Mulogo Onawodhe Dhavi Wakamihedha Anamasunza a Bibilia Ofiyedha Ttarho ya Obatiziwa

1-2. Bani onfwanyela omukamihedha namasunza wa Bibilia ottukula ttarho ya obatiziwa?

“MIYO ddimusunzaga Bibilia ddankwela vaddiddi esile dhasunzemi. Ddanziwa wi ejile yasunzimi yali ebaribari. Masiki dhawene, ddali ddihinaroma otugumana; mbwenye muromilemi otugumana vina waredha na abali vamodha na arogora, eji eddikamihedha ottukula ttarho ya obatiziwa.” Ologile ddi Amy wa elabo ya Fiji. Yotagiha ya Amy elobo ya makamaka vaddiddi, namasunza wa Bibilia, onfiyedha ttarho ya obatiziwa agakela nikamihedho na abali.

² Namalaleya wotene ohikaana ewodhelo ya okamihedha wunuwa wa mulogo. (Ef. 4:16) Pionera onkuweliwa Leilani onkala o Vanuatu ohiloga dhahi: “Enologiwaga dhahi, wi mwana onunuwa pama agakala vamuruddani. Miyo ddahubuwela wi eji enoladdana vina na mabasa a wakosa anamafwara, omuttukulela muttu mmulogoni, wi akamihedhiwe oziwa ebaribari.” Anamudhi, amarho na anamasunzihaya, otene anokosa guru ya omulibiha mwana wi onuwe na mirugu. Awene anokosa ejo mudhela omukamihedha mwanaya vina omusunziha dhilobo dhamakamaka. Na mukalelo wakakene, anamalaleya anowodha walibiha, vina wakamihedha na yotagiha yapama anamasunza a bibilia, ejuwene enakamihedhe ottukula ttarho ya obatiziwa.—Gano 15:22.

3. Txini esunzilevo weyo na dhologa dha Ana, Dorin na Leilani?

³ Namasunziya wa Bibilia onele wagalala agawona anamalaleya a mmulogoni amukamihedhaga namasunza waye. Koona elogile Ana, Pionera wa mudhidhi wotene onkala o Moldávia, iyene bela, “Jorutxa muttu mmodha bahi omukamihedha namasunza wa Bibilia wakwanihedha dhotene dhinfuniye wi adhowegevi vasogorho.” Dorin Pionero wa mudhidhi wotene onkala elabo yakakene, ohenjedhedhavo dhahi: “Anamalaleya ena anologa elobo enddiginya murima wa namasunzaya; elobo egahiwodhile miyo okosa.” Leilani ohiloga mwaha mwina, iyene bela, “Okwela watxibarene onlagihiwa anamasunza a Bibilia onowodha ozinddiyeliha wi ntti nlogo na Mulugu.”—Jo. 13:35.

4. Txini dhinfuna iyo wona mwari mwa nsunzo ntti?

⁴ Weyo txino onodha wubuwela dhahi, ‘Miyo ddinawodhe dhavi omukamihedha namasunza wa Bibilia odhowa vasogorho oku miyo ddihina namasunza?’ Ndoweni nirome wona txini enfwanyelihu okosa nigawobiwa vansunzoni na Bibilia vina txini enfwanyelihu okosa akala namasunza wa Bibilia onoroma wona matugumano. Ninele wona vina mukalelo onakamihedhe anddimuwa a mmulogoni anamasunza a Bibilia ofiyedha obatiziwa.

OGAWOBELIWA OKALA VANSUNZONI NA BIBILIA

5. Txini enakose weyo ogawobiwa vansunzoni na Bibilia?

⁵ Vansunzoni na Bibilia, vamaromo-wene onna muttorho wa omukamihedha namasunza wa Bibilia odhowana vasogorho Mazu a Mulugu ddi namasunzihaya. Weyo ogawobiwa va nsunzoni na Bibilia, onofwanyela otanalela wi onokosa mpaddi wa nsunzona. Nikamihedho nawo ttamakamaka. (Koh. 4:9, 10) Ogawobiwa va nsunzoni na Bibilia, onawodhe dhavi okamihedha na mukalelo waderetu?

6. Weyo ogowobeliwa va nsunzoni na Bibilia, nlebo na Gano 20:18 ninaukamihedhe dhavi?

⁶ Kasasanyedha nsunzona na Bibilia. Vamaromo, kamukumbirhe namasunzihaya wi awaddelelemo vang’onovi sabwa ya namasunzaya. (Kengesa Gano 20:18.) Kanvuze namasunzihaya dhahi: “Weyo onziwa eni sabwa ya namasunzaya? Munasunze mutoma gani? Weyo onfuna wi namasunzaya apurelemo nni sabwa ya mutomaya obu? Ekalawo elobo egaziveliwe weyo wi miyo ddiloge obe ddihiloge vansunzoniva? Txini enamukamihedhe namasunzaya odhowavi vasogorho?” Txino namasunzihaya kanaloge dhilobo dhoviteya dha namasunzaya, mbwenye enfuniye ologa enele wukamihedha. Misiónaria dhahi onkuweliwa Joy, onowakosaga mavuzo ninga abene abale anavelelaga iyene mmasunzoni a Bibilia. Iyene ohiloga: “Miselu esi dhinoddikamihedha okala vansunzoniva vina oziwa txini enfwanyela miyo omukamihedhana namasunzaya.”

7. Weyo ninga namawobiwa onfwanyelelani osasanyedha pama nsunzona?

⁷ Akala weyo onowobeliwa vansunzoni, egahikala pama osasanyedha deretu makani anfuninyu osunza. (Ezd. 7:10) Mbali Dorin ologiwe vamaromo ohiloga dhahi: “Miyo ddinoziveliwa vaddiddi, akala mukwaga omuwobilemi onosasanyedha deretu nsunzona. Sabwani iyene onowodha ovaha dhowakula dhinwodha omukamihedha namasunzaya.” Mowenjedhedha, namasunzaya agaziwa wi moheli muhisasanyedha deretu, eji enela okala tagiha yapama mwa iyene. Masiki akala kusasanyedhile nsunzona, kavedda mudhidhi wa wang’ana mutomaya vina makani ali mwari mwa mutomaya.

8. Ogakumbirhiwa wi okose nlobelo vansunzoni na Bibilia, txini enfwanyeliwe okosa wi nlobelona nikale nopureleyamu?

⁸ Nlobelo elobo yamakamaka vansunzoni na Bibilia, akala namasunzihaya onoukumbirha wi okose nlobelo onofwanyela otanalela enfuniwe ologa. Ottiya ejo, nlobelo nawo ninofwanyela okala nononeleyamo. (Masal. 141:2) Hanae onkala o Japão, onoubuwelavi nlobelo nakosilege murogora wanveleliyege namasunziha waye wa Bibilia. Iyene bela: “Miyo ddahona wi iyene wahikana mandano oliba na Yehova, nona ddanfuna ddikale ninga iyene. Miyo ddahona wi iyene wanddikwela sabwa ya oromola nzina naga munlobelonimwa.”

9. Mowiwanana na Tiago 1:19, txini enfwanyeliwe okosa wi omukamihedhe namasunziha ouwobele vansunzoni vaye?

⁹ Kamukamihedhe namasunzihaya ageddihaga nsunzona. Pionera dhahi wa mudhidhi wotene onkuweliwa Omamuyovbi, onkala elabo y’o Nijeria ohiloga wi. “Ole onkala vansunzoniva onokamihedha mwawakwana-mwene, mbwenye kanfwanyela ologa vaddiddi, iyene onofwanyela ononelamo wi onsogorhela ddi namasunziaya.” Weyo onawodhe dhavi, vina mudhidhi gani onfwanyeliwe okamihedha nsunzona? (Gano 25:11) Ofwaseyele omvuruwana namasunzihaya agalogaga na namasunzaya. (Kengesa Tiago 1:19.) Ottiya ejo weyo onofwanyela okala womala na wale wi okamihedhe mudhidhi bu mudhidhi. Ohinatti ologa, enofuneya otanalela txini enfuniwe ologa. Ninga motagiha, kili yofuneya weyo ologaga vaddiddi, obe ombarela namasunzihaya agamutapulelagamo namasunzaya vina kunfwanyela witavo makani mena. Ottiya ejo, kavahaga dhotagiha vina okosege mavuzo, dhawene onele omukamihedha namasunzaya ononelamo deretu ensunziye. Enodha opadduwa weyo ohikana elobwene yologa. Mbwenye ogamutamalela namasunzaya ejo enele omukamihedha odhowavi vasogorho.

10. Nipadduwo nawo ninawodhe dhavi omukamihedha namasunza wa Bibilia?

¹⁰ Kamutapulelemo dhupadduwele mwigumini mwawo. Egawodheya kamutapulelemo mukalelo osunziliwe ebaribari, makattamiho agumaniliwena vina mukalelo woniliwe nlada na Yehova nukamihedhaga. (Masal. 78:4, 7) Yopadduwa yawo enodha okala ejuwene yafuna namasunzaya wiwa. Eji enodha olibiha nroromelo naye vina omukamihedha wi adhowegevi vasogorho mpaka obatiziwa. Enodha vina omvaha guru ya okwaranyana makattamiho angumaniyena. (1 Ped. 5:9) Gabriel onkala elabo y’o Brazil, onlaba ninga pionero, onowubuwela mukalelo opureliyemo vamusunziye Bibilia. Iyene ologile dhahi: “Mwewilemi nipadduwo na mbali dhahi, miyo ddahinonelamo wi Yehova onowona makattamiho angumanihuna. Akala abali ahiwodha owananana makatamiho awa, miyo vina ddinele owodha owanana aga.”

NAMASUNZA WA BIBILIA AGAROMA OTUGUMANA

11-12. Ekaleleni yaderetu wamoyelaga anamasunza a Bibilia anda wona matugumano?

¹¹ Namasunza wa Bibilia wi attukule ttarho ya obatiziwa, iyene onofwanyela otugumanaga sumana dhotedhene. (Aheb. 10:24, 25) Bili dhawene, namasunzihaya ddinfwanyela omuwoba dila yoroma wi adhe one matugumano. Akala onodha omatugumanoni, iyo notene ninofwanyela omutamalela vina omulibiha na mazu awi adidelevi otugumana. Ninawodhe dhavi okosa ejuwene?

¹² Wamoyela. (Rom. 15:7) Akala namasunza onowona wi ohakeliwa na mada meli, iyene onele okana efunelo ya odhagavi Onumbani ya Omwene. Jofuneya wi namasunzihaya amulagihe abali ena. Iyo ninofwanyela ologaga makani na iyene akala namasunzihayeya kavo obe akala onkosa mabasa mena Munumbani ya Omwene. Kanfwaseyele namasunzaya agalogaga vina kamutonyihedhe ntanalelo. Weyo ogammoyela namasunzaya, ejo enamukamihedhe dhavi? Kona nipadduwo na Dmitrii mbali obatiziwe mwa mudhidhi mung’onovi, ovanene onlaba ninga mudhari wokamihedha. Obuwelaga labo niromiliye otugumana iyene ohiloga: “Vafiyilimi Onumbani ya Omwene mbali mmodha ohiddivedela mburo wogilati vina nahigilati vamodha. Miyo ddahitikina vaddiddi sabwani attu enji anda oddilejela. Miyo ddahiziveliwa venjene ofiyedha otugumanaga sumana dhotene. Ddahitikina-wene sabwani mwigumini mwaga kaddinattigi orihiwa dhayilene.”

13. Mweddelo wawo onimpatta dhavi namasunza wa Bibilia?

¹³ Kala yotagiha yaderetu. Mweddelo wawo wapama onela omukamihedha namasunzaya okuluvela wi ohifwanya ebaribari. (Mt. 5:16) Vitalii Onlaba ninga pionero o Moldávia, ohiloga: “Miyo ddahinonelamo mukalelo oneddihana abali mmulogoni, mukalelo onubuwelani vina mukalelo onrihana awene. Ejo yahiddittukulela ozinddiyela wi Anamoona a Yehova anedda na Mulugu webaribari.”

14. Yotagiha yawo enamukamihedhe dhavi namasunza odhowagavi vasogorho?

¹⁴ Wila afiyedhe ttarho ya obatiziwa, namasunzaya onofwanyelela ovirihamo esile dhinsuziye. Masaka mena kahiyo yovevuwa. Mbwenye iyene agona mpurelo ompurelamo weyo sabwa ya weddana malago a Mbibiliani, ejo enele omuttukulela wutagiha. (1 Kor. 11:1) Katanalela yotagiha ya Hanae, ologiwe mundduni. Iyene ohiloga: “Abali na arogora aali dhotagiha dhawoneya dhasunza miyo. Miyo ddahona mukalelo ogawodhilimi wapangarhaza, walevelela vina wakwela attu ena. Awene anloga dhilobo dhapama dhakosa attu ena. Miyo ddinfuna ddatagihe.”

15. Nlebo na Gano 27:17 ninikamihedha dhavi wona wi jofuneya okaana mandano na anamasunza a Bibilia mudhidhi ondani wona matugumano?

¹⁵ Kakosa mandano na namasunza. Namasunza agadhowagavi omatugumanoni, Kadhowagavi omutonyihedhaga ntanalelo. (Fil. 2:4) Onkoddelani otamela mudhidhi wa ologaga na iyene wi omuziwe pama? Ottiya wandanavi na iyene, kamutamalele mwaha wa matxinjo ankosiye, kamvuzedhege sabwa ya nsunzo naye na Bibilia, amudhaye vina mabasa aye. Makani ninga aba anela wukamihedhani okala ofiyedhana. Weyo ogakaana mandano na namasunzaya, onele omukamihedha ottukula ttarho ya obatiziwa. (Kengesa Gano 27:17.) Hanae ovanene onlaba ninga pionero wa mudhidhi wotene. Obuwelagavi sabwa ya siku niromiliye wona matugumano, iyene ohiloga: “Sabwa ya mandano animi na abali a mmulogoni, ddankana efunelo ya wonagavi matugumano, masiki malabo akalemi wolemene. Ovitaganyiha na amarho aba aswa, yahiddikamihedha ogwadda mandano na amarho abale ahamulabela Nabuya Yehova. Miyo ddanfuna okala wofiyedheya na Yehova, abali vina na arogora. Nona, ddahigana obatiziwa.”

16. Txini yina enfwanyeliwe okosa wi omukamihedhe namasunza wa Bibilia okala wottugareyene mmulogoni?

¹⁶ Akala namasunza onodhowavi akosaga matxinjo, kamukamihedhe ononelamo wi onokosa mpaddi wa mulogo. Weyo onele owodha okosa ejo ogakala namakela aleddo. (Aheb. 13:2) Denis onlabela elabo y’o Moldávia, obuwelaga mundduni nsaka amusunziye Bibilia, ohiloga: “Mudhidhi mwina miyo na mwadhaga nanwobiwa odhowa mmavegoni na abali. Iyo nanawiwa alogaga mukalelo wakamihedhile Yehova. Wiwa dhotagiha esile dhannilibiha. Midhidhi esile dhahinikamihedha okana efunelo ya omulabela Yehova vina nahiziwa wi nigahikana wagalala mwa omulabela Yehova.” Namasunza wa Bibilia agakala namalaleya, kamukumbirhe wi mudhowege vamodha mmabasani a olaleya. Namalaleya Diego wa elabo y’o Brazil, ohiloga: “Abali enji anoddiwoba wi nidhowe vamodha mmabasani a olaleya. Obu mukalelo oddikamihedhile waziwa pama. Sabwa ya ejuwene, miyo ddihisunza vaddiddi vina ddihikala wofiyedheya na Yehova vamodha na Yezu.”

ANDDIMUWA A MMULOGONIANAKAMIHEDHE DHAVI?

17. Anddimuwa a mmulogoni anawodhe dhavi wakamihedha anamasunza Bibilia?

¹⁷ Kaveda mudhidhi wa okala na anamasunza. Nyuwo anddimuwa a mmulogoni, watanala wenyu vina wazuzumela anamasunza, onele wakamihedha othukula tharho ya obatiziwa. Munotamelaga mudhidhi wa ologa na anamasunza a Bibilia Onumbani ya Omwene? Awene anele wona wi nyuwo munowatanala mudhidhi onromola nyuwo mazina awa, makamaka agaroma ovaha dhowakula. Kigakalile nyuwo oveda mudhidhi wa wavelela anamalaleya odhowa weddiha nsunzo nawa na Bibilia? Mugakosa dhawene munele wakamihedha anamasunza na mukalelo wahajedhelinyu. Pionera onkuweliwa Jackie, wa elabo y’o Nigeria, ohitapulelamo dhahi: “Anamasunza enjene anotikinaga agaziwa wila mbali oddivelelile o nsunzoni naga, munddimuwa wa mulugo. Namasunzaga mmodha wa Bibilia ohilogo, ‘Munddimuwa wokapela waga txipo kagakosile ejuwene. Iyene onawaredhela attu orela, vina onalobelela awene!’” Namasunza oddule ovano onowona matugumano.

18. Anddimuwa a mmulogoni anawodhe dhavi wakwaniha muttorho wawa ninga munlogela yoleba ya Merelo 20:28?

¹⁸ Mwaswagihe vina mwapangarhaze anamasunziha Bibilia. Anddimuwa a mmulogoni, nyuwo muhikana muttorho munddimuwa vaddiddi wa wakamihedha anamalaleya odidelavi mabasa awa osunziha Mazu a Mulugu. (Kengesa Merelo 20:28.) Akala namasunzihaya onokana manyazo a weddiha nsunzo na Bibilia vamentoni vawo, kavilevele wi weddihe. Jackie ologiwe vamaromo, onoubuwela, iyene bela: “Anddimuwa a mmulogoni anddivuza sabwa ya masunzo aga a Bibilia. Mudhidhi wagumanana miyo makattamiho a weddiha nsunzo naga na Bibilia, awene anddivaha malago addikamihedha.” Enowodheya nyuwo wapangarhazaga anamalaleya vina wakamihedha ovilelavi. (1 Tes. 5:11) Jackie ohenjedhedha dhologa dhaye na mazu awi: “Miyo ddinoziveliwa anddimuwa a mmulogoni agaddilibihaga vina agatamalelaga mabasa ankosimi. Mazu awa anoridhiha murima waga, ddigewaga ddinkala ninga ddinmwa kopo ya manje a mmukatteni nsaka na elimwe. Matamalo awa anolibiha nroromelo naga vina anowenjedha wagalala waga mmabasani a olaleya.”—Gano 25:25.

19. Iyo notene nina wagalala gani?

¹⁹ Akala kanina anamasunza a Bibilia, enowodheya iyo wakamihedha anamasunza a Bibilia ena olibavi mpaddi womuyani. Nigawobiwa vansunzoni na Bibilia, ja malago osasanyedha deretu nsunzona vina omukamihedha nameddihaya na dhowakula dhehu. Enowodheya iyo okala amarho a anamasunza a Bibilia; agadhaga Onumabani ya Omwene, nikalege tagiha yapama mwa awene. Enowodheya vina anddimuwa a mmulogoni walibiha anamasunziha vina anamasunza mwa otamelaga mudhidhi wa waswagiha vina wa okala na awene. Txibarene, iyo ninokana wagalala onddimuwa vaddiddi mwa oziwa wi nihikosa muli mwetemwene wi nimukamihedha namasunza omukwela vina omulabela Babi wehu wa wirimu, Yehova.