Kapitulu Kumi Na Nai
Yehova Oneeddiha Dhavi Nikuru Naye?
1. Muselu gani mwaha wa nikuru na Yehova onloga Bibilia, nanda muselu obu okaleli eni wa makamaka wila niziwe?
MULUGU ohikaana nikuru? Malebo owubuwelihiwa annipanga wila iyene ohikaana nikuru. Mu Nzu naye, iyene ononitonyihedha vañgonovi epaddi yotikiniha ya nikuru nthi nili odhulu. (Ezekiyel 1:1, 4-14; Daniyel 7:9, 10, 13, 14) Masiki vankooddihu woona epaddi eji ehinooneya, eji enowapakela vaddiddi anamebedha a ebaribari nsaka na ovanene. (2 Amwene 6:15-17) Nikuru na Yehova nihikaana vina epaddi enooneya velaboni ya vati. Bibilia ononikamiha ononelamo eji, vina mukalelo oneeddiha Yehova.
Nizinddiyele Epaddi Enooneya
2. Mulogo gani muswa wetile Mulugu?
2 Nlogo na Izrayel nali mulogo wa Mulugu muthengo wa vyaka 1.545. (Merelo 7:38) Mbwenye Izrayel wahivonya osoriha malamulo a Mulugu vina wahimukoodda Mwana waye. Sabwa ya ejene, Yehova wahikoodda mulogo obule vina banyanyala. Yezu wahapanga Ayuda dhahi: “Wone! Numba dhawo kadhinakaliwege.” (Mateu 23:38) Venevo Mulugu wahita mulogo muswa, obwene okosiliyena nipagano niswa. Mulogo obu ogakaanile athu 144.000 asakuliwe na Mulugu wila agumane na Mwana waye odhulu.—Ovuhulela 14:1-4.
3. Txini epadduwile va Pentekoste wa 33 E.C. wila yoonihe deretu yawila venevale Mulugu wela olabihedha mulogo muswa?
3 Ooromaya a mulogo obule muswa aali athikitheliwi na muya wokoddela wa Yehova va Pentekoste wa 33 E.C. Mwaha wa nipadduwo nthile nddimuwa, ninowengesa dhahi: “Vafiyile siku na mathanga a Pentekoste, arumiwi etene a Yezu àli mburo mmodha. Venevo oruma wadha odhulu oarurumutxa; orumawá wali ninga wa pevo enoba na guru, wadhala mba mwetemwene mwalani. Apo ahona dhilobo ninga malumi a motho, àtitelaga agaweleyaga vadhulu va muthu-muthu. Etene adhala Muya Wokoddela.” (Merelo 2:1-4) Dhaene, muya wa Mulugu ohooniha deretu yawila nthi nali nikuru na athu nafuna Mulugu olabihedha wila asorihe efunelo yaye na mweeddihedho wa Yezu Kristu odhulu.
4. Bani ankosa nikuru nowooneya na Yehova nsaka na ovanene?
4 Nsaka na ovanene, oohalavo a 144.000 añgonovi bahi bali velaboni ya vati. Mbwenye mwa osoriheya wa nivuhulo na Bibilia, “muthithi munddimuwa” wa “[mabila] menagu,” matxikwi na matxikwi, ahigumanihiwa na athikitheliwi oohalavo. Yezu, Mukumbuzi Wapama, ohigumaniha mabila aba menagu na oohalavo wila akale nikuru nimodha ninlamuleliwa na iyene ninga Mukumbuzi wawa mmodha. (Ovuhulela 7:9; Joau 10:11, 16) Otene aba bankosa nikuru nowiwanana, nikuru nowooneya na Yehova.
Nikuru Ninlamuleliwa Na Mulugu
5. Oneeddiha nikuru na Mulugu bani, nanda oneeddiha dhavi?
5 Nzu na Malebo ninloga “mulogo wa Mulugu onkalawovi” ninowooniha bani oneeddiha mulogo obu. Nikuruna ninlamuleliwa na Mulugu. Yehova oneeddiha nlogo naye modheela Yezu, oddwene Omuthomiliye wila akale Musorho wohooneya wa mulogo, vina modheela Nzu Naye nowubuwelihiwa, Bibilia.—1 Timóteo 3:14, 15; Éfeso 1:22, 23; 2 Timóteo 3:16, 17.
6. (a) Mu vyaka zana dhoroma, mweeddihedho wa mulogo ovenyedha odhulu wooneyile dhavi? (b) Txini enlagiha wila Yezu ddilivi Musorho wa Mulogo?
6 Mweeddihedho obu wahooneya deretu va Pentekoste. (Merelo 2:14-18, 32, 33) Wooneyile anju wa Yehova mwasogorheliye mabasa a ovuwiha bili yaderetu mu Afrika, mudhidhi wavahile lizu na Yezu mweeddihedho nsaka na osadduliwa wa Saulo mukadda Tarso, vina Pedru mwaromeliye mabasa a olaleya mwari mwa Amalabo. (Merelo 8:26, 27; 9:3-7; 10:9-16, 19-22) Mbwenye, na mudhidhi, kavo wiwale viina lizu ovenyedha odhulu, kavo wawoonile anju, kavo wakelile viina mivaho dha muya. Masiki dhaene, Yezu wahiroromeliha: “Onani, miyo ddili na nyuwo masiku otene ofiyedha omagomelo wa elabo.” (Mateu 28:20; 1 Korinto 13:8) Nsaka na ovanene, Anamoona a Yehova anoziwa wila Yezu onoweeddiha mabasa. Kohikalawo mweeddihedho obu, kigawodheyile olaleyiwa muselu wa Omwene banigagumana na ofarafariwa wothidda motho.
7. (a) Bani onkosa mpaddi wa “mwimeleli wororomeleya vina wamalago,” nanda sabwa yani? (b) Txini yathomeliwe “mwimeleli”?
7 Mudhidhi muñgonovi ahinathi okwa, Yezu wahapanga anamasunza aye mwaha wa “mwimeleli wororomeleya, wamalago” oddwene aganvahiliye mabasa a vawoka, vowila iyene ddi Mwinyayá. “Mwimeleli” oddu agahikalavo mudhidhi wa odhowa Nabuya waye odhulu vina welege olabavi na guru mudhidhi wa wiyela wohooneya wa Kristu na ewodhelo ya Omwene. Mulogelo obu kunimwaddana wene muthu mmodha, mbwenye onaddana mulogo wothikitheliwa wa Kristu. Vowila ogulile na nikami naye, Yezu onromola mulogo obu ninga “mwimeleli” waye. Iyene waharuma athuya wila aakosege anamasunza vina aajihege vañgono vañgono modheela wavahaga “poso [na omuyani] mudhidhi ogafiya [mmudhidhinimwa].”—Mateu 24:45-47; 28:19; Izaiya 43:10; Luka 12:42; 1 Pedro 4:10.
8. (a) Mabasa gani avahiwe nikuru na mwimeleli ovanene? (b) Ekaleli eni yofuneya wiwelela nsunziho ninvaha Mulugu modheela dila eji yofanyeela?
8 Vowila nikuru nthile na mwimeleli nali nororomeleya banigakosa mabasa a Mwinyayá mpaka wiyela waye wohooneya yaka ya 1914, ohikala ezinddiyelo yawila mabasaye ahenjedhedhiwa yaka ya 1919. Oromana vyaka esile onovahiwaga onamoona wa Omwene elabo yotene, vina onogumanihiwa muthithi munddimuwa wa anamebedha a Yehova, wila aviluwe va masosoni manddimuwa. (Mateu 24:14, 21, 22; Ovuhulela 7:9, 10) Aba vina anofuna oja wa omuyani, nanda awene anovahiwa oja oku modheela nikuru na mwimeleli. Noona, wila nimuhagalalihe Yehova, ninofanyeela orumeela nsunziho ninvahiye modheela dila eji vina okosaga dhilobo mowiwanana na ejene.
9, 10. (a) Mu vyaka zana dhoroma, wali masasanyedho gani a othonga miladdu mwaha wa masunziho vina ovaha mweeddihedho wa olaleya bili yaderetu? (b) Nsaka na ovanene oli musasanyedho gani wa osogorhela mabasa a nlogo na Yehova?
9 Mudhidhi na mudhidhi, onokalaga mavuzo mwaha wa masunziho vina meeddihedho. Ki txini enkosiwa? Merelo kapitulu 15 ononipanga mukalelo wathongiwe muladdu dhahi mwaha wa Amalabo abalene aasadduliwe bakala Akristu. Muladduya wahiperhekeliwa arumiwi vina anddimuwa a mu Jeruzalemi, abalene alaba ninga nikuru nolamulela na makamaka. Alobwana abale aali athu anvonya, mbwenye Mulugu wahalabihedha. Awene aahipepesa malebo ewanana na muladdu obule vina mitonyo dhawila muya wa Mulugu wahifugula mundda wa Amalabo. Venevo awene aahithonga muladduya. Mulugu wahireeliha esile dhakosiwe. (Merelo 15:1-29; 16:4, 5) Nikuru nthile na makamamaka nolamulela, nela waruma athu wila asogorhihege mabasa a olaleya Omwene.
10 Mu nsaka nehu Nikuru Nolamulela nthene ninsogorhela nikuru nowooneya na Yehova, tha abali oothikitheliwa a dhilabo dhothiyana thiyana. Nikuru nthi nili va kathi ya elabo yotene ya Anamoona a Yehova. Mutxiddo mwa mweeddihedho wa Yezu Kristu, Nikuru Nolamulela ninosogorhiha webedha webaribari mu dhilabo dhotene, banigasogorhela mabasa a olaleya a Anamoona a Yehova mmilogoni mwawa matxikwi na matxikwi. Abali ali mu Nikuru Nolamulela anubuwela ninga murumiwi Paulo oddwene walebeli Akristu akwaye dhahi: “Entamela iyo kaiyo okala anya anthonga nroromelo nenyu, vowi nyuwo mumala owarala. Entamela iyo kulaba vamodha na nyuwo, wi mirima dhenyu dhithabe.”—2 Korinto 1:24.
11. (a) Anddimuwa a mmulogoni na adhari oorumeelela anthomiwa dhavi? (b) Ninfanyeelela eni olaba vamodha na abale athomiwe?
11 Anamoona a Yehova mwilaboni motene anjeedhela Nikuru Nolamulela wila nathome abali anfanyeela. Venevo abali aba anovahiwa mabasa a wathoma anddimuwa a mmulogoni vina adiákono [obe adhari oorumeelela] wila eeddihege milogo. Magano a abale anthomiwa anlogiwa mBibiliani eziweyaga wila alobwana aba kayo owakwana, vina anovonya. Anddimuwa a mmulogoni ankumbirha wila athu ena athomeliwe mabasa, vamodha na abale anathomela mabasaya anowakula vamentoni va Mulugu. (1 Timóteo 3:1-10, 12, 13; Tito 1:5-9) Dhaene, awene anokosa nlobelo bagakumbirha nikamihedho na muya wa Mulugu vina anotamela mweeddihedho wa Nzu nowubuwelihiwa na Mulugu. (Merelo 6:2-4, 6; 14:23) Ndoweni ntamaalelege ‘mivaho dha athu,’ abene annikamiha mpaka “vanafiyedhe iyo netene ororomela omodhene.”—Éfeso 4:8, 11-16.
12. Yehova onalabihedha dhavi ayana mu nikuruni naye?
12 Malebo anloga wila mulogo onofanyeela wañganeliwaga na alobwana. Oku kayo wapwaza ayana, sabwani ena anowakela Omwene wa odhulu, vina anolaba vaddiddi mmabasani a olaleya. (Masalmo 68:11) Vina, modheela osorihaga na ororomeleya mabasa awa a murala, ayana anokamihedha mulogo ologiwa deretu. (Tito 2:3-5) Mbwenye mabasa a osunziha mmulogoni ba alobwana abene athomeliwe osunziha.—1 Timóteo 2:12, 13.
13. (a) Bibilia onakokomeza anddimuwa a mmulogoni wila oonege dhavi mabasa awa? (b) Gari gani ena iyo notene?
13 Mwilaboni, muthu onkaana mpaddo wa ethomo onooniwa ninga wa makamaka, mbwenye mwari mwa nikuru na Mulugu niganona thi nthi: “Onvikosa muñgonoyavó, ddinakale munddimuwa.” (Luka 9:46-48; 22:24-26) Malebo anowalaga anddimuwa a mmulogoni akale pasope, wila anavikalihe anya a athu athiyedhiwani, mbwenye akale asogorheli anfanyeela otagihiwa na athu otene. (1 Pedro 5:2, 3) Gari ya omwimelela Mulamuleli wa Elabo Yotene kayo ya athu añgonovi asakuliwe, mbwenye ja Anamoona a Yehova otene, ayana na alobwana, abene anloga na oviyeviha mu nzina naye vina anapanga athu ena mpaddi wotene mwaha wa Omwene waye.
14. Bugalabihedha malebo atonyiwe, kaakula mavuzo alebiwe omagomo wa ddima eji.
14 Ninokosa deretu ovivuza: ‘Ddinotamaalela mukalelo oneeddiha Yehova nikuru naye nowooneya? Makalelo aga, malogelo aga, vina merelo aga anowooniha ejene?’ Otanaalela mwaha wa mitoma esi dhili mutxiddo podi onikamiha okosa opepesa oku.
Akala ddinomwiwelela txibarene Kristu ninga Musorho wa mulogo, ddinfanyeela okosaga eni ninga mutonyihedhiwani na malebo aba anfarihedha? (Mateu 24:14; 28:19, 20; Joau 13:34, 35)
Ddigarumeelaga na ntamaalelo mivaho dha omuyani dhinda modheela nikuru na mwimeleli vina Nikuru naye Nolamulela, ddinimuriha ani? (Luka 10:16)
Athu otene mmulogoni, makamaka anddimuwa a mmulogoni, anfanyeela dhavi weeddihana muthu na mukwaye? (Roma 12:10)
15. (a) Modheela mukalelo onoonihu nikuru nowooneya na Yehova, ninlagiha eni? (b) Gari gani dhiliwo wila nilagihe yawila Ddiabo muthambi vina wila nihagalalihe murima wa Yehova?
15 Nsaka na ovanene Yehova onneeddiha modheela nikuru naye nowooneya nthene ninsogorheliwa na Kristu. Mukalelo onoonihu musasanyedho obu onolagiha mukalelo onoonihu mwaha wa olamulela onddimuwa. (Ahebreu 13:17) Satana onloga wila ninzuzumeletxa oderetu wehu. Mbwenye akala iyo ninokosa mabasa mabasavi abuwene anfuneya, vina akala ninorabela dhilobo esuwene dhihili dha oderetu wehu, ninolagiha wila Ddiabo muthambi. Akala ninowakwela vina ninowariha abale ansogorhela vari vehu mbwenye banigakoodda ‘wasiba athu nipyagelaga opura elobo jilobo,’ ninomuhagalaliha Yehova. (Juda 16; Ahebreu 13:7) Modheela ororomela nikuru na Yehova, ninolagiha wila Yehova ddi Mulugu wehu vina yawila nihiwanana mwa omwebedha iyene.—1 Korinto 15:58.
Osakulela
• Nsaka na ovanene nikuru nowooneya na Yehova thivi? Nikuru nthi ninfuna eni?
• Bani othomiwe ninga Musorho wa mulogo, nanda iyene onnivaha mweeddihedho wokwela modheela musasanyedho gani?
• Makalelo gani aderetu anfanyeelihu wakaanela abale ali mu nikuruni na Yehova?
[Mafoto vanikukuni 133]
Yehova onneeddiha modheela nikuru naye nowooneya nthene ninsogorheliwa na Kristu