Nunuwihe Ewodhelo Yehu Mmabasani a Olaleya—Nashagihe Anamasunza wi Onuwihe Mikalelo Dhaderetu dha Nsunzo
Ekalelini ya Makamaka: Wi namasunza wa Bibilia onuwe mpaddi womuyani onofanyeela ohela mmirimani mwaye vina muyubuweloni mwaye masunziho a makamaka a mazu a Mulugu. (Aheb. 5:12–6:1) Wi muttu asunze onofanyeela okosa guru. Ejo entapulela ottiyaniha esile dhinsunziye ovanene na esile dhisunziliye wale wi awodhe otanaalela yopurelamoya. (Gano 2:1-6) Osunza opepesa mwinyene, onele omukamihedha namasunzaya wakula mavuzo a mBibiliani alabihedhaga dhipano dhehu. Guru dhinkosa anamasunza wi attiddihedhe mabasa esile dhinsunzani dhinele wakamihedha okala owarala agagumanagana dhowehiwa.—Luka 6:47, 48.
Ninakose Dhavi:
• Kamutapulele wila jamakamaka kadda nsunzo oromana nlobelo amukumbirhaga nikamihedho Yehova.—Joau 14:26; 1 Kor. 2:10.
• Vamaromo, kamulibihe namasunza wawo wa Bibilia wi avisasanyedhe ahinatti omusunza Bibilia. Kamulagihe namasunzaya nivuru nawo na nsunzo vina kamulagihe mukalelo onkweretiwani, ogamala kamusunzihe okweretawa mazu a makamaka a ddimaya.
• Kumutinyihedhe dhowakula dha mavuzo a nsunzona vina namasunzaya keengese dhowakuladha mu nivuruni. Kamusunzihe wakula na mazu aye.
• Kamulibihe namasunza awo wengesa kapitulu dhing’onovi dha Mazu a Mulugu siku na siku. Kamutonyihedhe porograma ya wengesa wa Bibilia mu jw.org, obe A Sentinela 1 wa Agosto 2009 (wa ezugu) makuku 15-18, entonyihedha mukalelo wa deretu wa okosa ejuwene. Wi namasunza onuwihe efunelo ya omwengesa Bibilia malabo otene onofuneya okosa guru, agakosa dhahene onele opurelamo.—Masal. 1:2, 3.
• Kamutonyihedhe namasunza wawo mukalelo wa ofanya dhowakula dha mavuzo a mBibiliani alabihedhaga epano ya Watchtower Library obe Watchtower ONLINE LIBRARY obe Mutonyo wa Opepesa. Kamukamihedhe woona mutonyihedho onkamihedha ofanya dhipano dhehu dhinttiddihedhaga iyo mabasa mmatugumanoni mwehu.
Otagihe Dhahi Mweri Obuno:
• Omamarihedho wa kadda mutoma obe nsunzona kamukumbirhe namasunzaya wi eyelele esile dhisunziliye. Akala kuna namasunza keyelela mpaddi wengesiliwe mBibiliani obe ddima ya A Sentinela wila enonelo yawo wa esile dhinengesiwe mBibiliani edhowege vasogorho.