Mukalelo wolabihedha—Dhogaravariwa
1. Ottiya manivuru olebiwa, epano gani yina ena iyo?
1 Attu enjeene anoziveliwa omulabihedha jw.org obe dhogaravariwa wi asunze mazu ebaribari. (Koh. 12:10) Noona, wahiromaga olabihedha dhogaravariwa esi? Dhogaravariwadha dhinokosiha ovuruwana miselu dhinji dha Web site wehu. Dhogaravariwa esi dhinanikamihedhe dhavi?
2. Ninalabihedhe dhavi dhogaravariwa, va nsunzoni nomwinya obe vamuralani vehu?
2 Olabihedha va Nsunzoni Nomwinya obe Vamuralani Vehu: Ovuruwana dhogaravariwa dha Bibilia, marevista, obe manivuru, mudhidhi onkosihu oleddo, mabasa a labo-labo, enonikamihedha olabihedha mudhidhi wehu na mukalelo wopimeleleya. (Ef. 5:15, 16) Iyo poddi wenjedhedha dhitagano dhinji mudhidhi wa webedha wehu wa ntakulu mwa ovuruwanaga dhinengesiwa nifarihedhaga na nivuru ninsunzihu. Olabihedha dhogaravariwa mudhidhi onkosa iyo nsunzo nomwinya, enonikamihedha wunuwiha ewodhelo yehu ya wengesa obe osunza elogelo eswa.
3. Mmabasani ehu a olaleya ompurelamo dhogaravariwa bani?
3 Mmabasani a Olaleya: Mmuruddani mwehu attu anoona wi kanetxa mudhidhi wa wengesa, txino anokaana efunelo ya ovuruwana dhogaravariwa. Obe ninda wafanya abale anloga elogelo yottiyana vina anziveliwa wiwa miselu dha Omwene na ‘elogelo yawa.’ (Mer. 2:6-8) Mirudda dhina, ovuruwana, elemelelo yamakamaka vaddiddi. Ninga motagiha, attu a Hmong, ahikaana elemelelo ya wawaddela azombwe dhitxirhapi s’ohileba vina azombweya anofwaseyela ovuruwana miseludha. Attu enjeene a elabo ya Afrika ahikaana elemelelo ya ovuruwanaga dhitxirhapi.
4. Wi nakamihedhe attu eena mmuruddani mwehu mavuzo gani anfanyeelihu ovikosa?
4 Jopureleyamo mmuruddani mwawo omurumihedha mwanamurala yogaravariwa na elogelo yaye? Enowodheya muttu opurelamo yogaravariwa ya nivuru emperhengezelihu nilabihedhaga e-mail obe epano yina? Enowodheya okosa download wa yogaravariwa ya nivuru nika mu CD, vina banittukula nivuruna baninvaha mwanamurala olagihile efunelo? Nigapaka manivuru otene ogaravariwa, ninga mabrochura, mafoliyetu, obe marevista ninofanyeela olebela mu njagarani na mawora. Dhogaravari dhikoseliwe wi dhinikamihedhe mudhidhi onkosa iyo nsunzo na omwinya vina wi nalena beu yebaribari ya Omwene.—1 Kor. 3:6.