Kala Wovisasanyedhene Labo na Yehova Nihinafiya

1. Txini enfwanyelihu okosa wi niviluwe labo na Yehova?

BIBILIA agalogaga labo na Yehova, onaddana mudhidhi onattonge Yehova amwiddani aye vina onavune iyene nlogo naye. Masaka a mundduni, Yehova wahatxinutxa amwiddani aye. (Iza. 13:1, 6; Ezek. 13:5; Sof. 1:8) Masaka abano, labo na Yehova ninele oroma na olupeliwa wa Babilónia Munddimuwa ninagomele mukoddoni ya Armagedon. Wi niviluwe labo ntto, iyo ninofwanyela ovisasanyedha ovanene. Yezu ohisunziha wi ninofwanyela okala womala-nawale “goyi enddimuwa” ehinafiya ottiya ejo ninofwanyela okala txenjewa.—Mt. 24:21; Lk. 12:40.

2. Mazu ali va 1 Tesalónika annipuriha dhavi?

² Mukartani yoroma yalebele Paulo akadda Tesalónika, iyene wahilabihedha misibo dhigakamihedhile Akristu okala omala-nawale labo ninddimuwa na Yehova vina labo n’ottonga waye. Paulo wanziwa wi labo na Yehova kanigafiyile mudhidhene obule. (2 Tes. 2:1-3) Masiki dhawene, iyene wahalibiha abalaye wi anfwanyela ovisasanyedhela labo ntti ekalaga ninga ninfiya mangwana, iyo vina ninofwanyela olabihedha nlago ntti. Ndowe none dhowakula dha mavuzo aba: (1) labo na Yehova nigafiyile dhavi, (2) bani ahinaviluwe, (3) ninawodhe dhavi ovisasanyedha wi niviluwe?

LABO NA YEHOVA NINAFIYE DHAVI?

3. Labo na Yehova ninladdanihiwa dhavi na odha wa mbava na mattiyu? (Koona vina foto.)

³ “Onladdana na wa mbava, ondha na mathiyu.” (1 Tes. 5:2) Eji dila yoroma mwa dila ttaru dhilabihedhi Paulo mazu a nladdaniho wi atapulele odha wa labo na Yehova. Ambava anowiya nomaguva, dila dhina aniya namattiyu mudhidhi ohinjedhela attuya wi awene anele ofiya. Labo na Yehova vina ninele ofiya na rurumutxa ottiya ejo ninele warurumutxa attu enjene. Akristu ebaribari txino anodhaga orurumutxeya na mukalelo onapadduwe dhilobodha na namaguve. Mbwenyi mottiyana na attu abure, iyo kaninatolotxiwe.

4. Labo na Yehova ninladdana dhavi na muyana ofiyedhiwe nsaka n’obala?

⁴ “Ninga wa muyana, ofiyedhiwe nsaka n’obala.” (1 Tes. 5:3) Muyana onjedhela okana mwana kanziwa mowakwana-mwene mudhidhi onakaniye mwanaya. Masiki dhawene iyene onoziwa wi onele okana mwana. Mbwenyi sikuna n’obala nigafiya, ninkala na rurumutxa, wiwa opa vaddiddi vina kayiwo elobo entximiha dhilobo esi. Na mukalelo wakakene, iyo kaninziwa labo vina mudhidhi ninafiye labo na Yehova. Mbwenyi iyo kaninaganyedha wi siku ninattonge Yehova attu abure ninele ofiya morurumutxa vina kuli elobo enatximihe.

5. Goyi enddimuwa enladdana dhavi na warya wa vati voya?

⁵ Ninga warya wa vati voya. Musibo wanoraru ologile Paulo onaloga ambava aniya na mattiyu. Mbwenyi mudhidhi obu Paulo wahiladdaniha labo na Yehova na warya wa vati voya. (1 Tes. 5:4) Ambava ageyaga na mattiyu ankala ozuzumene ahonaga wi mudhidhi onovira. Warya wa vati voya onowattukulela awene ottiddiwa. Dhahene ninga warya wa vati voya, goyi enddimuwa enele wavitula abale ankala ninga ambava, andowavi akosaga dhilobo dhabure dhinimusilidha Yehova. Mottiyana na awene, iyo ninofwanyela orabela dhilobo dhotene dhinimusilidha Yehova vina nididele oveda “ofewa murima, yeddelo yoligana, vina ebaribari.” (Ef. 5:8-12) Vasogorhova Paulo ohiloga maladdaniho meeli anatonya abale ahinaviluwe.

BANI OHINAVILUWE LABO NA YEHOVA?

6. Na mukalelo gani onlagiha attu enjene wi anogona? (1 Tesalónika 5:6, 7)

⁶ “Anamagona.” (Kengesa 1 Tesalónika 5:6, 7.) Paulo ohaladdaniha abale otene ahinaviluwe labo na Yehova na anamagona. Awene kanziwa dhimpadduwa vina ovira wa mudhidhi. Nona, egapadduwa elobo yamakamaka awene kanziwa vina kantanala esuwene. Masaka abano attu enjene anogona mpaddi womuyani. (Rom. 11:8) Awene kannonelamo wi iyo ninkalawo “masiku omariha” vina wi goyi enddimuwa enele ofiya momaguva. Agapadduwa matxinjo manddimuwa mwilaboni attu ena anozuzumela wiwa miselu dha Omwene. Mbwenyi, mwa mudhidhi mung’onovi awene anowiyelela ogona ottiya okala mento. Abale anziwa wi labo n’ottonga ninele ofiya anubuwela wi kaninafiye ovanene. (2 Ped. 3:3, 4) Mottiyana na awene, iyo ninoziwa wi ninofwanyela ovyag’anela siku na siku.

7. Abale anatolotxiwe na Mulugu anladdana dhavi na anamalezela?

⁷ “Anamalezela.” Murumiwi Paulo ohaladdaniha attu anatolotxiwe na Mulugu na anamalezela. Anamalezela kanziwa mowakwana-mwene enapadduwela vina awene anokosa dhosakula dhohifwanyelela. Na mukalelo wakakene, attu abure kanrumela dhotxenjeriha dha Yehova. Awene anofwara dila enattukulela wutolotxiwani. Mbwenyi, Akristu anowaddeliwa wi anofwanyela okala attu ovipimelela. (1 Tes. 5:6) Namasunza dhahi wa Bibilia ohiloga wi “muttu wovipimelela onovyang’anela, onofwasa, kankala wozuzumene, iyene onowubuwela pama vina onokosa dhosakula dhapama.” Enfuneyela nni okala wofwasene vina wovikomene? Wi ninavitaganyihe na politika vina owanawana wa mwilaboni. Venevo vanaddamela labo na Yehova, okukuseliwa okosa mpaddi wa elabo onodhaga wunuwa. Masiki dhawene, iyo kaninfwanyela ozuzuma na ejile enakosihu ejoya egapadduwa. Muya wa Mulugu onowodha onikamihedha okala wofwaseya vina okosa dhosakula dha malago.—Lk. 12:11, 12.

TXINI ENFWANYELIHU OKOSA WI NIVISASANYEDHELE LABO NA YEHOVA?

8. 1 Tesalónika 5:8 onloga mikalelo gani esuwene dhinanikamihedhe okala attu ovyang’anela vina ovipimelela? (Koona vina foto.)

⁸ Nabale yabalo ya mujila vina txapewa wamujila. Paulo ohiniladdaniha na anyakoddo ankala txenjewa vina anabala guwo dha mukoddoni. (Kengesa 1 Tesalónika 5:8.) Munyakoddo onofwanyela okala womala-nawale wi mudhidhi-mudhidhivi ogakalawo koddo arabe koddoya. Eji jinfuniwana iyo okosa. Wi nihidduwale labo na Yehova ninofwanyela wabala yabalo ya mujila kuloga nroromelo vina okwela, ottiya ejo nimwabale txapewa wamujila kuloga njedhelo. Mikalelo esi dhinele onikamihedha vaddiddi.

9. Nroromelo nehu ninnibarela dhavi?

⁹ Yabalo ya mujila enobarela murima wa munyakoddo. Nroromelo vina okwela dhinobarela murima wehu wa nladdaniho. Mikalelo esi dhinele onikamihedha omulabela Yehova vina onfwara Yezu. Nroromelo ninonivaha nikuluvelo nawi Yehova onele onittuva nigamutamela na murima wehu wotene. (Aheb. 11:6) Eji enonittukulela okala oweddeyana na Musogorheli wehu Yezu masiki nifwanyiwaga makattamiho. Iyo ninele owodha olibiha nroromelo nehu modhela osunza mwaha wa abali a masaka ehu awodhile ovilela makattamiho a ofwarafwariwa obe oyelega. Enowodheya vina iyo orabela otameletxa okana kobiri modhela osunza mwaha wa abali avevutxile egumi wi eke dhilobo Dhomwene vamburoni voroma mwigumini mwawa.b

10. Omukwela wehu Mulugu na attu ahinimulabela iyene onnikamihedha dhavi ovilela?

¹⁰ Okwela ononittukulela ovyang’anela vina ovilela. (Mt. 22:37-39) Omukwela wehu Mulugu ononikamihedha olaleya novilela masiki nipattiwaga makattamiho-makattamihovi. (2 Tim. 1:7, 8) Vowi iyo ninowakwela abale ahinimulabela Yehova, ninodhowavi nilaleyaga mmuruddani mwehu, nilabihedhaga telefoni obe makarta. Iyo kaniniyelela mundduni ninojedhela wi labo-labovi abale ahinimulabela Yehova anele otxinja mweddelo wawa baroma okosa dhilobo dhapama.—Ezek. 18:27, 28.

11. Wakwela abali onnikamihedha dhavi? (1 Tesalónika 5:11)

¹¹ Iyo vina ninowakwela abali ehu. Ninotonyihedha wakwela abali ehu modhela olibihana vina okamihedhana. (Kengesa 1 Tesalónika 5:11.) Dhahene ninga munkamihedhana anyakoddo mukoddoni, iyo vina ninolibihana. Ebaribari wi enodhaga opadduwa, munyakoddo onvoreya mukwaye s’ofuna mukoddoni mbwenyi iyene kagakosile ejuwene nofuna. Na mukalelo wakakene, iyo txipo kanigafunile omunyimula mbalihu obe murogorihu vina wiyihedhana obure na obure. (1 Tes. 5:13, 15) Enowodheya iyo otonyihedha okwela modhela wariha abali attomeliwe weddiha mulogo. (1 Tes. 5:12) Mudhidhi olebile Paulo karta ntti, mulogo wa Tesalónika wela witiwa-wene. Alobwana attomiwe wi asogorhele mulogoya sabwa ya ohikana eziwelo yinjene ankosa dhovonya. Masiki dhawene, awene anfwanyela orihiwa. Vowi goyi enddimuwa enowaddamela, txino enele ofuneya iyo okumbirha nikamihedho na anddimuwa a mmulogoni venjene opitta munkoselihu ovanene. Enodhaga opadduwa iyo ohikanaga miselu dha kwatti enddimuwa obe o filiali; nona jamakamaka iyo osunza wakwela vina wariha anddimuwa a mmulogoni ovanene. Kintanala enapadduwe, iyo nigakana ovipimelela kaninazuzumele dhovonya dhawa, mbwenyi ninele otamalela sabwa ya Yehova omuttoma Yezu wi aweddihe alobwana aba.

12. Njedhelo nimbarela dhavi mubuwelo wehu?

¹² Dhahene ninga txapewa wa mujila ombarela musorho wa munyakoddo, njedhelo nehu ninobarela mubuwelo wehu. Na njedhelo noliba, iyo ninozinddiyela wi dhinvaha elabo eji kadhina ttima. (Fil. 3:8) Njedhelo nehu ninonikamihedha okala ofwaseyene vina ovikomene. Jijene ekosile Wallace na Laurinda, alaba o Afrika. Mwari mwa sumana ttaru, awene ahayelela anamudhi awa mukwani. Sabwa ya pandemia ya COVID-19, awene kawodhile wiyelela vatakulu wi akale vamodha na amudhawa. Wallace ohileba: “Njedhelo na ovenyihiwa mukwani, niddikamihedha wawubuwela mukalelo onakalani mwilaboni eswa, ottiya mukalelo walani omagomelo wa elabo eji. Njedhelo ntti, ninoddikamihedha okala wofwasa mudhidhi onkala miyo okubanyene obe mudhidhi onawubuwelimi attu ayelelimi mukwani.”

13. Txini enfwanyela iyo okosa wi nakele muya wokoddela?

¹³ Muhibarele dhinira muya wokoddela. (1 Tes. 5:19) Paulo ohiladdaniha muya wokoddela na motto oli mwari mwehu. Iyo nigakana muya wokoddela wa Mulugu, ninele okala attu ovilibihedha, ninotamela okosa dhilobo dhapama vina ninokana guru yomulabela Yehova. (Rom. 12:11) Txini enfwanyela iyo okosa wi nakele muya wokoddela? Ninofwanyela okumbirha modhela nlobelo, osunza Nzu na Mulugu, vina otugumana na nlogo nineddihiwa na muya wokoddela. Okosa esene dhinele onikamihedha okana mikalelo “dhimbala muya.”—Gal. 5:22, 23.

14. Txini enfwanyelihu orabela akala ninofuna odhowavi nakelaga muya wokoddela? (Koona vina foto.)

¹⁴ Mulugu aganivaha muya waye wokoddela, ninofwanyela okala txenjewa wi dhokosa dhehu dhinabarele muya wokoddela. Mulugu onavaha muya waye wokoddela abale ana mubuwelo wotxena vina ankosa dhilobo dhapama. Iyene kananivahe muya waye wokoddela akala iyo ninowubuwela dhilobo dhonyakuwa vina ninokosa dhilobo dhabure. (1 Tes. 4:7, 8) Iyo ninele odhowavi nakelaga muya wokoddela nigahipwaze mavuhulo. (1 Tes. 5:20) Mazu aba mavuhulo anlogiwa va nlebo ntti antapulela miselu dhinnivaha Yehova modhela muya waye wokoddela, enowiwanana na labo na Yehova vina waddamela wa ogoma wa elabo. Iyo kaninfwanyela wubuwela wi Armagedon kanafiye ovanene. Ottiya ejo, ninotonyihedha wi—ninojedha odha wa Armagedon mohigonela—modhela weddaga vamentoni va Mulugu “n’ekalelo ya athu avilevele iyene” vina labo na labo okana mweddelo wokoddela.—2 Ped. 3:11, 12.

“PIMANÍ DHETENE”

15. Ninarabele dhavi onyengettiwa na miselu dhottambi dha adomonyo? (1 Tesalónika 5:21)

¹⁵ Mohigonela, amwiddani a Mulugu anele ologa: “Dhetedhene dhifwasa, kulí yawopiha!” (1 Tes. 5:3) Miya dhabure dhinele wattukulela attu omwadha miselu dhottambi dhinanyegette attu enjene. (Ovuh. 16:13, 14) Ki iyo? Miselu esi kadhinanipupurutxe akala “[ninopima] dhetene.” (Kengesa 1 Tesalónika 5:21.) Na elogelo ya Egregu nzu ntti opima nalabihedhiwa wi epimiwe mijila dha ttima (metal). Iyo ninofwanyela opima dhiniwehu vina dhinengesihu wi none akala s’ebaribari. Eji yali yamakamaka mwa akadda Tesalónika, vina jamakamaka mwa iyo veneva vanaddamela goyi enddimuwa. Nihinatti orumela dhilobo dhinloga attu, ninofwanyela olabihedha ewodhelo yehu ya wubuwela wi nipime dhinengesihu obe dhiniwihu na esile dhinloga Bibilia vina dhinloga nlogo na Yehova. Nigakosa dhahene, iyo kaninapupurutxiwe na miselu dhottambi dhinloga adomonyo.—Gano 14:15; 1 Tim. 4:1.

16. Njedhelo gani nina iyo nanda njedhelo ntti ninnittukulela okosa eni?

¹⁶ Ninga nikuru, iyo ninoziwa wi nlogo na Yehova ninele oviluwa mu goyini enddimuwa. Mbwenyi muttu-muttu wa iyo, kanziwa enapadduwe mangwana. (Tia. 4:14) Akala iyo ninele wona goyi enddimuwa obe kaninone, iyo ninele wakela egumi yohimala nigakalavi attu ororomeleya. Attikitteliwi anele okala wirimu na Yezu. Mabila mena anele okalaga velaboni ya vati mparaizu. Nona iyo notene nizuzumele njedhelo nehu nowagalaliha vina nikale ovisasanyedhene nijedhaga labo na Yehova!