Ononelamo Ononeddiha Siku na Siku

1. Iyo notene ninvedela nni ononelamo wa wirimu? (Gano 4:7)

WEYO OGAFUNAGA okosa yogana yamaka-maka, kavali waganyedha wi vamaromo onolobela okumbiraga ononelamo—sabwani onoziwa wi ejo elobo yamaka-maka. (Tia. 1:5) Mwene Salomau ohileba dhahi: “Mwa muthu enfuneyetxamo ononelamo.” (Kengesa Gano 4:7.) Salomau kaddana ononelamo wa vayovi, iyene waddana ononelamo onda mwa Yehova Mulugu. (Gano 2:6) Koddi ononelamo onda wa Mulugu onowodha onikamihedha owanana makattamiho makattamihovi angumanana iyo masaka abano? Ndde enowodheya, jijuwene enasekeserihu mwari mwa nsunzo ntti.

2. Mukalelo gani mmodha onanikamihedhe okala attu ana ononelamo watxibarene?

² Mukalelo mmodha wa okala attu ononelamo kwa osunza vina ovirihamo masunziho a attu aba eli, aziwiwa na ononelamo onddimuwa wanani. Voroma, ninfuna nisekesere sabwa ya Salomau. Bibilia onloga dhahi, ‘Yehova onvaha Salomau ononelamo na zelu enddimuwa.’(1 Amwe. 4:29) [1 Amwe. 5:29 Tradução do Novo Mundo] Yanawili, ninele osekesera sabwa ya Yezu, wana ononelamo ohinladdanihiwa. (Mt. 12:42) Nivuhulo nahiloga sabwa ya Yezu dhahi: ‘Muya wa Yehova onere okalaga na iyene, muya wa ononelamo na muya wa onona.’—Iza. 11:2.

3. Txini enasekeserihu mwari mwa nsunzo ntti?

³ Mulugu ohinvaha Salomau vina Yezu ononelamo onddimuwa, wakamihedhile onivaha malago sabwa ya dhilobo dhili dhamaka-maka wa iyo. Mwari mwa nsunzo ntti ninele osekesera malago mararu: Ofuneya wa okana monelo wopimeleleya sabwa ya kobiri, mabasa vina iyo nanya.

MONELO WOPIMELELEYA SABWA YA KOBIRI

4. Ottiyana gani wana egumi ya Salomau na ya Yezu?

⁴ Salomau wali mureli wakala ntakulu nokoddela vina nazivela okalamowa. (1 Amwe. 10:7, 14, 15) Mwa mpaddi mwina Yezu wana dhilobo dhing’onovi mpaddi womaningoni vina kana ntakulu naye nene. (Mt. 8:20) Masiki dhahene alobwana aba eli ahikana monelo wovipimelela na dhilobo dhomaningoni sabwani, ononelamo wanani wadha wa—Yehova Mulugu.

5. Salomau wana monelo gani wovipimelela sabwa ya kobiri?

⁵ Salomau wannonelamo wi kobiri ‘nibarelo.’ (Koh. 7:12) Na kobiri iyo ninowodha ogula dhilobo dhinfunihu. Masiki Salomau valiye mureli, iyene ohinonelamo wi dhikalawo dhilobo dhamaka-maka dhimpitta kobiri. Motagiha iyene ohileba dhahi: ‘Nzina napama ninopitha gari yofwanya nddarama na parata dhinjidhene.’ (Gano 22:1) Salomau wahona wi abale ankweletxa kobiri kanagalala na esile dhinani. (Koh. 5:10, 12) Iyene onaddela wi kanubuwele wi kobiri elobo yamaka-maka, sabwani kobiri enomela makapwa bivava.—Gano 23:4, 5.

6. Monelo gani wovipimelela wana Yezu sabwa ya dhilobo dhomaningoni? (Mateu 6:31-33)

⁶ Yezu wahikana moonelo wovipimelela sabwa ya dhilobo dhomaningoni. Iyene wanja vina wamwa. (Lk. 19:2, 6, 7) Ntikiniho naye noroma, wakosile vinyu yattima. (Jo. 2:10, 11) Labo nikwiliye vina, yahoneya wi wannabala guwo ya muttengo munddimuwa. (Jo. 19:23, 24) Mbwenye Yezu kazuzumeletxa dhilobo dhomaningoni. Iyene ohawaddela dhahi anamafwara aye: “Kawo onwodha walaba anabuya eli . . . Nona kinwodheya omulabela Mulugu vina olabela dhorela.” (Mt. 6:24) Yezu ohisunziha wi nigeka Omwene wa Mulugu vamburoni voroma Yehova onele onivaha esile dhinnijombela.—Kengesa Mateu 6:31-33.

7. Mbali Danieli opurilemo dhavi sabwa ya okana monelo wopimeleleya wa kobiri?

⁷ Abali na arogora anopurelamo na ononelamo onda wa Yehova sabwa ya kobiri. Katanalela yotagiha ya mbali onkuweliwa Danieli. Iyene ohiloga dhahi: “Baddili muzombwe ddahisakula wika vamburoni voroma mabasa omuyani mwigumini mwaga.” Sabwa ya ovevutxa egumi, Danieli olabihedha egumi yaye vina ttotto yaye mmabasani olaleya. Iyene ohenjedhedha dhahi: “Miyo txipo kadditxinuwile na yosakula ekosilemi. Ddinoziwa wi ddigahikana kobiri yinjene kozuzumela ejuwene mwigumini mwaga. Mbwenye miyo kozuzumeletxa kobiri kaddigawodhile okana amaro apama ana miyo ovanene. Vina kaddigawodhile okana wagalala onamiyo mwa oziwa wi, ddihika mabasa a Omwene vamburoni voroma. Kuli muttengo wa kobiri enligana na mareliho addivahile Yehova.” Txibarene ninopurelamo nigazuzumela dhilobo dhomuyani, ottiya ozuzumela kobiri.

MONELO WOPIMELELEYA WA MABASA

8. Ninziwa dhavi wi Salomau wahikana monelo wopimeleleya wa mabasa? (Kohelét 5:18, 19)

⁸ Salomau ohiloga wi mabasa anomudhelana muttu wagalala onddimuwa, iyene ologile wi obu ‘nvaho wa Mulugu.’ (Kengesa Gano 5:18, 19.) Iyene ohileba dhahi: ‘Mabasa otene anodhana dhopurelamo.’ (Gano 14:23) Salomau wannonelamo ejile yalogiye. Iyene wali namalaba! Wahimaga numba dhinddimuwa, wahitxeya miri dha mividera, mindda dhamaruwa, wahitiba matxela akuttulela manje miridha vina wahimaga sidadi dhinjene. Aba ali mabasa orutxa. (1 Amwe. 9:19; Koh. 2:4-6) Vina kavali waganyedha wi ahimudhelana wagalala. Mbwenye Salomau wanziwa wi awodhe okana wagalala wa txibarene, wanfwanyela okosa elobo yina. Iyene wahimukosela dhilobo dhinjene Yehova. Motagiha, mwari mwa—vyaka tanu na bili iyene osogorela mabasa a omaga mpara wottittimiheya mwebedhiwa Yehova! (1 Amwe. 6:38; 9:1) Moneliye mabasa otene attiddiliye, Salomau wahinonelamo wi mabasa omuyani bamaka-maka vaddiddi, opitta mabasa-mabasavi. Iyene ohileba dhahi: “Ogwaddela wa makani otene alogiwe, mungwelani pumpu: omuriha Mulugu, ofwara malamulo aye.”—Koh. 12:13.

9. Yezu wonihile dhavi wi mabasa omaningoni kalitxi amakamaka mwigumi mwaye?

⁹ Yezu wanivilibihedha ottidda mabasa. Vyaka dhoroma bali velaboni ya vati, iyene olaba ninga namasema. (Mk. 6:3) Kavali waganyedha wi amambali aye antamalela nikamihedho navahiye sabwani vamuralani vawa ahinjivana. Yezu wali woligana, vina wankosa mabasa oligana txino attu enjene anziveliwa na dhilobo dhasemiye! Yezu wanziveliwa venjene na mabasa akosiye. Masiki valiye namalaba wapama, iyene wantamela mudhidhi wozuzumela dhilobo dhomuyani. (Jo. 7:15) Vasogorova akosaga mabasa a mudhidhi wotene, iyene ohawaddela dhahi anamewa aye: “Kamutabuweletxe oja onnongeya, tabuwelani oja ohinnongeya, onkaliha egumi yamukala-kala.” (Jo. 6:27) Mudhidhi wasunzihiye attu Vamwangoni, Yezu ohiloga dhahi: ‘Kapingelani mafumo enyu wirimu.’—Mt. 6:20.

10. Makattamiho gani angumanana attu ena omabasani?

¹⁰ Ononelamo onda wa Mulugu ononikamihedha okala attu ovipimelela sabwa ya mabasa. Ninga Akristu iyo ninosunzihiwa ‘ottiddaga mabasa apama.’ (Ef. 4:28) Dila dhina azugu ehu anowonaga mabasa anttiddihu vina anofiyedhaga onaddela wi anovaha ttima mabasa ehu. Sabwa ya oziveliwa na mabasaya, txino ninodhaga oroma olaba mawora menjene na efunelo ya wi azugu ehu akane monelo wapama sabwa ya Anamona a Yehova. Omamalelowa ninodhaga ononelamo wi ninoroma opwaza muttoro wehu wowazuzumela anamudhi vina ozuzumela mabasa omuyani. Ninofwanyela okosa matxinjo—wi nikane monelo wopimeleleya.

11. Txini esunzile mbali mmodha sabwa yokana monelo wopimeleleya na mabasa?

¹¹ Mbali wa muzombwe onkuweliwa William ohisunza na mbali mmodha ttima ya okana monelo wopimeleleya sabwa ya mabasa. Atanalelaga sabwa ya munddimuwa wa mulogo wali mwinya wa empreza, William ohiloga dhahi: “[Mbali oddu] yotagiha yapama wa muttu ona monelo wopimeleleya wa mabasa. Iyene namalaba wa pama vina abale angula dhilobo na iyene anoziwa wi onottidda mabasa apama. Mbwenye omagomo wa labo mabasaya agagoma iyene onottiya mabasa vamburoniva baroma wazuzumela amudhaye vina dhilobo dhomuyani. Onoziwa? Iyene muttu wowagalala omuziwilemi!”b

OKANA MONELO WOVIPIMELELA WA IYO NANYA

12. Salomau wonihile dhavi wi wahikana monelo wopimeleleya, nanda odhile dhavi oyelela?

¹² Mudhidhi wamulabela Salomau Yehova nororomeleya, iyene wahikana monelo wovipimelela. Bali muzombwe, iyene na oviyeviha wahinonelamo vangomela guru dhaye vina wahikumbira weddihiwa na Yehova. (1 Amwe. 3:7-9) Omaromo wa omwene waye, Salomau wanziwa wopiya wa ovitukulela. Iyene ohileba dhahi: “Mundduni mwa opanela mundha otolowa, mundduni mwa ovithukulela mundha okoneya.” (Gano 16:18) Mokubanyiha-mwene, vasogorova Salomau wahittiya ovirihamo malago aba mwigumini mwaye. Movira wa mudhidhi mulamulelani mwaye, iyene wahikala muttu wovittukulela venevo baroma opwaza magano a Yehova. Motagiha, mwa malamulo anfwanyiwa mmaleboni a Hebraiku, nimodhana naloga wi mwene “kàvalanye ayana enjene, wi murima waye onadhe omudduwala Nabuya.” (Olib. 17:17) Salomau wahipwaza nlamulo ntti batela ayana 700 na ena 300, awinjivaya ali amalabo! (1 Amwe. 11:1-3) Enkala ninga Salomau obuwela wi onowodha “wang’anela dhilobo dhetedhene.” Masiki dhawene mwa ovira wa mudhidhi, Salomau wahiputtuleya na dhokosa dhaye bafiyedha okala wolapelana na Yehova.—1 Amwe. 11:9-13.

13. Txini ensunzehu nigatanalelaga sabwa ya oviyeviya wa Yezu?

¹³ Yezu wahikanavi monelo wovipimelela vina wali muttu woviyeviya. Ahinatti odha velaboni ya vati, Yezu ohikosa dhilobo dhinjidhene dhotikiniha mudhidhi waliye na Yehova. Modhela Yezu, “dhetedhene dha odhulu na dha vati, . . .  dhipaddutxiwa.” (Kol. 1:16) Mudhidhi obatiziwiye, enoneya ninga Yezu wahiwodha wubuwela dhilobo dhakosiliye bali na Babe wirimu. (Mt. 3:16; Jo. 17:5) Mbwenye eziwelo eji kiyamukosihile Yezu okala muttu wovittukulela. Mottiyana-mwene, iyene txipo kavittittimiha vari va attu ena. Bali velaboni ya vati iyene wahawaddela anamafwara aye wi ‘iyene kadhele olabiwa, mbwenye odhele walabela attu ena vina opereka egumi yaye wi ekale mukutto wawobolelana attu enjene.’ (Mt. 20:28) Na oviyeviya Yezu ohiloga wi kakosa elobwene ehimurumile Babe. (Jo. 5:19) Oviyeviya gani olagihile Yezu! Iyene ohinittiyedha yotagiha ya pama enfwanyelihu ofwara.

14. Txini ensuzehu na Yezu sabwa yokana monelo wofwanyelela wa iyo nanya?

¹⁴ Yezu ohasunziha anamafwara aye okana monelo wovipimelela. Mudhidhi dhahi, Iyene wahakuluveliha wi: “Nttitti nenyu notene na mmusorhoni, ninoziweya muttengoyá.” (Mt. 10:30) Eji enonipangaraza venjene, makamaka nigaroma okana monelo wohifwanyelela. Eji entapulela wi Babi wehu wa wirimu ononitanala venjene—iyo nili amakamaka vamentoni vaye. Nona txipo kanikosege mavuzo sabwa ya muttongelo wa Yehova, nubuwelaga wi kaninfwanyelela okala alabeli aye vina wakela egumi yohimala mwilaboni eswa.

15. (a) Mwang’aneli onikokomezile okana monelo gani wovipimelela onfwanyelihu wuniwiha? (b) Ninga munlagiha mafoto ali nikuku 24, nigazuzumeletxa dhehuvi, mareliho gani anayelelihu?

¹⁵ Vyaka 15 mundduni, Mwang’aneli ohinikokomeza wi ninofwanyela wunuwiha monelo wapama wa ovipimelela: “Iyo kaninfwanyela wubuwelaga venjene sabwa ya ttima enihu, sabwani ninodhaga okala attu ovittukulela vina kaninfwanyela wubuwelaga wi kanili elo, sabwani ejo enonitotela makattamiho. Ottiya ejo, iyo ninofwanyela okana monelo wovipimelela wa iyo nanya, ninonelegemo dhilobo dhapama dhinkosihu vina dha wobana dhehu. Muyana dhahi wa Mukristu ohigwadda makani aba dhahi: ‘Miyo kaddili muttu wabure nne vina kaddili muttu wamakamakaya. Miyo ddina mikalelo dhominli, dhapama vina dhabure.’”c Dhayene ninga eli attu otene iyo ninoziwa wi japama okana monelo wopimeleleya wa iyo nanya.

16. Yehova onivaheleni ononelamo wi oneddihe?

¹⁶ Modhela Nzu naye, Yehova ononivaha ononelamo wi oneddihe. Iyene ononikwela vina onfuna wi nikane wagalala. (Iza. 48:17, 18) Yosakula ya malago—enfwanyelihu okosa vina enanidhelena wagalala onddimuwa—kuwika dhofuna dha Yehova vamburoni voroma mwigumini mwehu. Iyo nigakosa dhawene, ninele orabela makattamiho menjene agatoteyile sabwa ya ozuzumela venjene kobiri, mabasa obe ovizuzumeletxa nanya. Nona muttu-muttu wa iyo akale wa malago vina agalalihe murima wa Yehova!—Gano 23:15.