‘Omwene Wenyu Odhe’

Yehova olibela dhahi: “Kunakale vina okwa, kutho, obulela, segedho.” ‘Vowi ddinele okuputta muntori bu muntori wa mmentoni mwawa. Dhamwilaboni yawale dhinovira.’

Yehova ohimuttandda Adamu na Eva battiya mmunddani mwa Edeni wi akale na murenddele. Awene afuniwana wi amwebedhe Yehova bahi vina abaale wi elabo yotene mukale attu. Masiki Adamu na Eva vanvanyilani Yehova, dhalibeli Yehovayá kadhigavonyile-wene. Munivuruni mpu nihona wila dhetene dhalibeli Yehova dhihakwanela. Nona Omwene waye onele odhana mareliho velaboni ya vati ninga mwalogeliye na Abramu.

Ovanen’apa, Satana, adomonyo aye vina attu otene abure anele otolowa. Otene anakalewo anamwebedhege Yehova bahi. Kaninabulelege nne okwa. Ottiya ejo, malabo otene ninavenyege banina guru vina emwerumweru. Elabo enokala Paraizu. Attu otene anele okana dhoja dhoziva na numba dhaderetu. Kunakale avuti nne atimbwini, attu otene anakale okoddelavi murima. Dhinama dhamwini kadhinanovege, iyo vina kaninovege.

Matikinihoya-matikinihoya ninone Yehova agaroma wavenyiha attu mu okwani. Ninele wawakela attu a nsaka nawale, ninga Abel, Nowé, Abramu, Sara, Mizé, Ruti, Ester na David. Awene anele ojavo na iyo Elabo ya Paraizu. Awene anele okana mabasa gwé oziva.

Yehova onfuna wila weyo vina okale mwenemo. Ogavolowamo, panamuziwiwe Yehova mowakwana-mwene. Ndowe nimususele Yehova akale marho wehu, malabo otene, ovanene, vina musogorho!