Muyana Oli Vatxelani

Mvirele Paskwa, Yezu na anamafwara aye avira o Samariya bageyelela o Galileya. Yezu wahimeela va mburoni dhahi natxemerhiwa ntxela na Jakob. Anamafwara aye adhowaga ogula elobo yoja mu sidadi yaddamelani, Yezu wahala bagavuma.

Muyana dhai ofiya wi aruge manje. Yezu omuloba: ‘Kaddivahe manje ddimwe.’ Muyanayá omwakula: ‘Munlogela nni na miyo? Kamunziwa wi ddili muyana wa musamariya? Ayuda kanloga na Asamariya.’ Yezu omwakula dhahi: ‘Weyo koddiziwa, ogahiddikumbirha manje, nanda miyo ddigahuvaha manje a egumi.’ Muyanayá omwakula: ‘Ejoya entapulela eni?’ Nyuwo muhikana muttepu? Yezu omwiyihedha: ‘Ole omwa manje aninvahemi, kanakwe vina nttona.’ Muyana ohakula: ‘Nabuya, ddivaheni manjeya abo.’

Nomala Yezu omukumbirha. ‘Kamudhowele mamunawo.’ Iyene omwakula: ‘Miyo kadditeliwe.’ Yezu omwakula: ‘Ologa ebaribari. Weyo oteliwa alobwana atanu, nanda mulobwana oniwena ovanene kahiyo mamunawo.’ Muyanaya ohakula: ‘Ovano ddiziwa Nabuya wi muli namavuhulela. Nlogo naga ninrumela wi iyo nimwebedhege Mulugu vamwangoni obu, oku Ayuda alogaga wila nimwebedhege Mulugu o Jeruzalimi bahi. Enziwa miyo jowi Mesiya agafiya onele onisunziha marhe apama a omwebedhana Mulugu.’ Apo Yezu ologa elobo ehinalogaga iyene na muttu mwina: ‘Mesiyayá ddi miyo.’

Muyana ovolowa musidadi momaguva, ohawaddela Asamariya dhahi: ‘Alobwanani ddihinfwanya Mesiya. Oddipanga dhetene dhiddipadduwele. Dhawunoni mmoone.’ Attuya anfwara, anfwanya Yezu vatxelani anvuruwana dhasunzihiye.

Asamariya amukumbirha Yezu wi akale na awene musidadi. Iyene omalamo malabo meli bagasunziha, nanda attu enjene annimuroromela. Awene ampaga dhahi muyana oddule wa Musamariya: ‘Mumalelihu wiwa dhilogile muttu oddu, niziwa wi iyene mvuni wa elabo.’