Ddigalobela, Mulugu Onele Oddikamihedha-wene?

Yowakula ya mBibiliani

Ndde, Mulugu onowakamihedha attu animukumbira dhilobo dhiniwanana na efunelo yaye. Masiki akala kunakosaga nlobelo, txino onottukuleleya okosa ejuwene sabwa ya wengesa mBibiliani dhotagiha dha attu amulobelele Mulugu akumbiraga nikamihedho, ninga motagiha:

• ‘Ddikamihedhení Yehova Mulugu waga; ddivunení na okwela wenyu wowedeyana.’—Masal 109:26.

• ‘Eee Yehova, ddili musegedheyi vina muhawi, aguvelani oddivuna.’—Masal 9:6, Bibilia na elogelo ya siku-siku.

Enowoneya-wene wi mulebi wa mazu aba wahikana nroromelo noliba vaddiddi. pumwenemo, Mulugu onowavuruwana otene animutamela na efunelo yapama, vina abale ana ‘murima wosuveya’ obe ‘muya wokumuwa.’—Masal 34:18.

Kuwubuwele wi Mulugu oli wolapelana vaddiddi vina kantanala makattamiho awo. Bibilia onloga dhahi: ‘Masiki Yehova akalaga munddimuwa, onomwang’ana mukurumuwi vina onomuziwa wolapela-wene muliba opanela.’ (Masal 138:6) Dila dhahi, Yezu wahawaddela anamafwara aye: ‘Nttitti nenyu notene na mmusorhoni, ninoziweya muttengoya.’ (Mateu 10:30) Mulugu onoziwa dhilobo mwaha wa weyo, dhihinziwa weyo wamunya. Koddi iyene agahikodda ovuruwana malobelo awo, venevo vanimukumbiriwe nikamihedho wi okwaranye mazuzumo awo?—1 Pedro 5:7.