Kakamihedhe Abale Ahinoona wi Amuziwe Yehova
1. Yezu olagihile dhavi wi wahaweddela ttagaraga attu ahoona?
1 Ahalilewo malabo mang’onovi wi Yezu apiwe, iyene wahivenya mmuttetteni w’oJerikó, aliba ohoona eeli aroma omukuwela eraga: “Nabuya, muneddele thagaraga!” Masiki Yezu aziwaga wila okwa waye wali vakuvi, iyene ohimela, ohawittana oheeli nanda ohavulumutxa (Mt. 20:29-34). Ninawodhe dhavi omutagiha Yezu mwa waweddela ttagarara attu ohoona?
2. Ninawodhe dhavi onvaha onamoona muttu wohoona oninfanyihu mmabasani a olaleya?
2 Kakamihedha: Akala ononfanya muttu wohoona mudila onofanyeela omulejela, ologa nzina nawo vina onvahe nikamihedho. Vowila attu ohoona mudhidhi mwina kanrihiwetxa, iyene poddi odha ottiddiwa wova. Nona, wi ejuwene enadhe opadduwa onofanyela olagiha omarho waderetu. Wubuwela yawila kahiyo wi aliba ohoona etene anoligana, ejo enele wukamihedha otanaalela marhe a omukamihedhana muttuya. Ogamala omukamihedha, ologe wi weyoya onkosa mabasa a omusunziha Bibilia. Kamwengesele nlebo ninga Masalmo 146:8 obe Izaiya 35:5, 6. Akala iyeneya onowodha wengesa Braile, kanvuze akala agahiziveliwa okana manivuru a Ebrahile anamukamihedhe osunza modhela Bibilia. Omukamihedhe vina wi afanye dhogaravariwa mu jw.org. Akala komputadoro waye onowodha wengesa malebo ogaravariwa mowiweya, txino iyeneya onodha oziveliwa na manivuru opidiwa andela mu jw.org anwodheya otomoliwa na ekalelo ya RTF (Rich Text Format).—Koona kasha “Ogamukamihedhaga Muttu Wohoona . .”
3. Ninawodhe dhavi waveda attu ohoona ali mmuruddani mwehu?
3 Kanvede Muttuya Wohoona: Vowi aliba ohoona enjene mudhidhi mwina anowova ogumana na muttu ohinimuziwani, iyo nigalaleyaga numba na numba enorutxaga vaddiddi wafanya vanivawa. Na eji, jamakamaka ovilibihedha ‘waveda’ wi nalaleye. (Mt. 10:11) Ohikana marho wa omabasani obe wa oskola oli muttu wohoona? Kakala woroma wita makani. Akala mmuruddani mwawo muhikala eskola ya aliba ohoona, kadhowana manivuru ehu a elogelo ya Braile wi attiyiwé mmbibliotekani. Onomuziwa muttu ona mmudhaye wohoona? Mmuruddani mwawo muhikala nikuru ninakamihedha aliba ohoona obe muhikala numba munkala aliba ohoona? Kamwaddele mmudhaye obe oddule onawakela aleddo obe vina mwimeleliya wila Anamoona a Yehova anofuna wakamihedha vaddiddi aliba ohoona, vina anofuna wavaha manivuru a Braile obe dhogravariwa. Kamulagihe nlibelo nili mBibiliani, ninloga wi ovanene Mulugu onele ogomiha kakamwe makattamiho ohoona. Txino vina weyo poddi wubuwela omulagiha vidiyu eli mu jw.org musorhoya onloga “Sem Ela eu Me Sentiria Perdido,” enloga yotagiha ya mulobwana odhile okamihedheya mwa okana Bibilia w’eBraile. Ogatapulelamo yofuna ya waredha wawo onele owodha okosa mandano na attu ohoona.
4. Ninsunzamo eni modhela yotagiha ya murogora Janete?
4 Murogora dhahi wohoona oniliwa Janete, vadhowileyi waredhela numba munkala attu ohoona, mfiyeleyi, wahiroma ologa na namwali dhahi. Murogora Janete wahimwaddela dhahi, “Yezu wahavulumutxa aliba ohoona wi alagihe ejile enakoseyi wa attu otene abale ahinoona.” Ahengesa vamodha Ovuhulela 21:3, 4 vina wahimutapulelamo mukalelo onakwanihedheye nlibelo nttti mu Omweneni wa Mulugu. Namwaliya wahiroma omaala, nomala baloga dhahi: “Kaddinewaga mazu ninga abene wa muttu wohoona. Attu enjene anrumela yawila ohoona ontoteya na kwarula obe elobo eligile ababi a muttuya.” Murogora Janete wahimvahedha email namwaliya nanda beekamo nivuru Ensunziha Bibilia, vina ovanene awene anomusunza Bibilia vamodha dila biili vasumanani.
5. Velani iyo kaninwodha wavulumutxa attu ohoona ninga mwakoseli Yezu, kito ninkaana mareliho gani nigatanalaga abale ahinoona?
5 Ebaribari jowila, iyo kaninwodha wavulumutxa attu ohoona ninga mwakosela Yezu, mbwenye ninowodha wakamihedha abale ampibiwa omentoni wawa na mulugu wa vatapano, vina na aliba ohoona wi aziwe ebaribari ya Mazu a Mulugu. (2 Kor. 4:4) Yezu ohavulumutxa attu eeli ahoona waddamela o Jerikó, sabwani iyene ‘waweddela ttagaraga’ (Mt. 20:34). Nigalagiha efunelo yakakene na abale ahinoona, ninele wagalala mwa wakamihedha ena omuziwa Yehova, oddule onagomihe na mukalakala makattamiho ohoona.
[Kasha vanikukuni 3]
Ogamukamihedhaga Muttu Wohoona . . .
• Omwang’anege ogalogagana, mbwenye kukuwegena ologawa. Awene kanwodha woona mbwenye anowiwa deretu.
• Kanvahedhe mono wawo, nanda omuttiye wi apapase mpaka ottidda etturi yawo, akala onfuna omweddihe. Iyene onele owodha weedda na weyo akala weyo onoweedda vang’ono-vang’ono osogorho waye. Ogoona osogorhowa ttukuwa, nigoddo obe ogafanya sikadda, onofanyeela ompanga.
• Kakala wotapuwa ologaga mazu ninga: “wang’anege” vina “koona”. Aliba ohoona vina anologa dhawene. Awene “anowoona” na mukalelo wawa wa mubuwelo vina anotanalela eloboya enlogiwa (enaddiwana).
• Omusunzihege va mburoni wofaseya. Aliba ohoona kanziveliwetxa vamburoni vankuwiwa vaddiddi, sabwani kanziwelamo empadduwa.
• Ompaganye ogabudduwagavo. Eji enele omukamihedha wi anadhe alogege yeka weyo ogabudduwilevo.
• Kattikitta njangarha (S-43) ogamala onvahedhe mulebi wa mmulogoni mwawo akala muttuya wohoona olagiha efunelo, mbwenye kankala mmuruddani mwawo.