Needdihaga Masunzo a Bibilia Andowa Vasogorho
1. Mabasa gani ana anamalaleya aneeddiha masunzo a Bibilia?
1 Kavo onwodha omulabela Mulugu “ahikwekwettiwe” na Yehova. (Joau 6:44) Masiki dhawene, anamalaleya aneeddiha masunzo a Bibilia anofanyeela okosa epaddi yawa mwa wakamihedha attu eena awodhe omwaddamela Babi wawa wodhulu (Tia. 4:8). Ejoya enofanyeela ovisasanyedha. Wengesa kadda ddima vina okosa nivuzo nilebiwe bahi kahiyo yamakamakaya, mbwenye nakamihedhe anamasunza ehu ottiddeela miseludha wi onuwe omuyani.
2. Txini enlagiha wi namasunza wa Bibilia onodhowa vasogorho?
2 Wi anamalaleya eeddihege nsunzo naderetu aweneya anofanyeela wakamihedha anamasunzaya mwa (1) ononelamo ensunziha Bibilia, (2) orumeela ensunziha Bibilia vina (3) ottiddihedha mabasa ensunziha Bibilia. (Joau 3:16; 17:3; Tia. 2:26) Onofuneya mudhidhi mwinjene wi nimukamihedhe muttuya wi avirihemo ttarhodha. Masiki dhawene kadda ttarho entapulela olibiha mandano a muttuya na Yehova vina enomukamihedha muttuya operheka egumi yaye wa Yehova.
3. Anamasunziha aderetu ankoselani mavuzo afarihedhaga moonelo wa namasunzaya?
3 Txini enubuwela namasunza wa Bibilia?: Vowi nizinddiyele akala namasunzehuya onononelamo vina onorumeela esile dhinsunziye, karabela ologetxa vina omuttiye wi namasunzaya aloge dhinsunziye. (Tia. 1:19) Iyene onononelamo enloga Bibilia modheela makaniya ansunzinyu? Iyeneya onowodha otapulela makaniya ansunziwa na mazu aye? Kito iyeneya onoonamo dhavi modheela dhisunziliye? Onorumeela wi ensunziha Bibilia ebaribari? (1 Tes. 2:13) Onononelamo wi dhinsunziye dhinottiyana na mukalelo onkaliye? (Kol. 3:10) Wi nikaane yowakula ya mavuzoya, ninofanyeela onvuza na okurumuwa monelo waye modhela enubuwela iyene mwaha wa mavuzoya, nigamala ninvuruwane.—Mt. 16:13-16.
4. Txini enfanyeela okosiwa akala namasunzaya onokaanavi makattamiho a ottiddihedha mabasa esile dhinsunziye mBibiliani?
4 Masaka menjene dhilemelelo na dhubuwelo dhabure dhawale dhinokakamela vina dhinorutxa vaddiddi odduwalawa. (2 Kor. 10:5) Kito ninaloge dhavi akala namasunza kanrumeela obe kanttiddihedha mabasa dhinsunziye? Ninofanyeela okurumuwa wi nimuttiyedhe mudhidhi wowooneya wi Mazu a Mulugu vamodha na muya wotxena ottidde mabasa mmurimani mwa namasunzaya. (1 Kor. 3:6, 7; Aheb. 4:12) Ottiya omudidela, dila dhina jamakamaka odhowela mutoma mwina akala namasunzaya onokaanavi makattamiho a ononelamo vina ottiddihedha mabasa masunziho a Bibilia. Mudhidhi ondowihu banigamusunziha na okurumuwa vina na okwela mwaha wa Bibilia, txino iyene onele okosa masadduwo ofanyeelela.