NIPADDUWO 5
Okalawo Worutxa Ohiroma
OTAKULU wa mundda wa Edeni, Adamu na Eva aahikaana makathamiho menjene. Anfanyeela olaba vaddiddi wila akaane dhoja dhawa. Othiya woonaga miri dha misapo dhokoddela, awene oona miinga na dhikuwa esilene dhonuwa mowarija awene. Ji ejene yapadduwile Adamu na Eva mwanvanyelani Mulugu vina mwimelelani okala amarho Aye.
Mbwenye yothabwaya yokwaranya ejilene, jawila Adamu na Eva aahiroma okwa. Kobuwela, Mulugu wahalaga awene wila kooja musapo wa muri dhahi awene agahikwa. Sikunene nthile nijilani, awene aahiroma okwa. Ozimorha gani wakosilani okoodda oonvuruwana Mulugu!
Ana otene a Adamu na Eva abaaliwe Mulugu mumaleliye wathamagihedha ababi awa otakulu wa mundda wa Edeni. Eji entapulela wila anaya anfanyeela wuluvala vina okwa.
Kowiliwa Adamu na Eva ahimwiwelela Yehova, egumi yawa vamodha na ya ana awa egahikala ya osanzaya. Awene otene agahikalawo na mukalakala na osanzaya velaboni ya vati. Kavo agoluvalile, agakalile muredda vina agaakwile.
Mulugu onfuna wila athu akalegewo na mukalakala na osanzaya, nanda Iyene ohiroromeliha wila siku sikuvi awene anela okalawo. Elabo ya vati kinakalele okoddelavi, mbwenye athuya otene anela okala agumi. Nanda athu otene velaboni ya vati anela okala amarho aderetu na athu otene vina na Mulugu.
Mbwenye Eva kakalile viina marho wa Mulugu. Noona wabaala anaye wannimurutxa vaddiddi. Iyene wanniwa opa. Onvanya Yehova txibarene wahimudheelana okubanya vaddiddi, weyo kunrumeela?
Adamu na Eva aahikaana ana enjene ana alobwana na ana ayana. Mubaaleliwe mwana wawa woroma, awene anvahile nzina na Kaini. Mwana wawa wanawili anvahile nzina na Abeli. Txini yaapadduweli awene? Weyo onoziwa?
Wita 3:16-23; 4:1, 2; Ovuhulela 21:3, 4.