NSUNZO 42
Weddiha Nsunzo na Bibilia Ninimuttukulela Namasunza Obatiziwa—Mpaddi Wanewili
“Vyañgane wamwinya, vina dhinsunzihewe, kalelá ntidi esidhá.”—1 TIM. 4:16.
JIBO 77 Txeza Emoneye Mwilaboni
DHINASUNZE IYOa
1. Ninziwa dhavi wi mabasa a wakosa anamafwara, mabasa a ovuna?
MABASA a wakosa anamafwara mabasa a ovuna dhigumi! Iyo ninziwa dhavi ejiya? Yezu alamulaga mazu ali va Mateu 28:19, 20, ohiloga dhahi: “Dhowani, . . . mwasunzihe athu a malogo otene . . . , mwabatize”. Txini enziwehu mwaha wa ttima ya obatiziwa? Obatiziwa ttarho enfwanyela olupela abale antamela ovulumutxiwa. Abale anfuna obatiziwa anofwanyela ororomela wi ovulumutxiwa onawodheye mwaha wa Yezu okwa wi akuttele mukutto dhigumi dhehu, vina anofwanyela orumela wi iyene ohivenyihiwa mukwani. Nona murumiwi Pedro awaddela Akristu mazu awi: “Obatizoyá onouvulumutxani na guru dha Kristu ovenyile múkwani.” (1 Ped. 3:21) Jijene enlogeliwani wi akala namafwara muswa onobatiziwa, iyene onttukula dila ya wuvulumutxiwani.
2. 2 Timóteo 4:1, 2 onnivaha malago a iyo okala anamasunziha a ekalelo gani?
2 Wi nakose anamafwara, ninofwanyela okana ‘oyesa wa osunziha.’ (Kengesa 2 Timóteo 4:1, 2.) Ninlogela nni dhawene? Sabwa ya nlamulo na Yezu, nawi: ‘Dhowani, . . . mwasunzihe attu a malogo otene . . . , akale anamafwara aga.’ Murumiwi Paulo bela, “kalelá ntidi” mabasa aba, dhawene “onovivuna weyo, vina na abale anuvuruwana.” Paulo vina wahikana mwaha munddimuwa omuttukulele ologa mazu awi: “Vyañgane wamwinya, vina dhinsunzihewe . . . ” (1 Tim. 4:16) Vowi osunziha wehu mabasa akakene a wakosa anamafwara, jofuneya masunziho ehu okala aderetu vaddiddi.
3. Mwari mwa mutoma obu, txini dhinasunzehu mwaha wa weddiha nsunzo na Bibilia?
3 Mudhidhi wetene iyo ninowasunziha attu matxikwi na matxikwi muselu wa ebaribari onfwanyeya mBibiliani. Mbwenye ninga monilehu mwari mwa mutoma ovirile, enowodheya iyo wakamihedha enjiya mwa awene ofiyedha obatiziwa badha okala anamafwara a Yezu Kristu. Mwari mwa mutoma obu iyo ninele osunza dhilobo tanu dhinfwanyela okosa namasunziha wi amukamihedhe namasunza waye olupela ttarho ya obatiziwa.
OMUTTIYE WI BIBILIA ASUNZIHE
Kamukumbirhe namasunziha wa Bibilia wa ttotto wi aukamihedhe okana ewodhelo enddimuwa ya omusunziha Bibilia (Kang’ana ddima 4-6)f
4. Namasunziha onfwanyelela nni ovipimelela ageddihaga nsunzo na Bibilia? (Kang’ana vina yawenjedhedha.)
4 Iyo ninoziveliwa vaddiddi osunziha Mazu a Mulugu. Nona ninodha ottukuleleya ofuna ologa venjene mwaha wa esile dhinziveliwihu. Mbwenye, masiki nigeeddihaga Nsunzo na Mwang’aneli, peno Nsunzo na Bibilia na Vamuralani, namasunzihaya kanfwanyela ologa mudhidhi mwinjene. Namasunziha onofwanyela ovipimelela wi amuttiye Bibilia asunzihe, kalogetxe venjene mwaha wa dhotedhene dhinziwiye dha muselu wa mBibiliani onsunzani.b (Jo. 16:12) Kaladdaniha muziwelo onimuziwiwena Bibilia ovanene na muziwelo waniwe wale. Kinaganyedheya wi wale weyo waromile ononelamo masunziho mang’onoya. (Aheb. 6:1) Dhihivira vyaka dhinjene ofiyedha weyo osunza dhinziwiwe ovanene, nona kutamele omusunziha namasunza wawo dhotedhene labo nimodhene.
5. (a) Mowiwanana na 1 Tesalónika 2:13, txini enfunihu wi namasunza anonelemo munsunzoni naye na Bibilia? (b) Vina txini enfwanyelihu okosa wi namasunza wehu awodhege ologa esile dhinsunziye?
5 Iyo ninfuna wi namasunza wehu anonelemo wi dhinsunziye sa Mazu a Mulugu. (Kengesa 1 Tesalónika 2:13.) Ninakose dhavi ejuwoya? Omulibihe namasunza ologaga mwaha wa dhinsunziye. Ottiya omutapulelagavi mudhidhi wetene malebo a Bibilia, kamukumbirhe wi iyene awutapulele enoneliyemo. Kamukamihedhe namasunza wawo ozinddiyela mpattelo ompatta mazu a Mulugu mwigumini mwaye. Kamukose mavuzo anamuwodhihe iyene ologa esile dhili mmirimani mwaye, esuwene dhiniwanana na nlebo nengesilenyu. (Lk. 10:25-28) Ninga motagiha, kamvuze dhahi: “Nlebo ntti nukamihedhile dhavi wona ekalelo ya Yehova?” “Ebaribari eji ya Bibilia enupurelamo eni?” “Ononamo dhavi mwaha wa esi dhimaliwe osunza?” (Gano 20:5) Iyo kaninfunyetxa wi namasunzaya aziwe venjene, enfunetxihu ja iyene okwela esile dhinsunziye vina ovirihamo esile dhinziwiye.
6. Ekalele nni yofuneya omuttukulela omasunzoni wehu namalaleya wa wale ona ttotto ya osunziha?
6 Ogadhowaga onsunzoni nawo na Bibilia onomuttukulaga namalaleya wa ttotto oromile olaleya walene? Akala onokosaga, omvuzege malago anfwanyeliwe ovirihamo ogakosaga nsunzo nawo na Bibilia vina omukumbire wi awuziwihe txini enfwanyeliwe okosa wi omuttiye Bibilia asunzihe. Ogakosa dhawene onela oziwa wi ohiroma winjiviha ewodhelo yawo ya osunziha. (Kaladdaniha na Merelo 18:24-26.) Omvuze vina namalaleyaya, akala namasunzaya onowodha wika mmirimani dhinsunzihiwiye. Ogafuna, kamukumbirhe namalaleyaya wi eddihe nsunzo nawo na Bibilia akala weyo onovenyavo mwari mwa sumana dhing’onovi. Eji enale odhowihavi nsunzona vasogorho vina enele omoniha namasunza wawo ttima ya osunza. Txipo kuwubuwele wi nsunzona “ttawo”, kawo mwina onfwanyela osunziha. Enfuniwe ja namasunzaya odhowanavi vasogorho masunzo aye a ebaribari; kahiye mwenemo?
OSUNZIHA NA OGALAMUWA VINA NA NIKULUVELO
Kaloga dhopadduwa dha mwigumini mwa abaali ena dhinamukamihedhe namasunza wawo wona wi agavirihamo magano a Bibilia onela opurelamo (Kang’ana ddima 7-9)g
7. Txini enamuttukulele namasunza otxinjerhela dhinsunziye?
7 Namasunza onofuna woona ogalamuwa wawo vina okuluvela wawo ebaribari enfwanyela mBibiliani. (1 Tes. 1:5) Dhawene iyene onele otxenjerhela esile dhinsunziye. Ogona wi jofuneya, kaloga nikamihedho nuvahile Bibilia mwaha wa weyo weddana maganoya. Venevo iyene onela ozinddiyela wi Bibilia ohikana malago na masunzihoya anawodhe omukamihedha iyene vina.
8. Txini enfwanyeliwe okosa wi wenjedhe masunziho awo a Bibilia, vina ekalele nni yofuneya okosa dhawene?
8 Mwari mwa nsunzo nenyu na Bibilia kamwaddele namasunza wawo dhapaduwele abale afwanyiwe makattamiho dhahene ninga abo aninfwanya namasunza wawo. Ogafuna, onofwanyela omuttukula namalaleya wa mmulogoni ona yotagiha egadhile omulibiha namasunza wawo. Vina enowodheya weyo ofwanya dhotagiha dholibiha dhili mu jw.org mpaddi wa “A Bíblia Muda Vidas.”c Mitoma dhinfwanyeya mwari mwa dhipaddi esi dhinela omukamihedha namasunza wawo ononelamo wi jamalago ovirihamo magano a Bibilia mwigumini mwaye.
9. Onawodhe dhavi omulibiha namasuna wawo wi awodhege ologa na amudhaye vina na akwaye esile dhinsunziye?
9 Akala namasunzaya ohitela obe ohiteliwa, mwadhiye obe mamune vina onomusunza Bibilia? Akala kanimusunza, kamukumbirhe wi adhe asunze vamodha na nyuwo. Omulibihe namasunza wawo wi alogege na amudhaye vina amarho aye esile dhinsunziye. (Jo. 1:40-45) Onakose dhavi? Karoma omukosa nivuzo ninga ntti: “Onawodhe dhavi wawaddela ebaribari eji amudhawo?” obe “Nlebo gani nigalogilewi wi wazinddiyelihena ebaribari eji amarho awo?” Dhahene ogela omuswagiha namasunza wawo na ewodhelo ya okala namasunziha. Vasogorhova, akala iyene onorumeliwa olaleya, onela okala namalaleya wa ewodhelo. Vina omvuzege namasunza wawo akala onomuziwa muttu mwina ogaziveliwe omusunza Bibilia. Akala iyene onomuziwa, kamukuwelihe muttuya vina omulagihe marhe a osunza, namasunza wawo bali venevo. Kamulagihe vidiyu Txini Enkosiwa va Nsunzoni na Bibilia?d
OMVAHA NAMASUNZA MASWAGIHO A WATAMELA AMARHO MMULOGONI
Kamvahe namasunza wawo maswagiho a watamela amarho mmulogoni (Kang’ana ddima 10-11)h
10. Ninga mulogeliwani va 1 Tesalónika 2:7, 8, namasunziha onawodhe dhavi otagiha merelo a Paulo?
10 Namasunziha onofwanyela wazuzumela venjene anamasunza aye. Awonege ninga abale anakale abaale obe arogoriye omuyani a musogorho. (Kengesa 1 Tesalónika 2:7, 8.) Enowarutxa vaddiddi awene wannyanyala amarho awa a mwilaboni, badha osaddulela egumi yawa ofiyedha omulaba Yehova. Enofuneya iyo wakamihedha awene okana amarho ebaribari mmulogoni. Katamelaga mudhidhi wa okala obe waredha na namasunza wawo, kukalege na iyene mudhidhivi wa masunzo bahi. Ogamukuwela na muttitti, ogamperhengezela muselu obe ogadhowa omona mwari mwa mudhidhi mung’onovi, onowoniha wi onomuzuzumela.
11. Txini enfunihu wi anamasunza ehu afwanye mmulogoni, vina sabwaya jani?
11 Ohikalawo musibo onlogiwa dhahi: “Omulela mwana orutxa.” Musibo obu iyo ninsaddulela dhahi: “Wattukulela anamafwara mmulogoni orutxa.” Nona anamasunziha a Bibilia a ttotto anowalagiha anamasunza awa attu a mmulogoni, anna ekalelo yofwanyela osunziwa. Venevo namasunza onoroma ovitaganyiha na nlogo na Mulugu, ninamuwodhihe wakela posso nomuyani vina nikamihedho na dhozuzumiha dha egumi. Iyo ninfuna anamasunza ehu aye mmulogoni mwehu vina avonege ninga anamudhi ehu. Iyo ninfuna wi awene akale mumodhani na abalihu Okristu anna ekalelo ya okwela vina antanalana, ali orugunuwa elabo yotene. Dhawene iyene onele owodha otxelela ovitaganyiha na attu ahinimukamihedha omukwela Yehova. (Gano 13:20) Akala akwaye a wale anomutxatxama, iyene onoziwa wi onela okana omarho webaribari munikuruni na Yehova.—Mk. 10:29, 30; 1 Ped. 4:4.
OMWADDELA MWAHA WA OVIVELELA NA OBATIZIWA
Vang’ono-vang’ono, namasunza wa Bibilia onottukula ttarho dha obatiziwa! (Kang’ana ddima 12-13)
12. Ninfwanyelela nni ologa na anamasunza ehu mwaha wa ovivelela vina obatiziwa wa Mukristu?
12 Kamwaddele kakamwe namasunza wawo mwaha wa ovivelela vina obatiziwa wa Akristu. Txibarene, efunelo yehu nigasunzihaga attu Bibilia ja awene ottukula ttarho ya obatiziwa, badha okala anamafwara. Agaroma omusunza Bibilia mwari mwa myeri dhing’onovi vina agaroma wona matugumano onumbani ya omwene, anamasunza a Bibilia anononelamo wi enfuneya ja awene okamihedhiwa wi arome omulaba Yehova ninga Anamoona aye.
13. Ttarho gani dhinfwanyela okosa anamasunza wi afiye wubatiziwani?
13 Vang’ono-vang’ono, namasunza wa Bibilia onowodha ofiyedha ttarho ya obatiziwa! Voroma, namasunzaya onodha omuziwa, omukwela vina omuroromela Yehova. (Jo. 3:16; 17:3) Agamala onoroma omaga omarho na iyene vina onoroma ovolowelana na mulogo. (Aheb. 10:24, 25; Tia. 4:8) Vasogorhova iyene onoroma orabela merelo a bure vina onotxinuwa sabwa ya dhawira dhaye dhawale. (Mer. 3:19) Onottukuleleya vina ologa dha nroromelo naye na attu ena. (2 Kor. 4:13) Omamalelowa onomulevela egumi yaye Yehova vina onobatiziwa. (1 Ped. 3:21; 4:2) Onkalaga mureddele munddimuwa vaddiddi mmirimani mwa attu otene! Akala namasunza onodhowavi vasogorho na ttarho dhaye, kaana ekalelo ya omutamalela mwaha wa guru enkosiye vina omulibihe na mazu awi, jofwanyela weddaganavi ekalelo eniye ovanene.
OTAMELA OZIWA WUNUWA WA NAMASUNZAYA
14. Namasunziha onoona dhavi wunuwa wa namasunza?
14 Iyo ninofuniwana okana ekalelo ya ovilela nigamukamihedhaga namasunza ofiyedha ovivelela mpaka obatiziwa. Mbwenye mwa mpaddi mwina, ninofwanyela oziwa akala efunelo yaye ya omulabela Yehova Mulugu enowunuwavi mmirimani mwaye. Onomonana namasunza wawo vizinddiyelo dhawiwelela malamulo a Yezu? Obe enfuna iyene ja osunza dha mBibiliani bahi?
15. Vizinddiyelo gani dha wunuwa wa namasunza dhinfwanyela wona namasunziha?
15 Mudhidhi na mudhidhi opimege wunuwa wa namasunza wawo. Ninga motagiha, iyene onowoniha na murima waye wi onomukwela Yehova? Onologa na iyene munlobeloni? (Masal. 116:1, 2) Onoziveliwa omwengesa Bibilia? (Masal. 119:97) Ohikana elemelelo ya wona matugumano? (Masal. 22:22) Ohiroma osaddulela dha mwigumini mwaye? (Masal. 119:112) Iyene onologa dhinsunziye na amudhaye obe na akwaye? (Masal. 9:1) Enddimuwaya jawi, iyeneya onofuna okala Munamoona wa Yehova? (Masal. 40:8) Akala dhowakula dha mavuzo aba sawi nne, katamela oziwa mwahaya vina ologe na iyene n’ekalelo ya omarho, mbwenye kumvitele ebaribariya.e
16. Txini dhinzinddiyeliha wi nsunzo na Bibilia ninofwanyela ottiyiwa?
16 Weyo onofwanyela opimelela akala onofwanyela odhowaganavi nsunzo nawo na namasunzaya. Karoma ovivuza: ‘Namasunzaya ohikana elemelelo ya osasanyedha nsunzo naye nihinatti ofiya labo na osunza? Iyeneya onojombeliwa efunelo ya wona matugumano? Iyene ohikana dhabure dhihintxeleliye? Onodhowavi okapela waye? Akala dhowakula dha mavuzo aba sawi ndde, odhowagavi bugamusunziha enkala ninga otamela omusunziha muttu wabelela, oku muttuya ahifunaga! Akala namasunza kanriha dhinsunziye nne vina kana efunelo ya ovisaddulela mowiwanana na esile dhinsunziye, nindegelela nni omusunziha?
17. Ninga munlogela 1 Timóteo 4:16, txini enfwanyela okosa anamasunziha otene a Bibilia?
17 Iyo ninottittimiha vaddiddi gari yehu ya wakosa anamafwara, nona ninofuna-wene wakamihedha anamasunza ehu ofiyedha obatiziwa. Jijene enimuttiyedha iyo Bibilia osunziha vina ninovilibihedha osunziha na ogalamuwa vina na nikuluvelo. Iyo ninela wakamihedha anamasunzaya watamela amarho mmulogoni. Ninele wawaddela mwaha wa ovivelela vina obatiziwa; mudhidhi na mudhidhi, nigampima nsunzona wi none wunuwa wa namasunzaya. (Kabgʼana kasha nikuku 13, “Txini Enfwanyela Okosa Namasunziha wi Amukamihedhe Namasunza Ofiyedha Obatiziwa,” nikuku 13) Iyo ninohagalala na mabasa aba a watamela abale anna efunelo ya ovulumutxiwa! Ndoweni nivingele mabasa aba a wasunziha anamasunza a Bibilia ofiyedha obatiziwa.
JIBO 79 Dhowani Mwaasunzihe Attu
a Iyo nigamusunzihaga muttu Bibilia, nihikana gari ya omukamihedha iyene woona mubuwelo gani, merelo gani vina ekalelo gani eninfunana Yehova. Mutoma obu onele oninonihedhamo muwodheyelo wa iyo wunuwiha ttotto yehu ninga anamasunziha.
b Kang’ana muselu onloga “Karabela Mirega esi Ogeddihaga Nsunzo na Bibilia” oli mwari mwa Mabasa na Yeddelo Yehu ya Okristu a Setemburu wa 2016.
c Kadhowa mpaddi wa QUEM SOMOS > EXPERIÊNCIAS.
d Mu jw.org, kadhowa mpaddi wa NILI ANI > MWAHA WA ANAMOONA A YEHOVA.
e Kona muttoma “Omukwela vina Omutamalela Yehova Onele Wuttukulela Obatiziwa” na “Weyo Omala Ovisasanyedha wi Obatiziwe?” mwari mwa Mwang’aneli wa Marsu 2020.
f FOTO YA NIKUKU: Omamalelo wa nsunzo na Bibilia, murogora oromile omusunziha Bibilia wale vina onna ttotto ya osunziha, onimvaha malago namasunziha mwina awi kanfwanyela ologa vaddiddi ageddihaga nsunzo naye na Bibilia.
g FOTO YA NIKUKU: Vari va nsunzo, namasunza wa Bibilia onoubuwela txini enfwanyeliye okosa wi akale muteliwi waderetu. Vasogorhova onomwaddela mamune esile dhisunziliye.
h FOTO YA NIKUKU: Namasunza vamodha na mamune anowaredha vatakulu va marho ogumaniliyena Onumbani ya Omwene.