Otuburu

Weyo dila dhina onorutxiwa wiwelela? Mwene Davidi obuwela dhawene, nona iyene alobela dhahi: Ekani mmurimani mwaga efunelo ya ovirihamo magano enyu. (Masal. 51:12) Davidi wannimukwela Yehova. Masiki dhawene, masaka mena yali yorutxa wiwelela, yakakene enopadduwa na iyo. Sabwaya? Yoroma, iyo nili attu ohiligana vina nibaliwe na ekalelo eji ya okodda wiwelela. Yanawili, Satana onokosa muli-mwetemwene wi iyo nimusadduwele Yehova dhahene ninga ekosiliye. (2 Kor. 11:3) Yaneraru, sabwani nihirugunuwiwa na mukalelo wabure wohiwelela wa elabo eji, “oli muya wabure onalabiha athu animusadduwela Mulugu.” (Ef. 2:2) Vowi Satana vamodha na elabo yaye anokosa muli-mwetemwene wi iyo nikale attu ahiniwelela ninofwanyela okosa muli-mwetemwene wi niwane na mukalelo obu ogadhile onittukulela ottega. Ninokosa ejuwene modhela omwiwelela Yehova vina attu àttomiliye. w23.10 6 ddima 1

Txini ensunzihu na ntikiniho nikosile Yezu na osaddula manje ekala vinyu? Ninosunza ovyeviha waye. Yezu kavittittimihile sabwa ya okosa ntikiniho ntti; mwebaribari, iyene txipo kavittittimihile mwaha wa elobo-elobovi ekosiliye. Ottiya ejo, dila dhotene na ovyeviha iyene wanvaha nttittimiho notene Babe. (Jo. 5:​19, 30; 8:28) Iyo nigamutagiha Yezu modhela okala attu ovyeviha, kaninavittittimihege mwaha wa elobo-elobovi enwodhihu okosa. Efunelo yehu ja onvaha nttittimiho notene Yehova vina otamalela gari eji ya omulabela. (Jer. 9:​23, 24) Nona efunelo yehu ja onvaha nttittimiho notene. Txini egawodhilihu okosa se nikamihedho na Yehova? (1 Kor. 1:​26-31) Iyo nigakala ovyeviha kaninafune ottittimihiwa na dhilobo dhapama dhinakoselihu attu ena. Iyo ninowagalala sabwa ya oziwa wi Yehova onowona vina onottittimiha enkosihu. (Kaladdaniha na Mateu 6:​2-4; Aheb. 13:16) Nigatagiha ovyeviha wa Yezu iyo ninomwagalaliha Yehova.—1 Ped. 5:6. w23.04 4 ddima 9; 5 ddima 11-12

Na nikamihedho na muya wokoddela, murumiwi Paulo ohakokomeza, abali wi eke dhifunelo dha attu ena osogorho wa dhawa. Ninavirihemo dhavi nikokomezo ntti mmatugumanoni? Mwa ohidduwala wila attu ena anofuna ovaha dhowakula dhahene ninga iyo. Weyo ogalogaga makani na akwawo onologa mudhidhi wotene ohattiyaga awene ologa? Nne! Weyo onofuna wila awene vina aloge. Na mukalelo wakakene, mmatugumanoni iyo ninofuna wi abali enjene avahege dhowakula dhawa. Mukalelo mmodha wo walibiha abali ehu bwa wavaha gari yovaha yowakula mmatugumanoni wi onihe nroromelo ninna awene. (1 Kor. 10:24) Enfwanyela iyo okosa, ovaha dhowakula dhohigonela, dhahene attu ena anele okana gari yovaha dhowakula. Masiki akala dhowakula dhawo kadhingonela, kuloge makani otene ali vaddimani. Ogakula dhotene dhili vaddimani attu ena kanakane yowakula. w23.04 22-23 ddima 11-13

Japama wubuwela ttima ya odhowagavi nakamihedhaga attu ena makamaka mmabasani olaleya. Mmabasani olaleya, ninofwanyela oviparhapattela. Iyo ninowafwanya attu anrumela dhilobo dhottiyana-ttiyana, ana monelo na dhilemelelo dhottiyana vina a dhilabo dhottiyana-ttiyana. Murumiwi Paulo wanziwa oviparhapattela, enowodheya iyo osunza na yotagiha yaye. Yezu wahimuttomela Paulo mabasa a walaleya amalabo. (Rom. 11:13) Wi awodhe wakwanihedha mabasa aba, Paulo wanalaleya Ayuda, Agregu, attu asunziletxe, anamalima, attu a mmawani vina amwene. Paulo “[ohiviliganiha] na athu otene” wi awodhe oddiginya mirima dha attu aba. (1 Kor. 9:​19-22) Iyene wafwaseyela wang’ana mweddelo wawa, dhilabo dhidhilani vina esile dharumela anamewa aye. Eji ehimukamihedha Paulo oviparhapattela vina ologa na muttu mmodha-mmodha wi awodhe omukamihedha orumela Nzu na Mulugu. Enowodheya iyo vina wunuwiha ttotto yehu mmabasani olaleya nigaviparhapattela vina nigatanalela pama mukalelo womukamihedha muttu-muttu oninfwanyihu mmabasani olaleya. w23.07 23 ddima 11-12

Okala wokurumuwa kintapulela wi oli muttu wawobana. Akurumuwi attu oliba vaddiddi, enofuneya oliba wi nikale ofwaseyene nigafwanyiwa makattamiho orutxa. Okurumuwa onokosa mpaddi wa “dhinbala muya.” (Gal. 5:​22, 23) Na Egrego nzu ntti okurumuwa nalogiwa na kavalo wa mwini wamalile oshagihiwa. Kavaloya agamala oshagihiwa wakala ofwaseyene. Mbwenyi wandhowavi akalaga olibene. Ki iyo ninawodhe dhavi okala okurumuwa vina olibene? Kaninawodhe okosa ejuwene nooka. Enofuneya olobela nikumbiraga muya wokoddela wi niwodhe okala attu okurumuwa. Dhihikalawo dhotagiha dhinoniha wi enowodheya okala wokurumuwa. Abali na arogora enjene ahikalavi ofwaseyene masiki valigiwani vina yimelelo yawa ehivaha onamoona wapama.—2 Tim. 2:​24, 25 w23.09 15 ddima 3

Modhela wonihiwa, murumiwi Joau wahawona anddimuwa owakwana 24 wirimu amwebedhaga Yehova. Awene animuttittimiha Mulugu alogaga, “munofwanyela othithimihiwa, [vina] orihiwa.” (Ovuh. 4:​10, 11) Angelo ahikana vina mwaha dhinjene dhinattukulela omuttittimiha Yehova. Awene ali wirimu na iyene vina anomuziwa pama. Angelo aba anoziwa mikalelo dha Yehova modhela dhotene dhinkosiye. Awene agonaga dhokosa dha Yehova, anottukuleleya omuttittimiha. (Job 38:​4-7) Iyo vina ninofuna omuttittimiha Yehova mmalobeloni mwehu, nimwaddelaga ennittukulela otikina dhilobo dhinkosiye vina omuriha. Ogamwengesa Bibilia, katamela ononelamo mikalelo dha Yehova dhinuzivela. (Job 37:23; Rom. 11:33) Ogamala omwaddele Yehova sabwaya enziveliwa weyo mikalelo esi. Mukalelo mwina wa omuttittimiha Yehova ku omutamalela mwa dhilobo dhotene dhinnikosela iyene vina dhinakoseliye abalihu ali Akristu.—1 Sam. 2:​1, 2. w23.05 3-4 ddima 6-7

Yaka ya 1919 Babilónia Munddimuwa kawodha osogorhela vina nlogo na Mulugu. Yakene ejo ohittomiwa “mwimeleli wororomeleya vina wamalago” wi akamihedhege attu wedda Dila Yokoddela. (Mt. 24:​45-47; Iza. 35:8) Abale aromile wedda dila eji ahenjedhedha eziwelo yawa mwaha wa Yehova vina efunelo yaye. (Gano 4:18) Awene vina ahikosa matxinjo wila akalegewo mowiwanana na magano a Yehova. Mbwenyi, Yehova kakumbirhile wi nlogo naye nikose matxinjo aba mudhidhi mmodhene. Ottiya ejo, iyene wakoddeliha vang’ono-vang’ono. Musogorho enakale yoziva vaddiddi omwagalaliha Mulugu na dhetedhene dhinakosegihu! Dila eli yotene mudhidhi na mudhidhi enofwanyela okoddelihiwa obe otadhiwa, yakakene jipadduwile na Dila Yokoddela. Oromana yaka ya 1919 dila eji enosasanyedhiwavi mudhidhi na mudhidhi, eji ehikamihedha wi attu owinjiva abudduwe mBabilónia Munddimuwa. w23.05 17 ddima 15; 19 ddima 16

Nikuru Nolamulela ninosasanyedha dhiskola wi ashagihiwe anddimuwa a mmulogoni, anameddelela milogo, abali ansogorhela Filiali, asogorheli o Beteli na abali ena. Awene vina anovilibihedha washagiha abali a miparha dhottiyana-ttiyana dha Nikuru Nolamulela. Akamihedhi aba ahikana muttorho munddimuwa oromana ovanene vina awene ali omala-nawale wi adhowegenavi mabasa a weddiha mabila a Kristu. Omamalelo wa goyi enddimuwa adhari a Yehova anelege odhowavi amulabelaga Yehova. Sabwa ya osogorheliwa na Yezu Kristu, iyo kaninattiye omwebedha Yehova. Ebaribari wi mwari mwa mudhidhi obo iyo ninele olupeliwa na Gog wa Magog—wiwanana wa malogo. (Ezek. 38:​18-20) Mbwenyi olupeliwa oku kunagonele vina onele ovonya; olupeliwa oku kunattabwetxe mpaka onittukulela iyo ottiya omwebedha Yehova. Kaninaganyedha wi Yehova onele onivuna! Muwonihiwani, Joau ohona “muthithi munddimuwa” wa mabila mena a Kristu. Joau vina wahidha wona wi “muthithi munddimuwa” onatonya abale agaviluwile mu goyini enddimuwa. (Ovuh. 7:​9, 14) Ndde, kaninaganyedha wi Yehova onele onivuna! w24.02 5-6 ddima 13-14

Txini enfwanyela iyo okosa wi nakele muya wokoddela? Ninofwanyela okumbirha modhela nlobelo, osunza Nzu na Mulugu, vina otugumana na nlogo nineddihiwa na muya wokoddela. Okosa esene dhinele onikamihedha okana mikalelo “dhimbala muya.” (Gal. 5:​22, 23) Mulugu onavaha muya waye wokoddela abale ana mubuwelo wotxena vina ankosa dhilobo dhapama. Iyene kananivahe muya waye wokoddela akala iyo ninowubuwela dhilobo dhonyakuwa vina ninokosa dhilobo dhabure. (1 Tes. 4:​7, 8) Iyo ninele odhowavi nakelaga muya wokoddela nigahipwaze mavuhulo. (1 Tes. 5:20) Mazu aba mavuhulo anlogiwa va nlebo ntti antapulela miselu dhinnivaha Yehova modhela muya waye wokoddela, enowiwanana na labo na Yehova vina waddamela wa ogoma wa elabo. Iyo kaninfwanyela wubuwela wi Armagedon kanafiye ovanene. Ottiya ejo, iyo ninojedha odha wa Armagedon mohigonela modhela weddaga vamentoni va Mulugu “n’ekalelo ya athu avilevele iyene.”—2 Ped. 3:​11, 12. w23.06 12 ddima 13-14

Ninga Akristu txini enfwanyelihu okosa akala mohijedheleya mutelefonini mwehu munodha mafoto anlagiha attu bali yovi? Momaguva-mwene ninele orabela wona. Enanikamihedhe okosa ejuwene ja wubuwela wi elobo elitxi yamakamaka ba mandano ehu na Yehova. Masiki akala mafotoya kanlagiha attu bali yovi, anodhaga onittukulela okana mubuwelo wonyakuwa. Ninfwanyelelani orabela wona mafoto aba? Sabwani iyo kaninfuna wubuwela dhilobo dhigadhile onittukulela okosa mararuwo. (Mt. 5:​28, 29) Munddimuwa wa mmulogoni wo Tailândia onkuweliwa David ohiloga: “Miyo ddinovivuzaga: ‘Masiki akala mafotoya txino kanalagiha attu bali yovi, Yehova onele wagalala miyo ddigadidela wona mafotoya abo?’ Ovikosa mavuzo ninga aba enoddikamihedha okosa dhosakula dhapama.” Wova okosa elobo-txilobo enamukubanyihe Yehova enele onikamihedha okosa dhilobo na zelu. Bibilia onloga dhahi, “nipara” na “ononelamo” kumova Mulugu. w23.06 23 ddima 12-13

Nzu tti “mba” ninlogiwa versu eji enaddiwana mmulogoni mwehu. Mu goyini enddimuwa Yehova ohipikirhela wi onele onibarela akala ninodhowavi nimulabelaga iyene vina nakwelaga abali na arogora. Nona ninofwanyela ovilibihedha wunuwiha okwela onihu na abali vina arogora. Ninele ovuneya nigakosa ejuwene! “Siku ninddimuwa na Nabuya [Yehova]” ninele okala norutxa mwa attu otene. (Sof. 1:​14, 15) Nlogo na Yehova vina ninele ofwanyiwa makattamiho. Mbwenyi akala ninovisasanyedha ovanene ninele owodha okala ofwasa vina ninele wakamihedha attu ena. Iyo ninele ovilela makattamiho ananipatte. Abalihu agatabuwaga ninele okosa muli mwetemwene wi nakamihedhe modhela waweddela ttagaraga vina wavaha dhinajombela. Vina akala ninovilibihedha wakwela abalihu na arogora ovanene kinanirutxe watonyihedha okwela musogorho. Yehova onele onittuva na egumi yamukalakala mwilaboni muhinakale dhifoyo vina munadduwaliwe makattamiho otene.—Iza. 65:17. w23.07 7 ddima 16-17

Bibilia onowaloga emeleli ororomeleya a masaka a wale ninga attu anna owodha vina oliba. Mbwenyi dila dhina abale akala ninga oliba masaka mena kavyona dhawene. Motagiha midhidhi dhina Mwene Davidi wanvyona wi ohiliba ninga mwango, mbwenyi midhidhi dhina wangulugudheya. (Masal. 30:7) Oku Sansau wali muttu woliba vaddiddi sabwa ya muya wa Mulugu, masiki dhawene iyene wannonelamo wi se nikamihedho na Mulugu, guru dhaye dhigahittawa, bakala ninga alobwana ena. (Anam. 14:​5, 6; 16:17) Alobwana aba aliba sabwa ya nikamihedho navaha Yehova. Murumiwi Paulo vina wanfuna guru dha Yehova. (2 Kor. 12:​9, 10) Iyene wanwanana makattamiho a egumi. (Gal. 4:​13, 14) Vina masaka mena wela ovilibihedha wi akose dhilobo dhaderetu. (Rom. 7:​18, 19) Midhidhi dhina wannova ejile egadhile ompadduwela. (2 Kor. 1:​8, 9) Masiki dhawene mudhidhi wobana Paulo palibiye. Eji yapadduwa sabwani Yehova waninvaha guru wi awodhe owanana makattamiho aye. w23.10 12 ddima 1-2

Akala dila dhina kunivyonana ttima, kudduwale wi ddi mwinyene Yehova wukukusele mwibaribarini wi osunze mwaha wa iyene. (Jo. 6:44) Iyene onowodha wona mikalelo dhehu dhapama dhihinwodhihu wona nanya vina onoziwa dhili mmirimani mwehu. (2 Map. 6:30) Nona kakuluvela, eji enloga Yehova wi ohikana ttima, ebaribari. (1 Jo. 3:​19, 20) Nihinatti osunza ebaribari, txino ena wa iyo nankosa dhilobo dhinnittukulela ovipwatteliha muladdu napanovi. (1 Ped. 4:3) Oku ena anda amulabelaga Yehova na ororomeleya mwa vyaka dhinjene anowanana vina dhubuwelo dhohifwanyelela. Ki weyo txino dila dhina onowubuwelaga wi Yehova koleveleli? Akala pumwenemo, japama wubuwela wi adhari a Yehova a nsaka na wale ankana dhubuwelo ninga esene. Motagiha, murumiwi Paulo mudhidhi watanaleliye ohiligana waye waviwona ninga muttu ogweliwe ntowa. (Rom. 7:24) Enoziweya wi, Paulo wahitxinuwa dhottega dhaye nomala babatiziwa. Masiki dhawene, Paulo ohiloga wi “mwa arumiwi ddilí mimayámo” vina “muthegi wothabwayámo.”—1 Kor. 15:9; 1 Tim. 1:15. w24.03 27 ddima 5-6

Elobo modha ensunza iyo na dhosakula dhabure dha Mwene Jowás jowi enofuneya wasakula amarho apama annikamihedha okosa dhilobo dhaderetu—amarho animukwela Yehova vina anfuna omwagalaliha. Enowodheya wasakula amarho a yimo dhottiyana-ttiyana. Karoma otanalela, Joyadá wali mwanakalaba mottiyana na marho waye Jowás. Ogatanalelaga amarho awo, karoma ovivuza: ‘Awene anoddikamihedha olibiha mandano aga na Yehova? Anoddilibiha wi ddikalegewo mowiwanana na magano oligana a Mulugu? Anologa mwaha wa Yehova vina ebaribari eli mBibiliani? Anoriha magano a Mulugu? Anloga dhilobo wi addagalalihe, obe noliba murima anoddisisigula ddigavonya?’ (Gano 27:​5, 6, 17) Ebaribariya jiji, akala amarho awo kanimukwela Yehova kili yofuneya wedda na awene. Akala ohikana amarho animukwela Yehova weddege na awene, ba abene anawukamihedhe mudhidhi wotene!—Gano 13:20. w23.09 9-10 ddima 6-7

Dila esi dhotene dhilogile Yehova, iyene ohilabihedha mazu akakene: Miyo ddili Alfa vina Omega. Nzu ntti alfa letra noroma na alfabetu w’Egregu, omega letra nomariha. Valogiliye wi miyo ddili Alfa vina Omega, Yehova ohoniha wi agaroma elobo onopuliha vina onokosa eloboya wi yireye. Vamuttanddile Yehova Adamu na Eva, Iyene ologilena dhahi: Kalanina guru dh’obala, enjivihanani, dhalani mwilaboni, muttongemo. (Wita 1:28) Valogile Yehova efunelo yaye yakala ninga ologile Alfa. Ziza na Adamu na Eva nowiwelela nigakala attu oligana adhala mwilaboni vina basaddula elaboya wi ekale Paraizu, pavenevo vanakwanihedheye efunelo ya Yehova. Mudhidhi obo onapadduwe dhilobo esi, enakale ninga Yehova onologa, Omega. Mmalile Yehova opaddutxa “[elabo] y’odhulo, elabo ya vati na dhetene dhilimo,” iyene ohinivaha nikuluvelo nimodha. Eji enoniha wi efunelo ya Yehova na attu vina elabo ya vati enele wakwanihedheya omagomo wa siku nanotanu nawili.—Wita. 2:​1-3. w23.11 5 ddima 13-14

Oleddo wa ana Izrayel wi eyelele owaniwawa kiyali elobo yovevuwa, oleddo oku ogahittukula myeri minai mbwenyi Yehova agahabarela akuputtaga elobo-txilobo mudilamwa ejuwene egazuzumile wiyelela owaniwawa. Mwa Ayuda ororomeleya agarumelile wiyelela o Izrayel mareliho agakelilani agahikwaranya guru-guruvi egakosilani. Mareliho manddimuwaya agali a omwebedha Yehova mbwenyi mBabilónia awene kana mparha wa omwebedhamo Yehova. Awene vina kana dhibuwa wi amperhekelegevo Yehova mikutto ninga mwarumela Nlamulo na Mizé vina kana makuru a anamakutta wi amperhekelege Yehova mikutto dhoddumeya. Ottiya ejo nlogo na Yehova nali vari va attu ahatanala malamulo a Yehova. Noona Ayuda enjene ororomeleya anunlela wiyelela owaniwawa wi eyelele omwebedha Yehova vina avenyihedhe webedha webaribari. w23.05 14-15 ddima 3-4

Akala ninofunavi weddaga ninga “ana a muwariyani” ninele ofuna nikamihedho na muya wokoddela. Sabwaya jani? Sabwani enorutxa vaddiddi muttu odhowavi akanaga mweddelo wokoddela mwilaboni ejino. (1 Tes. 4:​3-5, 7, 8) Muya wokoddela onele onikamihedha owanana mubuwelo wa mwilaboni, ontaganyiheya na filozofia vina dhubuwelo dhihiniwanana na ejile enubuwela Yehova. Muya wokoddela onele onikamihedha okala attu ofewa murima, okana yeddelo yoligana vina yebaribari. (Ef. 5:9) Marhe mena a wakela muya wokoddela, olobela. Yezu ohiloga wi Yehova onowavaha muya wokoddela abale animuloba. (Lk. 11:13) Ottiya ejo nigakala mumodhani mmatugumanoni nimuttittimihaga Yehova ninowakela muya wokoddela. (Ef. 5:​19, 20) Weddihiwa na muya wokoddela onele onikamihedha odhowavi nilagihaga mikalelo dhinimwagalaliha Mulugu. w24.03 23-24 ddima 13-15

Weyo onolagihaga ovilela? Olobele venjene okumbirhaga ovilela. Ovilela mukalelo mmodha onkosa mpaddi wa dhobala dha muya. (Gal. 5:​22, 23) Nona, kalobela okumbirhaga muya wokoddela vina kamulobe Yehova wi owodhe wunuwiha mukalelo obu. Nigagumanana makattamiho aneha ovilela wehu nididele okumbirha muya wokoddela wi onikamihedhe okala attu ovilela. (Lk. 11:13) Nimukumbirhe vina Yehova wi nonege makaniya dhahene ninga munonela iyene. Nigamala olobela, enofuneya ovilibihedha venjene olagihaga ovilela siku na siku. Nigadidela olobela wi nikale attu ovilela vina nigavilibihedha olagiha mukalelo obu, Yehova onele onikamihedha masiki akala wale kanalagiha ovilela. Eji enowukamihedha otanalela dhotagiha dhinfwanyeya mBibiliani. Mbibiliani munofwanyeya dhotagiha dhinjidhene dha attu alagihile ovilela. Nigatanalela dhotagiha esi, ninele osunza mukalelo wa olagiha ovilela. w23.08 22 ddima 10-11

Yezu wahimukuluveliha murumiwi Pedro wi Yehova agahizuzumela dhojombeliwa dhaye. Mmaleliye ovenyihiwa mukwani Yezu wahikosa wili matikiniho wi Pedro na anamafwara ena awodhe ottadda oba dhinjene. (Jo. 21:​4-6) Kavali waganyedha, ntikiniho ntti nihimukosiha Pedro ononelamo wi kinimurutxa Yehova onvaha dhilobo dhotene dhomaningoni dhafuniye. Txino Pedro wahubuwela mazu alogile Yezu wi Yehova agahimuzuzumela muttu agekile Omwene vamburoni voroma. (Mt. 6:33) Dhetedhene esi dhihimukamihedha Pedro wika mabasa a olaleya vamburoni voroma mwigumini mwaye, ottiya mabasa a ottadda. Iyene na oliba murima ohilaleya labo na Pentekoste wa 33 N.K, vina ohakamihedha attu matxikwi na matxikwi orumela miselu dhapama. (Mer. 2:​14, 37-41) Vasogorhova iyene ohakamihedha Asamariya na Amalabo okala anamafwara a Kristu. (Mer. 8:​14-17; 10:​44-48) Se waganyedha Yehova ohimulabihedha Pedro na mukalelo wotikiniha wi akamihedhe attu ottiyana-ttiyana ovolowa mmulogoni. w23.09 20 ddima 1; 23 ddima 11

Vyaka bili mmalile akadda Babilónia omutolotxa Jeruzalemi, Mwene Nabukodonosor ohiroha engamuttu yamudhugudhile. Iyene wahigana wapa aziwitxi otene otaganyiha na Daniyel, awene kohiwodha ologa yarohiliye vina yatapulela yorohaya. (Dan. 2:​3-5) Momaguva Daniyel wahikosavo elobo, kohikosa ejuwene attu enjene agahipiwa. Iyene “ompigiriyela wi ajyedhe mudhidhi muñgonovi, ngamala amutapulele dhirohileye.” (Dan. 2:16) Eji ekosile Daniyel ehilagiha wi iyene wali muttu woliba murima vina wa nroromelo. Dhavi? Kuli elobo mBibiliani enoniha wi Daniyel wahiromaga otapulela dhoroha mundduni. Iyene ohaloba akwaye “omuloba Mulugu w’odhulu, akamyedhe onona yoviteya erohile mwene.” (Dan. 2:18) Yehova wahakula nlobelo na Daniyel. Na nikamihedho na Mulugu, Daniyel wahiwodha otapulela yoroha ya Nabukodonosor. Daniyel na akwaye ahivuneya. w23.08 3 ddima 4

Katanalela dhopurelamo dhinkanihu nigakala attu ovilela. Ovilela ononikamihedha okana wagalala vina ofwaseya. Okana egumi ya deretu vina dhubuwelo dhapama. Nigavilelaga attu ena, ninokana mandano apama na awene. Ninokana wiwanana mmulogoni. Muttu mwina aganiliga, kaninamaguvele osilidhiwa vina kaninatamele ottabwiha makaniya. (Masal. 37:8; Gano 14:29) Ottiya esi dhetene, nigakala attu ovilela ninomutagiha Babi wehu wa wirimu vina ninele okala ofiyedheya na iyene. Ovilela mukalelo wapama, onnipuriha iyo notene! Masiki akala ninorutxiwa olagiha ovilela na nikamihedho na Yehova, ninele owodha wunuwiha mukalelo obu. Oku nijedhelaga ofiya wa elabo eswa, nikane nikuluvelo wi Yehova onowawang’ana attu animova, abale anjedhela okwela waye. (Masal. 33:18) Notene nivilibihedhe odhowavi nivilelaga. w23.08 22 ddima 7; 25 ddima 16-17

Tiago ohiloga wi mulobwana ole wanloga wi ohikana nroromelo mbwenyi dhakosiye kadhewanana na dhalogiye. (Tia. 2:​1-5, 9) Tiago onomuloga muttu onimona mbali obe murogora ohina yowabala obe yoja, mbwenyi iyene kankosa elo wi amukamihedhe. Masiki iyene alogaga wi ddihikana nroromelo, dhologa dhaye kadhalagiha wi okana nroromelo. (Tia. 2:​14-16) Tiago wahiloga wi Rahabe wali muttu wana nrorormelo. (Tia. 2:​25, 26) Raabe wahiwa mwaha wa Yehova vina wanziwa wi iyene wannakamihedha ana Izrayel. (Jos. 2:​9-11) Nona iyene ohilagiha nroromelo naye modhela merelo—àbarelaga anamabeddegela eli ali vang’ovini. Nona muyana oddu wohiligana vina wahali wa nlogo na Izrayel, ohidha wiriwa muligani dhahene ninga yiriwe Abrahamu muligani. Yotagiha ya Raabe enonisunziha wi nroromelo nehu ninofwanyela wiwanana na merelo. w23.12 5-6 ddima 12-13

Ninga Akristu, kaninfuna osunza bahi masunziho oroma a Bibilia. Na nikamihedho na muya wokoddela wa Yehova, iyo ninofiyedha oziwa “mobuwelo oviteya a Mulugu.” (1 Kor. 2:​9, 10) Onkoddelani okosa masasanyedho a nsunzo nomwinya wi odhowegevi bugakala ofiyedheya na Yehova? Motagiha, kapepesa wi oziwe mukalelo walagihile Yehova okwela emeleli aye a masaka a mundduni vina mukalelo enoniha ejoya wi iyene vina onowukwela. Enowodheya weyo vina opepesa mukalelo wosasanyedheya webedhiwa Yehova nsaka na ana Izrayel vina mukalelo onfuna Yehova wi ebedhiwe masaka abano. Obe kasunza mavuhulo akwanihedhile Yezu nsaka naliye velaboni ya vati. Ogafunaga opepesa kalabihedha Índice das Publicações da Torre de Vigia obe Guia de Pesquisa para Testemunhas de Jeová. Onele wona wi olabihedha dhipano esi enele wukamihedha oziveliwana venjene nsunzo nawo, okosa nsunzo notibeleya ninga ntti enele wukamihedha olibiha nroromelo nawo vina ofwanya eziwelo ya Mulugu.—Gano 2:​4, 5. w23.10 18-19 ddima 3-5

Ndoweni ninonelemo pama mazu aba alogile murumiwi Pedro. Epaddi yoroma ya versu 8 enloga mukalelo wa okwela onfwanyelihu okana—wunuwiha okwela. Nzu ntti nilabihedhi Pedro nintapulela “oweta.” Epaddi ya nawili ya versu eji enloga ejile enfwanyelihu okosa nigakana okwela oku. Onele okunela obe olevelela dhottega dha abalihu. Nitanaleleni dhahi: Nittiddele okwela wehu na mada meli, ninga nittiddelile guwo niwetela oku-noku ofiyedha okunela ottiya yottega modha, dhottega bili, mbwenyi “dhothega dhinjene.” “Okunela” egali ninga olevelela. Na mukalelo wakene onvita guwo maleba obe ohiligana, okwela wehu onokunela dhawobana vina ohiligana wa abalihu. Ninofwanyela wakwela venjene abalihu wi niwodhe walevelela—masiki masaka mena ekalaga yorutxa vaddiddi. (Kol 3:13) Nigalevelela ena ninowoniha wi nihikana okwela onddimuwa vina ninofuna omwagalaliha Yehova. w23.11 11-12 ddima 13-15

Mwene Josiya bana vyaka 26 wahiroma osasanyiha dhilobo dhamalile onongeya mumparhani. Dhisasanyedhiwaga dhilobodha nihifwanyiwa, “nivuru na Malamulo a Nabuya, nalebile Mizé.” Mwene mmaleliye wiwa dhalebiwe munivurunimwa, mohigonela wahikosa matxinjo wi awodhe wiwelela dhaloga nivuruna. (2 Map. 34:​14, 19-21) Weyo onosiveliwa omwengesa Bibilia malabo otene? Akala jijuwene, wengesawa onedda dhavi? Onofwanyaga maversu a Bibilia anawodhe wukamihedha? Josiya vakwanihedhiye vyaka 39, wahikosa yovonya emuttukuleli okwa. Ottiya ofwara malago a Yehova iyene wahisakula ovikuluvela. (2 Map. 35:​20-25) Eji ennisunziha nni? Kintanala yimo ena iyo obe vyaka dhivirile nimulabelaga Yehova, enofuneya odhowavi nimukuluvelaga iyene. Wi ejo ewodheye enofuneya omulobelelaga Yehova mudhidhi wotene wi anisogorhele, omusunza Bibilia vina ofwara malago annivaha Akristu owarala mpaddi womuyani. Dhahene ninele orabela okosa dhovonya dhinjene vina ninele odhowavi nikanaga wagalala.—Tia. 1:25. w23.09 12 ddima 15-16

Bibilia onologa mwaha wa ayana enjene oliba murima, àmukwela Yehova vina amulabela. Awene ali “a malago” vina “ororomeleya mwa dhetedhene.” (1 Tim. 3:11) Mbwenyi masaka abano dhihikalawo dhotagiha dhinjene dha arogora owarala esuwene dhinawodhe anamwali otagiha. Anamwali, kavilibihedheni ofwara yotagiha ya arogora owarala vina osunza na yotagiha yawa. Wang’ane mikalelo dhawa; vasogorhova otanalelege mukalelo onawodhiwe otagiha. Mukalelo wamakamaka onfwanyela okana Mukristu oviyeviha. Muyana agakala woviyeviha, onele okana mandano oliba vaddiddi na Yehova vina na attu ena. Motagiha, muyana onimukwela Yehova vina oli woviyeviha onosakula wiwelela gano enloga wi muyana amwiwelelege mamune. (1 Kor. 11:3) Gano eji enowaloga abale asakuliwe na Yehova wi azuzumele mulogo vina murala. w23.12 18-19 ddima 3-5

Yehova onfuna wi omukwele mwadhiyo vina omuzuzumele mpaddi w’omaningoni wa muyubuweloni vina w’omuyani. Okana mikalelo dhapama, wariha ayana vina okala muttu wokuluveleya dhinele wukamihedha okala mamuni waderetu. Ogamala otela, txino onele okala babi. Txini ensunziwe na Yehova sabwa ya okala babi wapama? (Ef. 6:4) Yehova kakana manyazo a omwaddela Mwanaye Yezu wi wanimukwela vina wanimurumela. (Mt. 3:17) Ogadha okala babi, kudduwale omukuluveliha mwanawo mudhidhi wotene wi onomukwela. Agakosa dhilobo dhapama kamutamalele. Ababi anfwara yotagiha ya Yehova, anowakamihedha aniwa okala Akristu owarala. Enowodheya ovisasanyedha oromana ovanene wi okale babi waderetu modhela waweddiha na oderetu amudhawo vina abali a mmulogoni, ononihe ejuwene ogalagiha wi onowakwela vina onoziveliwa na awene.—Jo. 15:9. w23.12 28-29 ddima 17-18

Ninga adhari ororomeleya a Yehova, ninopattiwa makattamiho vina dhiredda dhinapatta attu otene. Ninopadduweliwa ofwarafwariwa vina osadduweliwa na abale anidda nlogo na Mulugu. Masiki Yehova ahinibarelaga mmakattamihoni aba, iyene opikirhela onikamihedha. (Iza. 41:10) Na nikamihedho naye, ninowodha okanavi wagalala, okosa dhosakula dhapama, vina okalavi oweddeyana na iyene masiki midhidhi dhorutxa dha mwigumini mwehu. Yehova opikirhela onivaha ejile enkuwela Bibilia “murenddele wa Mulugu.” (Fil. 4:​6, 7) Murenddele obu onaddiwana ofwasa wa muyubuweloni vina wa mmurimani onda sabwa ya okana mandano ofiyedheya na iyene. Murenddeleya obu onopitta “thontho ya muthu”; elobo yapama vaddiddi ehinwodhihu wubuwela. Wahiromaga omulobelela Yehova na murima wotene omamalelowa bukala wofwaseyene obe wottugareya? Eji “murenddele wa Mulugu.” w24.01 20 ddima 2; 21 ddima 4

Etene animukwela Yehova anofuna omutamala na murima wawa wotene. Davidi ohinonelamo wi otamala nzina na Yehova yakala ninga omutamala mwinyene Yehova. Nzina na Yehova ninowiwanana na omuttu waye, nona eji enonubutxedha mikalelo dhaye dhokoddela vina dhilobo dhapama dhinkosiye. Davidi wanfuna okoddeliha vina otamala nzina na Yehova. Iyene wanfuna okosa ejuwene na omuttu waye wotene—kuloga, na murima waye wotene. Na mukalelo wakakene, Alevita ansogorhela mabasa a omutamala Yehova. Na oviyeviha awene anziwa wi na mazu awa txipo kàwodhe olagiha ntamalelo ninfwanyela nzina nokoddela na Yehova. (Neh. 9:5) Kavali waganyedha wi oviyeviha wawa ohimwagalaliha Yehova. w24.02 9 ddima 6

Txipo kuwubuwele wi Yehova onuwona ninga muttu wowobana. (2 Kor. 8:12) Kasunza na dhorutxa dhigumaniliwena. Kobuwela dhilobo dhimalile weyo wakwanihedha. Bibilia onologa “Mulugu ddoligana kandduwala mabasinyu.” (Aheb. 6:10) Kakosa yakakene, kudduwale dhogana dhotene dhimalile weyo wakwanihedha. Motagiha, okana mandano na Yehova—wawaddela attu ena mwaha wa iyene vina obatiziwa. Dhawene ninga muwodhiliwe wakwaniha dhogana dhawo mundduni, onele owodha wakwaniha dhogana dhina weyo ovanene. Na nikamihedho na Yehova, enowodheya wakwaniha dhogana dhawo. Venevo vandowa weyo ovilibihedhaga wakwaniha yogana yawo, kágalala sabwa ya omona Yehova arurihaga ovilibihedha wawo. (2 Kor. 4:7) Weyo ogahiyelele mundduni onele wakela maruriho menjene.—Gal. 6:9. w23.05 31 ddima 16-18

Yehova onotamela marhe awoniha wi onowakwela alabeli aye vina onowagalala venjene na mabasa ankosani. Bibilia onologa dila bili dhilogile Yehova na Mwanaye wi wanimukwela, vina wannimurumela. (Mt. 3:17; 17:5) Weyo ogahiziveliwa Yehova kowulogela mazu akakene? Masaka abano Yehova kanloga na attu kove-na-kove, onloga na iyo alabihedhaga Nzu naye, Bibilia. Ninowodha wiwa mazu a Yehova anlagiha onirumela waye nigengesaga mazu a Yezu anfanyeya Mmittakani. Yezu otagiha mowakwana-mwene ekalelo eli Babe. Nona nigengesaga mazu okwela alogele Yezu attu ohiligana, ninowodha omutanalela Yehova anilogelaga iyo mazu aba. (Jo. 15:​9, 15) Nigapattiwa makattamiho kintapulela wi Yehova oninyanyala. Ottiya ejo, eji enele onivaha gari ya woniha wi ninomukwela Yehova vina ninomukuluvela.—Tia. 1:12. w24.03 28 ddima 10-11