Ovenyihedhe Wili Mandano Awo na Yehova

VYAKA dhotene, abali atxinuwile anowihedhiwa mmulogoni. Kobuwela “wagalala onkala wirimu” akala muttu mmodha onowihedhiwa mmulogoni! (Lk. 15:7, 10) Akala weyo olowihedhiwa mmulogoni, kakana ebaribari wi Yezu, anju vina Yehova ali owagalalene mwaha o’wona weyo wiyelela mmulogoni. Mudhidhi onadhowiwe bugavenyihedha mandano awo na Yehova, vanele opadduwa dhorutxa. Dhorutxa gani dhindawo, nanda txini enawukamihedhe opemberha?

DHORUTXADHA ESO SIVI?

Mmalelani wiyelela mmulogoni enji anowanana na dhubuwelo dhohifwanyelela. Txino weyo onoviwona ninga Mwene David. Masiki vamaleliye oleveleliwa, iyene wahiloga: ‘Dhoddawa dhaga dhinodditabutxa.’ (Masal. 40:12; 65:3) Agamwiyelela Yehova, ena anodhowavi avipwattelihaga miladdu obe okana manyazo mwari mwa vyaka dhinjene. Isabelle waburutxiwe mmulogoni mwari mwa vyaka 20.a Iyene ohiloga, “Mwa miyo yali elobo yorutxa orumela wi Yehova agahilevelela dhottega dhaga.” Ogakala wokubanyene mandano awo na Yehova anele wobana wili. (Gano 24:10) Kuttiye wi ejo epadduwe.

Ena anubuwela wi kanawodhe okosa dhotene wi eyelele mandano awa naYehova. Mumaleli Antoine wiyihedhiwa mmulogoni ohiloga, “Yali ninga ddahimala odduwala txini yatapulela okala Mukristu.” Sabwa ya mubuwelo ninga obo, ena anofiyedha ohivilibihedha venjene mmabasani omuyani.

Motagiha, kobuwela pevo ya mutokora ennonga numba, mudhidhi onona mwina numbaya mukalelo olani, iyene onokubanya sabwa yowubuwela mudhidhi onattukuliye vina mabasa anfwanyeliye okosa wi eyelele ovenyihedha numbaya. Yakakene jimpadduwa na muttu onkosa yottega enddimuwa ennonga venjene mandano aye na Yehova. Muttuya onofiyedha ozuzuma sabwa a mabasa manddimuwa anfwanyeliye okosa wi eyelele oliba mpaddi womuyani, mbwenye iyene kanfwanyelela owanana yeka.

Yehova ononiwoba alogaga dhahi: ‘Dhawunoni nilogele omodhene makaniya.’ (Iza. 1:18) Weyo ohivilibihedha wi ‘ologele makaniya na Yehova.’ Sabwa yokosa ejuwene iyene onowukwela venjene. Kobuwela: Yehova onowodha olabihedha yotagiha yawo wi awodhe wakula omageedha wa Satana!—Gano 27:11.

Sabwa ya weyo wiyelela mwibaribarini, ohikala wofiyedheya na Yehova vina iyene onokala wofiyedheya na weyo. (Tia. 4:8) Mbwenye kuwagalale sabwa ya attu ena wona wi weyo ohiyelela mmulogoni. Weyo onofwanyela olibiha omukwela Babi wawo Yehova. Onawodhe dhavi okosa ejuwene?

KEMETXA DHOGANA DHINAWODHE WEYO WAKWANIHEDHA

Katamela wimetxa dhogana dhinawodhe weyo wakwanihedha. Kudduwale wi maleje awo mpaddi womuyani—alivi ohimelene—kuloga weyo onowubuwela masunziho a mBibiliani sabwa a Yehova vina dhopikirela dhaye sabwa ya musogorho. Mbwenye egumi yawo yotene ninga Mukristu, eli vangovini enofwanyela ovenyihedhiwa, mwa dhilobo dhina dhinfwanyeliwe okosa olaleya miselu dhapama, wona matugumano vina otamelege mudhidhi wokala na abali vina arogora. Koona dhogana dhing’onovi dhinfwanyeliwe wakwanihedha.

Ologege na Yehova mudhidhi mwinjene. Babi wehu wa wirimu Yehova onoziwa wi ovipwatteliha muladdu enonirutxiha okosa malobelo. (Rom. 8:26) Mbwenye, “ovilele oku okosaga malobelo,” omwaddele Yehova wi weyo onofuna okala marho waye. (Rom. 12:12) Andrej onowubuwela: “Miyo ddanvipwatteliha venjene miladdu vina ddakala manyazovi. Mbwenye mudhidhi wakosimi malobelo, dhubuwelo esi dhanvuguwa vina ddankaana murenddele wa muyubuweloni.” Akala weyo kunziwa enfwanyeleliwe olobela kasunza Masalmo 51 na 65 anoniha nlobelo nakosile Mwene David bamalile otxinuwa.

Omusunza Bibilia. Ejo enele wukamihedha olibiha nroromelo nawo vina wunuwiha omukwela wawo Yehova. (Masal. 19:7-11) Felipe ohiloga: “Sabwa ya ohikana matadelo a omusunza Bibilia jiddittukuleli wobana mpaddi womuyani ofiyedha omuttegela Yehova. Miyo kaddafuna okosa yovonya eji dila yanawili nona ddahigana okosa nsunzo nomunya wi niddibarele.” Enowodheya weyo okosa yakakene. Akala kunziwa makaniya agafunile weyo wika munsunzoni nawo nomunya kamukumbirhe marho wawo woliba mpaddi womuyani wila okamihedhe?

Ovenyihedhe wili mandano awo na abali. Attu ena eyedhiwe mmulogoni anowova wi abali anodhaga osilidhiwa na awene. Larissa ohiloga: “Miyo ddankaana manyazo venjene. Miyo ddobuwela wi ddahisadduwela mulogo. Dhubuwelo esi dhahigonela mudhidhi mwinjene.” Kakana ebaribari wi abali a mmulogoni na abali ena oliba omuyani ali omala nawale wi okamihedhe ovenyihedha wili mandano awo na Yehova. (Koona kasha “Txini Enfwanyela Anddimuwa a Mulogo Okosa?”) Awene anowagalala sabwa ya weyo omwiyelela Yehova vina awene anofuna wi ottabe!—Gano 17:17.

Weyo onawodhe dhavi okala ofiyedheya na abali a mmulogoni? Wonege matugumano otene—vina ovilibihedhe odhowa mmabasani a olaleya. Okosa ejuwene enawukamihedhe dhavi? Felix ohiloga: “Abali anjeedhela wi ddiyelele mmulogoni. Vina miyo ddahoona wi awene anddikwela venjene. Otene ahiddikamihedha wona wi miyo ddinokosa wili mpaddi wa mulogo. Ddahinonelamo wi ahiddilevelela vina anfuna wi miyo ddidhowege vasogorho”—Koona kasha “Txini Enfwanyelela Weyo Okosa?”

KUWIYELELE MUNDDUNI!

Venevo vandowiwe bugalibiha mandano awo na Yehova kakana ebaribari wi Satana onelege wikamo mudilani mwawo “pevo ya mutokora” iyene onfuna wi awobanihe. (Lk. 4:13) Nona okale txenjewa vina olibihevi nroromelo nawo ovanene.

Yehova alogaga sabwa ya mabila aye ohipikirhela dhahi: ‘Ddinotamela nirimelile, ddinokukusa nipupuruwile, ddinosarha nivorehile vina ddinolibiha nobanile.’ (Ezek. 34:16) Yehova onowakamihedha emeleli aye enjene ovulumuwa mpaddi womuyani. Nona kakuluvela wi iyene onele wukamihedha ovenyihedha vina olibiha wili mandano awo na iyene.

Txini Enfwanyela Okosa Anddimuwa a Mmulogoni?

Anddimuwa a mmulogoni anowavaha nikamihedho namakamaka anamalaleya eyihedhiwe mmulogoni wi awodhe ovenyihedha wili mandano awa na Yehova. Ndowe none nikamihedho ninfwanyela wavaha anddimuwa a mmulogoni.

Mwakamihedhe awene ononelamo wi anokweliwa. Murumiwi Paulo wanziwa wi muttegi omalile otxinuwa onodhaga ogonjihiwa na ‘okubanya wottabwa.’ (2 Kor. 2:7) Enoziweya wi masaka mena awene anokubanya vina anokaana manyazo. Nona Paulo awaddela abali a mmulogoni wi: ‘Enokala omulevelela vina ompangarhaza.’ Abali eyihedhiwe mmulogoni anofuna nikamihedho wi akaane ebaribari wi anokweliwa na Yehova vina na abalawa a mmulogoni. Wila awene awodhe opemberha okubanya japama anddimuwa a mmulogoni wavaha nikamihedho vina watamalela.

Olobele na awene. “Nlobelo na muthu womyala murima, niniriwa na ntidi, nikana guru enddimuwa.” (Tia. 5:16) Larissa, ologiwe omaromo ohiloga: “Miyo ddahiloga na anddimuwa a mmulogoni ddawaddelaga esile dhaganyedhimi vina esile dhova miyo. Awene ahilobela na miyo. Venevo ddahinonelamo wi anddimuwa a mmulogoni kasilidhiwe na miyo. Ottiya ejo awene ahiddikamihedha ovenyihedha wili mandano aga na Yehova.” Theo ohiloga: “Malobelo akosile anddimuwa a mmulogoni ahiddikamihedha okana ebaribari wi Yehova txibarene onoddikwela vina onowona dhilobo dhapama dhinkosimi ottiya dhovonya dhaga.”

Wandane na awene. Abali eyihedhiwe mmulogoni anofuna okala amarho a abali na arogora. Munddimuwa dhahi wa mulogo onkuweliwa Justin ohiloga: “Kapura gari eli yotene wi wawobe wi mudhowe mmabasani a olaleya vina yamakamakaya okosege matadelo a odhowa wawaredhela. Omaga omarho na awene elobo yamakamaka vaddiddi!” Munddimuwa mwina onkuweliwa Henry, ohiloga: “Abali ena agaziwa wi anddimuwa a mmulogoni ahimaga mandano na abale ayihedhiwe mmulogoni awene anele okosa yakakene.”

Wakamihedhe okana elemelelo ya omusunza Bibilia. Marho woliba mpaddi womuyani onowodha omukamihedha muttu wiyihedhiwe mmulogoni okana matadelo apama a omusunza Bibilia. Munddimuwa dhahi wa mmulogoni oniliwa Darko ohiloga: “Ddinoziveliwa wawaddela dhilobo dhamakamaka dhifwanyilemi munsunzoni naga na Bibilia. Vina ddinowawaddela wagalala onkanimi wa omusunza Bibilia. Ddinolagana na awene wi nisunze mapadduwo anddiginya murima.” Munddimuwa mwina wa mmulogoni onkuweliwa Clayton, ohiloga dhahi: “Miyo ddinowalibiha wi atamelege mapadduwo mBibiliani analoga attu agumanilena makattamiho ninga awa vina atamelege wona ejile enasunziha nipadduwona.”

Okale mukumbuzi wapama. Abale eyihedhiwe mmulogoni ahuwonani mulabaga ninga anamattonga. Mbwenye ovanene, enofuneya wi awene awonegeni ninga akumbuzi apama. (Jer. 23:4) Ofwaseyele wavuruwana vina okale omala nawale wi watamalelege. Egawodheya katamela mudhidhi wokala na awene. Koona enkosaga munddimuwa wa mulogo onkuweliwa Marcus agakala mmabasani a wawaredhela abali eyihedhiwe mmulogoni: “Iyo ninologa na iyene sabwa ya makani olibiha afwanyilihu mBibiliani vina ninowatamalela. Ninowalibiha nawaddelaga wila iyo nili owagalalene sabwa ya guru ekosilani y’omwiyelela Yehova. Vina Yehova ohiziveliwa na awene. Mabasa ehu a wawaredhela agagoma ninowapaganya nilogaga labo ninadhe iyo wili wawaredhela.”

a Mazina mena mwari mwa nsunzo ntti ahitxinjiwa.