NIPADDUWO 4
Awene Ayelelelini Mudhi Wawa
KOONA empadduwa ovanene. Adamu na Eva anothamagihiwa mmunddani wokoddela wa Edeni. Weyo onoziwa sabwaya?
Sabwani awene aahikosa elobo yabure vaddiddi. Noona Yehova onowasothotha. Weyo onoziwa elobo gani yabure yakosile Adamu na Eva?
Awene aakosile elobo yapangiwani na Mulugu wila ahikose. Mulugu wahapanga oja misapo dha miri dha mmunddani. Mbwenye dha muri mmodha, Mulugu walogile wila ahije misapodha, awene kooja agahikwa. Iyene wahikoya muri obule wila okale waye bahi. Vina ninoziwa wila jabure othukula elobo ya muthu mwina, kaninziwa? Kito, txini yapadduwile?
Siku nimodha Eva bali yeka mmunddani, nowa yahiloga na iyene. Katanaalela eji! Nowa ejile yahimpanga Eva oja musapo wa muri obule wapangiwani na Mulugu wila ahije. Mbwenye, Yehova mwakoseliye nowa iyene kaakosile na ewodhelo ya ologa. Noona eji podi otapulela bahi wila wahikala muthu waalogihile nowa ejile. Wali ani?
Kaali Adamu. Agaakalile muthu mmodha mwa athu abale aakosiwe na Yehova wale vaddiddi ahinathi okosa elabo ya vati. Athu aba awene angelo, nanda iyo kaninwodha wawoona. Mungelo oddu mmodha wahisadduwa bakala namavithukulela vaddiddi. Iyene wahiroma wubuwela wila onofanyeela okala mulamuleli ninga Mulugu. Vina wafuna wila athu amwiwelelege iyene othiya omwiwelelaga Yehova. Ddi mungelo oddwene walogihile nowa.
Mungelo oddu wahiwodha omunyengetha Eva. Mwampangeliye wila Eva agahikala ninga Mulugu kooja musapoya, Eva wahikuluvela ejene. Noona Eva wahija, vina Adamu wahikosa yakakene. Adamu na Eva aahinvanya Mulugu, nanda ji sabwa ya ejene yayelelilelani mudhi wawa mundda wokoddela.
Mbwenye siku nimodha Mulugu onela osasanyedha elabo yotene ya vati ekale yokoddela ninga mundda wa Edeni. Nigamala ninela oziwa koddi weyo okamihedhe dhavi okosa ejene. Mbwenye ovanene, ndoweni niziwe txini yampadduweli Adamu na Eva.
Wita 2:16, 17; 3:1-13, 24; Ovuhulela 12:9.