Kapurelamo Masunzo Ehu a Nivuru Txini Ensunziha Bibilia Txibarene?
1 Nivuru Txini Ensunziha Bibilia Txibarene ovanene nihikalawo na elogelo ya (Etxuwabo). Ovanene ninela osunza mukalelo wa ottiddihedha mabasa mmalaleyoni, makamaka nigakosaga masunziho a Bibilia. Mwa dhahene, ninofanyeela oviwananiha na nivuru ntti niswa. Ejo enela owodheya sabwani ninela okala nivuru na masunzo a mmulogoni, oromana sumana 19 ya Otuburu 2015.
2 Nameeddihaya onele ologa na ttima mavuzo anfanyeya omaromo wa kadda kapitulu. Musogorhomwa nsunzona ninele okosiwa mowiwanana na mavuzo anfanyeya mutxiddo mwa kadda nikuku. Malebo amakamaka anele wengesiwa vina osekeserhiwa, kaxa elebiwe “Esile Dhinsunziha Bibilia” omamalelo wa kadda kapitulu enele okala yokamihedha wi dhiyeleliwe esile dhisunziwe vowi muhikala dhowakula dha Bibilia modhela mavuzo akosiwe omaromo wa kapitulu. Onele woona wi kinarutxe ovahawa yowakula sabwani nivuruna ninologa makaniya na mukalelo wowooneya, wohirutxa vina wozivela.
3 Mpaddi wa yowenjedhedha ya nivuru ntti onovaha dhologa dhinji modhela makani menjene. Epaddi eji ninelege olabihedha akala namasunza wehu wa Bibilia onofuna oziwa makani ottiyana-ttiyana. Vina mudhidhi mwina epaddi yina ya yowenjedhedha enelege osunziwa mwari mwa Nsunzo na Bibilia na Mulogo. Mudhidhiya ogakalawo, makani otene anloga dha dhowenjedhedha anele wengesiwa na namengesa wa nsunzo na Bibilia na mulogo, musogorhomwa dhipaddidha dhowinjiva dhinele osekeserhiwa epaddi modha-modha. Mpaddi obo wa dhowenjedhedha kuna mavuzo, mbwenye nameddihaya onelege wakumbirha anamewa wi aloge dhowenjedhedha modhela okosa mavuzo aniwanana na mutomaya wamakamaka.
4 Va Nsunzoni na Bibilia na Mulogo, mukalelo wa osunza nivuru ntti Ensunziha Bibilia, onele ottiyana vaddiddi na mukalelo onsunza iyo na muttu mwina makamaka abale ahina eziwelo ya Bibilia. (Merelo 26:28, 29) Mwari mwa masunzo a Bibilia a vawoka obe ahimpitxeliwa, malebo atonyiwe anelege otapuleliwa mowakwana vina anelege otapuleliwa maladdaniho otene ali mwari mwa musorhoya wa nsunzo. Noona kagana okala vamatugumanoni sumana dhotene wi ovahe dhowakula dhawo wi opurelemo kakamwe osunza nivuru ntti Txini Ensunziha Bibilia Txibarene?