhilobo”. (2 Korinto 4:4) Kito, muthu wotabala ninga oddu owodhile dhavi owanyedha mpaddo wothukuwa?

Oddule odhile okala Satana wali mungelo othanddiwe na Mulugu, mbwenye ohiroma osilila mpaddo wa Mulugu. Iyene ohivanela ofanyelela wa Mulugu olamulela. Wila akose eji iyene ohilabihedha nowa ninga mulogi wila amunyengethe muyana woroma, Eva, nanda ohiwodha wila iyene na mamunaye Adamu, akose ejile yafuniye, othiya omwiwelela Mulugu. (Wita 3:1-6; 2 Korinto 11:3) Iyene vina ohiloga wila agahiwodha wapupurutxa wa Mulugu adhuli otene a Adamu na Eva, abene agadhile obaliwa. Dhaene, Mulugu ohinvaha Satana mudhidhi wa otamela ovaha onamona mazu aye, mbwenye Satana kaneddeleyaga deretu.—Jobi 1:6-12; 2:1-10.

Mwatxibarene, Satana kanlamulela elabo yeka. Iyene ohiwodha waweta angelo ena ogumana na iyene momusadduwela Mulugu. Aba ahidha okala adomonyo, arumeleli aye a omuyani. Bibilia onowaloga aba bagakokomeza akristu: ‘Mulibe txithi mosadduwela marhe a Ddiabo; sabwani nihikana koddo, kayo yosadduwela nikami na maningo, mbwenye mowasadduwela alamuleli a elabo a epipi eji, mosadduwela guru dhomuyani dhabure dhinkala odhulu.’—Efeso 6:11, 12.

Karabela Muya Dhabure

Alamuleli aba a elabo ohoneya vina abure ahigana opupurutxa nlogo notene na athu, aapupurutxaga momwebedha Mulugu. Mukalelo mmodha onkosa muya esi dhabure bwa ovudhelela yubuwelo yawila muthu agakwa onokalawovi, masiki Nzu na Mulugu vantonyihedhani mowoneya wila abale akwile kanziwa elobo. (Wita 2:17; 3:19; Ezekieli 18:4; Salmo 146:3, 4; Eklesiaste 9:5, 10) Dhaene, muya wabure, bugatagiha lizu na marafula, txino onologa na amudhi obe amarho aye aliwo, modhela muliba muya, obe modhela “lizu” nodhela mburo wohoneya. “Lizu” nthi ninoshagela okala na marafula, mbwenye mwebaribari tha domonyo!

Mwa dhaene, akala siku sikuvi onowiwa “lizu” dhaene, kunyengetheye. Kakodda ejene enlogani, kafarihedha mazu a Yezu: “Suka Satana!” (Mateus 4:10; Tiago 4:7) Kurumele wila munigwa wa ofuna oziwa dha elabo ya muya wuwandanihe na muya dhabure. Wandana oku ontxemerhiwa walabela azimu, nanda Mulugu onowalaga anamebedha aye mosadduwela makalelo otene a muya. Bibilia onomukona “muthu onombeza makaga . . . obe muthu ondowa wombeza na muliba muya, obe mulaula, obe muthu ondowa wawombeza aliba okwa”.—Deuteronomo 18:10-12; Galásia 5:19-21; Ovuhulela 21:8.

Vowila olabela muya onomwika muthu mutxiddo mwa nipakelo na adomonyo, karabela mereloya otene, masiki akala ankala ninga anvegiha obe an’hagalaliha. Merelo aba anotaganyiheya na olabihedha epeddo vina sumbe, piri, wengesa mikwereto dha mmadani na makaga a dhineneri. Adomonyo vina anonyagulaga nanda anokosaga singaningo dhina dhowoneya mmatakulu mwenemo mukosilani ninga murudda wawa.

Mowenjedhedha, muya dhabure dhinopura emanya yothega ya athu, avudhelelaga manivuru, silema na programa dha televizau dhinthukulela vadhulu mweddelo wa ogonihana wotakala vina wohikala wa omuthu. Adomonyo ahiziwa wila dhubuwelo dhabure, dhigakodda oburutxiwa mmusorhoni, dhinothiya mambazi ohifudheya nanda anowathukulela athu wedda monyakuwa—dhaene ninga munkosela adomonyo.—Wita 6:1, 2; 1 Tesalónika 4:3-8; Yuda 6.

Jebaribari wila athu enjene anobedda yubuwelo yawila elabo eji enlamuleliwa na muya dhabure. Mbwenye ovanya oku kunfanyela onitikiniha, vowila Bibilia onloga dhahi: “Satana onovisaddulaga bagakala mungelo wa txeza.” (2 Korinto 11:14) Murega waye wowopihetxa bwa wakunela athu enjene omentoni wila anaziwe wila iyene vamodha na adomonyo aye ahikalawo txibarene. Mbwenye kunyengetheye! Ddiabo na adomonyo aye ahikalawo wene, nanda weyo onofanyela warabela awene.—1 Peduru 5:8, 9.

Mohagalaliha, mudhidhi onfuna Satana na agongomwa akwaye orimela oli vakukuvi! “Elabo [vamodha na alamuleliya a adomonyo] enovira”, Bibilia onolibiha, “mbwenye oddule onkosa efunelo ya Mulugu onela okalawo na mukalakala”. (1 Joau 2:17) Onakale ofuru vaddiddi nipakelo nthi nabure nigaburutxiwavo! Nikale vari va abale ankosa ofuna wa Mulugu nanda anajevo egumi na mukalakala mwilaboni eswa yoligana ya Mulugu.—Salmo 37:9-11, 29; 2 Peduru 3:13; Ovuhulela 21:3, 4.

Ogaikale ntonyedho ninagu, mengeselo ali apa athukuliwe mBibiliani mwa Tradução do Novo Mundo das Escrituras Sagradas—Com Referências.

[Foto vanikukuni 4]

Satana agahiwodha onvaha Yezu malamulelo aba otene a elabo kohikala aye?