1925—Vyaka Zana Mundduni

NLOGO NA MULUGU NANFWANYELA ODHOWAVI NIJEDHAGA

Anamasunza enjene a Bibilia obuwela wi elabo egahikala Paraizu yaka ya 1925. Sabwaya jani? Mbali Albert Schroeder, odduwene wakosa mpaddi wa Nikuru Nolamulela, ohiloga: “Iyo narumela wi attikitteliwi agahidhowa wirimu vina alobwana ororomeleya ninga Davidi na Abrahamu agahivenyihiwa mukwani vina agahikala asogorheli a nlogo na Mulugu velaboni ya vati.” Muhipadduwelani ejoya, abali na arogora ena ahiroma okumuwa.—Gan. 13:12.

Masiki na okumuwa, Anamasunza enjene a Bibilia ahidhowavi azuzumelaga mabasa a olaleya. Vina ahizinddiyela wi olaleya miselu dhapama yali elobo yamakamaka yafwanyelani okosa. Ndoweni none mukalelo omulabihedhilani radiyo wi alaleye attu enjene.

ANAMOONA A YEHOVA AHIMAGA KAMBIRHINYA DHINJENE DHA RADIYO

Yaka ya 1924 attu enjene anvuruwana miselu dhavuwihiwa mu radiyoni WBBR. Nona yaka ya 1925 Anamasunza a Bibilia ahimaga kambirhinya yina waddamana na o Chicago, Illinois. Radiyoya wakuweliwa WORD. Ralph Leffler, okamihedhile omagiwa wa kambirhinya eji ohiloga wi na mattiyu nsaka na eridho attu enjene a mirudda dholapela anwodha omwiwa radiyoya. Motagiha, anamudhi ankala makilometuru okwaranya 5.000 na mburo wali radiyoya, o Alasca, ahivuruwana miselu dhoroma dhavuwihiwe. Mmalelani ovuruwana, ahileba karta wi àtamalele abale àlaba o radiyoniwa sabwa ya ovaviha porogarama eji yomuyani vina yolibiha.

Mwang’aneli wa 1.º wa Dezemburu wa 1925, ohitapulelamo ejile yakosiha porogaramaya ovuruwaniwa na attu enjene. Radiyo oddu wanvuruwaniwa na attu enjene opitta a radiyo ena o Estados Unidos. Attu anwodha onvuruwana radiyo oddu mimburo dhottiyana-ttiyana dh’o Estados Unidos, Cuba vina o norte wa Alasca. Attu enjene àligi ahinatti wiwa miselu dhapama ahilagiha efunelo mmalelani omwiwa radiyo oddu.

Anamasunza a Bibilia anfuna omulabihedha radiyo wi alaleyena miselu dhapama o Canadá. Yaka ya 1924 kambirhinya ya radiyo CHUC yahimagiwa o Saskatoon, Saskatchewan. Radiyo oddu wali oroma wavuwiha miselu mwaha wa relijiau o Canadá. Yaka ya 1925 yanfuneya otamela mburo mwina munddimuwa wi amagewo kambirhinya eswa ya radiyoya. Nona nikuru na Yehova nahimwala mburo walani badhowa o Regent Building, mburo wamalilani ogula, wakosiwa teaturu wale o Saskatoon.

Modhela radiyo oddu, attu enjene àkala sidadi dhing’ono vina murudda dholapela na Saskatchewan ahiwodha wiwa miselu dhapama dila yoroma. Motagiha sidadi dhahi onkala muyana onkuweliwa Graham mmaleliye onvuruwana radiyoya wahinilebela anikumbirhaga manivuru. Mbali George Naish wahiloga wi yokumbirha yaye yali yanamaguve, nona iyo nahimaddarela nivuru Estudos das Escrituras. Momaguva-mwene Graham wahiroma olaleya miselu dhapama dha Omwene mwa dhipaddi dhina dha elabo.

NIHISUNZA EBARIBARI YAMAKAMAKA

Mwang’aneli wa 1.º wa Marsu wa 1925, wahikana mutoma wamakamaka vaddiddi “Nascimento da Nação.” Mutoma obu wakaleleni wamakamaka? Anamasunza a Bibilia anziwa wi Satana mulamuleli wa adomonyo, wa relijiau onyengetta vina wa anyamarhondda a elabo ejino. Modhela Mwang’aneli oddu “mwimeleli wororomeleya vina wamalago” wahakamihedha abali ononelamo wi adhari a Yehova a wirimu vina a velaboni ya vati anowiwanana. Awene kanvittaganyiha na nikuru na Satana, mbwenyi anolaba mumodhani amukamihedhaga Yehova. (Mt. 24:45) Ottiya ejo, mwimeleli wororomeleya vina wamalago wahitapulelamo wi sabwa ya koddo yapadduwile wirimu yaka ya 1914, Satana vamodha na adomonyo aye ahihittamagihiwa wirimu baponyedhiwa velaboni ya vati vina ji yakene eji eromile olamulela Omwene wa Mulugu.—Ovu. 12:​7-9.

Anamasunza ena a Bibilia karumela ononihedhiwamo oku oswa. Nona Mwang’aneliya wahiloga dhahi: “Ninowukokomezani abali, akala ohikalawo muttu ohinrumela na ononihedhiwamo oku oswa avilele vina amukuluvele Yehova adhowagavi amulabelaga na ororomeleya.”

Tom Eyre, wali colportor (ovano onziweya ninga pionero) w’o Grã-Bretanha, ohiloga mukalelo oviwilemo Anamasuza enjene a Bibilia mwaha wa Mwang’aneli oddu: “Abali ahagalala vaddiddi na ononihedhiwa oku wa Ovuhulela 12. Vaziwilihu wi Omwene wa Mulugu wahimetxiwa wirimu, nahikana efunelo enddimuwa ya wawaddela attu ena miselu esi. Eji ehunuwiha efunelo yehu ya olaleya vina ehikamihedha wona wi Yehova onele okosa dhilobo dhinjene dhotikiniha musogorho.”

ANAMASUNZA A BIBILIA AHISUNZA WI ANFWANYELA OVAHA ONAMOONA MWAHA WA YEHOVA

Masaka abano, Anamoona a Yehova anologa dila dhinjene mazu anfwanyeya va Izaiya 43:10: “‘Nyuwo muli anamona aga!’ onloga ddi Nabuya [Yehova]. ‘Nyuwo muli emeleli aga asakulelimi.’” Mbwenyi ehinafiya yaka ya 1925, nlebo ntti kanalabidhiwetxa mmanivuruni mwehu. Ejo yahidha otxinja. Yaka ya 1925, nlebo ntti na Izaiya 43:10 vina 12, nahisekeseriwa Mmwanga’anelini owakwana 11!

Omagomo wa mweri wa Agosto wa yaka ya 1925, Anamasunza a Bibilia ahitugumana wi amoone kongresu o Indianápolis, o Indiana. Mbali Rutherford wahileba miselu wi àmoyele abale adhile omoona kongresuya. Miselu esi dhahipidiwa na porogarama ya kongresuya. Miseludha dhaloga dhahi: “Nidhile va kongresuni oddu wi niwodhe okana guru dha Yehova vina niyelele mabasa ehu a olaleya na efunelo enddimuwa.” Mwari mwa malabo aba 8 a kongresu attu alivo ahikokomeziwa ovaha onamoona mwaha wa Yehova mudhidhi wotene.

Sabuddu labo na 29 wa Agosto, Mbali Rutherford wahikosa diskursu yakokomeza anamewaya onvaha ttima mabasa olaleya, iyene wahiloga dhahi: “Yehova onologa dhahi na nlogo naye . . . : ‘Nyuwo muli anamoona aga; miyo ddili Mulugu wenyu.’ Nona iyene wahiloga mazu aba na lizu noliba: ‘Emetxaní ezinddyelo wi malogo one.’ Attu anwodha onvuwiha Yehova babale aneddihiwa na muya wokoddela sabwani nlogo naye.”—Iza. 43:12; 62:10.

Mbali Rutherford mmaleliye okosa diskursu yaye, iyene wahengesa dukumento dhahi yakuweliwa “Mensagem de Esperaça,” anamwewa otene ahirumela muselu obu wanloga wi kawo Omwene mwina ohili wa Mulugu onvaha njedhelo nowakela “murenddele, egumi yapama, ofuru vina okana wagalala wohimala.” Miselu esi dhahitapuleliwa vina dhahipidhiwa wi dhilabihediwe mmabasani a olaleya. Vina dhahipakiwa muttengo wattamagela 40 milhões.

Vahivira vyaka dhing’onovi wi Anamasunza a Bibilia akuweliwege ninga “Anamoona a Yehova.” Mbwenyi awene andowavi ananolegamo ekalelani yamakamaka olaleya mwaha wa Yehova vina okala anamoona aye.

ANAMASUNZA ABIBILIA AHIROMA WAWIYELELA ABALE ALAGIHA EFUNELO

Venevo vonuwani muttengo wa Anamasunza a Bibilia orugunuwa elabo yotene, yandhowavi ekokomeziwaga wawiyelela abale alagihile efunelo ya wiwa miselu dhapama. Mmaleli kampanya ya opakiwa wa folhetu Mensagem de Esperança, Boletima dhahi yahiloga: “Mwawiyelele abale attiyedhinyu folhetu Mensagem de Esperança.”

Boletim ya Janero wa yaka ya 1925 yahiloga mukalelo waviwilemo Namasunza dhahi wa Bibilia wa sidadi y’o Plano, o Texas: “Nahitikina venjene sabwa ya wiyelela murudda walalelihu wale, sabwani dila eji nahinwodha okana dhopurelamo dhapama mottiyana na mirudda dhina dhiswa. Murudda dhahi wa sidadi yehu yahilaleyiwa dila tanu mwa vyaka kumi dhivirile. . . . Ovanenevi, murogora Hendrix vina mmani yahiyelelawo wili sidadi ejile vina ahipaka manivuru menjene opitta vyaka dha mundduni.”

Mulobwana wali colportor wa elabo ya o Panamá, ohileba dhahi: “Attu enjene addittamagihile vatakulu vawa dila yoroma yalaleyelimi, ahiddakela deretu dila yanawili vina yanoraru. Mabasa aga menjiya yakejino, ba wawiyelela abale alaleyelimi wale vina dinokanaga dhotagiha dhinjene dhapama na awene.”

NLOGO NA MULUGU NANFWANYELA OJEDHELA DHA MUSOGORHO

Omagomo wa yaka ya 1925 Mbali Rutherford ohalebela apionero vina ohitapulelamo mabasa olaleya akosiwe yakenejile vina yafwayelani okosa musogorhomwa. Iyene ohiloga dhahi: “Yaka evirile abali ahikana gari ya wapangarhaza abale àli okubanyene. Okosa mabasa aba ehinidhelana wagalala . . . Yaka ejo endawo, abali anele okana gari yovaha onamoona mwaha wa Mulugu vina Omwene waye wi alagihe bani onimwebedhani txibarene. . . . Iyo notene nidhowegevi nimwibelaga Mulugu wehu oli Mwene.”

Omamalelo wa yaka ya 1925 abali ahikosa masasanyedho wi onuwihe Beteli yo Brooklyn. Yaka ya 1926 egahiroma mabasa mandimuwa omaga a Anamoona a Yehova.