Azombwe​—Munalabihedhe Dhavi Egumi Yenyu?

“D DINFUNA ddipure kakamwe egumi.” Ologile ddi muzombwe dhahi wa muyana. Mohaganyedha weyo vina onofuna yakakene. Mbwenye weyo onapurelemo dhavi “kakamwe” egumi yawo? Dhipano dhovavihana miselu vina amarho awo, vamodha na anamasunziha txino mudhidhi mwina, anodha ologa wi jowodheya olabihedha deretu egumi yehu modheela okaana muhaku wowinjiva vina okaanetxa mabasa anvaha muhaku munddimuwa vaddiddi​—obe opura othukuwa!

Mbwenye, Bibilia onowakokomeza azombwe abale antameletxa, okosa guru wi akaanetxe dhomaningoni enkala ninga muttu onfanya maveya ninga ‘othamagela pevo.’ (Kohelét 4:4) Mwa epaddi yina, azombwe ag’onovi anofanya ovuwa na dhorela dhinvedetxani. Mwa abaleya anwodha ofanya angomelana vamaveyani obe kanagalala. “Ejoya enladdanihiwa na kaxa muhili elo,” ologile ddi muzombwe dhahi wa elabo ya Angelezi wana ganyo yottukuwa. “Ogag’ana mwarimwa, kamuli elobo.” Ebaribari wi ganyo dhina dhinovaha eziwelo na kobiri vina dhinowoniha ejile enlibeliwe. Mbwenye kadhinwodha wakwaniha ‘dhifunelo dhawo dhomuyani.’ (Mateu 5:3) Ottiya ejuwene, 1 Joau 2:17 ononaddela wi “elabo enovira.” Masiki ofiyedhaga dhinfuniwe, esodha kadhinagonele mudhidhene.

Nona nivuru na Kohelét 12:1 ninowakokomeza azombwe wi: “Omubuwele Mpaddutxi wawo malabo ozombwe wawo.” (Bibilia Malebo Okoddela) Mohaganyedha, mukalelo wofanyeela wa olabihedha egumi yawo bwa omulabela Yehova Mulugu. Ottiya ejuwene, weyo onofanyeela ovisasanyedha wi omulabele Mulugu. Onakose dhavi? Olabihedha egumi yehu wi nimulabele Mulugu entapulela eni?

Ovisasanyedhe wi okale Munamoona wa Yehova

Vamaromo, weyo onofanyeela wunuwiha efunelo ya omulabela Mulugu​—efuneloya ejo kinda woka, masiki akala ababo Akristu. Onofanyeela ovilibihedha wi wandane na Yehova. “Malobelo anoukamihedha onfiyedha Yehova,” ologile ddi muzombwe dhahi wa muyana.​—Masalmo 62:9; Tiago 4:8.

Akadda Roma 12:2 onologa ttarho yina enfanyeeliwe okosa. Onloga wi: “Vithiyení osadduliwa na Mulugu, muthukulaga mobuwelo maswa wi muwodhe ononelamo enufunanina Mulugu, eli yapama, enimuzivela, eli yawakwana.” Wahiromaga waganyedha dhilobo dhisunzihiwewi? Mwadhawene kafara malago a Bibilia, owodhaga ozinddiyela wamunyene wi esi dhinsunziwe s’baribari! Kapepesa. Kamwengese Bibilia na manivuru meena andela Mbibiliani. Mbwenye osunza modheela Mulugu kahiyo bahi elobo ya aziwitxi. Okaane mudhidhi wi otanaalele esile dhinengesiwe ottiyaga wi miseludha dhivolowe mmurimani mwawo. Na mukalelo obu omukwela wawo Mulugu onele wenjedhedheya.​—Masalmo 1:2, 3.

Ogamala, opurelemo mikalelo dha labo-labo wi wawaddele attu eena esile dhisunzilewi. Olaleya numba na numba ttarho ya vasogorho. Mohaganyedha weyo onele wafanya amarho awo oskola mudhidhi onlaleya weyo numba na numba. Txino vamaromo, onodha ogurumela na mazuya. Mbwenye Bibilia ononikokomeza wi kanikaanele “manyazo muthaka wapama.” (Akadda Roma 1:16) Weyo onavaha muselu wa egumi vina njeedhelo! Onakaneleni manyazo olaleyawa?

Ovano, akala ababo Akristu, txino onowavelelaga mmabasani a olaleya. Kito weyo kunwodha okosa venjene ottiya okala odhowavi numba na numba s’ologa, obe okala ovahedhelavi marevista na matratado bahi? Obe weyo onowodha ologa numba na numba, omulabihedhaga Bibilia wi omusunzihena mwanamurala? Akala kunwodha kakumbirha nikamihedho na ababo obe na mbali wowarala omuyani wa mmulogoni mwawo. Kemetxa efunelo yomuyani ofanyeelelaga okala namalaleya wa miselu dhapama ohinabatiziwa!

Na mudhidhiya, onele okaana efunelo ya oviperheka wa Mulugu​—nlibelo na omulabela oromana labo-nenentto mpaka musogorho. (Akadda Roma 12:1) Mbwenye oviperheka kahiyo wovivita. Mulugu onfuna wi ‘attu otene, aloge mazu andana ovuneya.’ (Akadda Roma 10:10) Labo na obatizo wawo, weyo onologa na lizu noliba nroromelo nawo. Musogorhomwa, onobatiziwa mmanjeni. (Mateu 28:19, 20) Mwebaribari obatizo ttarho yohivegana, mbwenye kuwove ofara dila ejo ttangwi yawi onakose elobo yabure musogorho. Ogakaana nikuluvelo na guru dha Mulugu, iyene onele wuvaha ‘owodha onddimuwa’ vina onele wukamihedha okalavi txitti.​—2 Akadda Korinto 4:7; 1 Pedro 5:10.

Mudhidhi wa obatizo, weyo onela okala munamoona wa Yehova. (Izaiya 43:10) Ejo enele opakela mweddelo wawo wotene. Oviperheka entapulela ‘ovikoodda wamwinyeene.’ (Mateu 16:24) Jowodheya wi weyo okodde dhosilila dhawo nanda ‘otamelaga vamaromo Omwene wa Mulugu.’ (Mateu 6:33) Oviperheka na obatiziwa onofugula dila ya gari enddimuwa ya okosa ejuwene. Ndoweni nisekeserhe dhosakula dhiina.

Gari ya Omulabela Mulugu na Mudhidhi Wotene

● Mabasa a Opionero mareeliho meena a gari esi. Namalaleya wa Pionero Mukristu obatiziwe ona mweddelo wofanyeela okosile masasanyedho a ovivelela wi alabe ngafuna mawora 70 vamwerini alaleyaga miselu dhapama. Olabaga mudhidhi mwinji mmalaleyeloni, onele wunuwiha ewodhelo yawo yolaleya vina ya osunziha. Apionero enjene anowagalala modheela wakamihedha anamasunza awa a Bibilia ofiyedha okala anamoona a Yehova. Mabasa gani a mwilaboni agakalile ogalamuwa vina aganivahile wagalala?

Wi akwanihedhe dhifunelo dhawa dha mwigumini, apionero enji anorumeela ganyo dha mudhidhi mug’onovi. Owinjiva anubuwela okala apionero, anosunza mabasa ogumelana elobo-txilobo oskola obe na amambali awa. Akala weyo vamodha na amambali awo munowubuwela wi jofanyeela odhowavi bugonuwiha eziwelo yawo na mabasa omesirhi ogagomiha oskola, kakaana nikuluvelo wi efunelo yawo yamakamaka kahiyo ya okaana kobiri yinjene, mbwenye ja ovikamihedhana ogavolowa mmabasani a opionero.

Mwadhahene, egumi ya pionero kahiyo yotameletxa ganyo dha mwilaboni, mbwenye ja mabasa olaleya​—aakamihedhaga attu wi avuneye! Kito sabwaya jani kunimetxa efunelo ya okala pionero? Dila dhiina mabasa abo anottukulela gari dhiina. Motagiha, apionero eena anomwalela okule oli ojombeliwa onddimuwa wa anamalaleya a Omwene. Eena anosunza elogelo ya elabo yina vina anolaba na mulogo wa elogelo ya elabo yina obe anomwalela elabo yina. Indde, mabasa a opionero anodhana egumi ya mareliho!

● Eskola ya Anamalaleya Omwene obu musuwo wa gari dhiina. Eskola eji ya meri minli yimetxeliwe wi yashagihe apionero a ewodhelo ana efunelo ya wunuwiha mabasa awa wi attiye elabo yawa ya obaaliwa amwalelaga okule onfuniwana awene. Txibarene, aweneya anologa na wagalala, “Ddili veneva ddirumení” mwa omutagiha namalaleya munddimuwa olabile velaboni ya vati, Yezu Kristu. (Izaiya 6:8; Joau 7:29) Omwalela murudda mwina enofanyeela owodha okosa masadduwo a mwigumini. Meddelo, mikalelo dha elabo oviha obe oridha, dhoja dhiswa dhottiyana na esile dhalemeeliwe, txino enofuneya osunza elogelo yina. Eskola eji enowakamihedha abali na arogora a aziye vina abali a atelani ana vyaka 23 mpaka 65, wi onuwihe mikalelo dha omuyani dhinakale dhofanyeelela mwari mwa ottomiwa wawa vamodha na ewodhelo enakamihedhe wi alabihedhiwe mowakwana kakamwe na Yehova.

● Mabasa Obetel yofuneyaya ja okala muttu wovivelela na murima wotene wi olabege ofiliali wa anamoona a Yehova. Abali eena Obetel anlaba wi apide manivuru ehu andeela Mbibiliani. Eena anottomiwa wi akamihedhe mabasa ninga osasanyedha numba dhogujuwa na dhitagano dhina vamodha na okamihedha mabasa a vamuralani a anamudhi Obetel. Ettomo yotene gari yotxena ya omulabela Yehova. Mottiya ejuwene abale ankala Obetel ahikaana wagalala mwa oziwa wi, dhotedhene dhinkosa awene anlabela oderetu wa abali vina mabasa andana dhopurelamo dhinji mwa abali elabo yotene.

Midhidhi dhina anottomiwaga abali ana mikalelo dhaderetu dha olaba Obetel wi akamihedhe. Mbwenye owinjivaya anoshagihiwa mudhidhi onfiya awene wenewo. Abetelita otene kanlabela oranjula, mbwenye enfuna awene okaana vogona, na oja, vina nikamihedho nofanyeela wi agulena dhilobo dhinajombela. Muzombwe mmodha wa anamudhi Obetel ohileba dhahi mukalelo wa mabasa aye: “Mabasaya borutxa, mbwenye ddinottambirhaga mareliho menjene mmabasani mwaga.”

● Mabasa a Omaga anovaha gari ya muttu omaga numba dha filiali vina na Numba dha Omwene. Emeleli a omaga, ninga munlogela nzinana anokamihedha mabasa a omaga. Obu mukalelo wa mabasa otxena anligana na abale amagile tempulu masaka a Salomau. (1 Amwene 8:13-18) Mikalelo dhisasanyedhiwe dha wakoyana abale ankosa mabasa omaga sakakene na abale a anamudhi Obetel. Eji gari enddimuwa vaddiddi ya abali na arogora olaba mwari mwa omulabela vina omuttittimiha Yehova modheela mabasa ankosa awene!

Omulabele Yehova na-Murima Wotene

Omulabela Yehova mohaganyedha mukalelo wamakamaka wa weyo olabihedha egumi yawo. Kito onoonamo dhavi osakula omulabela Mulugu mwa mudhidhi wotene? Kaloga makaniya abo na ababo, na anddimuwa a mulogo wawo vamodha na musogorheli wa milogo. Akala onubuwela olaba Obetel obe osunza Eskola ya Anamalaleya Omwene, koona matugumano a vawoka a abale ana efunelo ya olaba mudhidhi wotene, ankosiwa va matugumanoni a ttattamwa obe a murudda.

Ebaribari wi attu otene kana mikalelo dhinattiya ovolowa mmabasani a mudhidhi wotene. Dila dhiina sabwa ya makattamiho a egumi, oyelega obe odideliwa na anamudhi onogwaddela ejile yafuna okosa muttu. Masiki egalivi dhawene, Akristu otene aviperhekile anofanyeela weeddihiwa na magano a Bibilia anloga: “Omukwele nabuya Mulugu wawo, na murima wawo wotene, na guru dhawo dhotene, na zelu dhawo dhotene.” (Mateu 22:37) Yehova onfuna wi okose ejile enwodhiwe moligana na mikalelo dhawo. Mwa ejile eliwe, kavilibihedhe wi egumi yawo yeeddege mowiwanana na mabasa a Yehova. Kagana okosa dhilobo dha omuyani. “Omubuwele Mpaddutxi wawo malabo ozombwe wawo”​—nanda onele wakela mareliho amukalakala!