Koddi Bibilia Onowodha Wukamihedha—Akala Okana Eredda Ehina Murobwe?
Yowakula ya mBibiliani
Ndde. Mulugu onomutanala mudhari waye oli muredda. Bibilia onopikirhela: ‘Nsaka na obulela, Yehova onomukaliha vakuguluni vaye; mmureddani mwaye, onompangarhaza.’ (Masal 41:3) Akala weyo okana eredda ehina murobwe, malago aba anele wukamihedha:
Olobele okumbiraga nikamihedho wi owodhe ovilela. Wakela ‘Murenddele wa Mulugu, ompitta ttontto ya muttu,’ enodhaga wukamihedha ovugula odhugudheya wawo vina wukamihedha ovilela.—Filipi 4:6, 7.
Okane monelo wapama. Bibilia onloga: ‘Murima woteya onkala murobwe onvulumutxa, oribiwa murima onowumiha makuva.’ (Gano 17:22, Bibilia na elogelo ya siku na siku) Kavilibihedhe okana emweru-mweru, sabwani ottiya wukamihedha ovilela okubanya ejo enele wukamihedha okana egumi yapama.
Kalibiha njedhelo nawo na dhamusongorho. Okana njedhelo enodhaga wukamihedha okana ottaba, masiki okalagawo na eredda ehina murobwe. (Roma 12:12) Bibilia opikirhela wi ninele ofiya nsaka ‘nihinakalewo muttu onaloge: ‘miyo ddili muredda’’ (Izaiya 33:24) kuloga Mulugu onele ogomiha maredda otene ahina mirobwe, ejuwene ehinwodheya masaka abano na ewodhelo ya siensiya. Ninga motagiha, Bibilia onologa mukalelo onfuna attu wiyelela okala azombwe na mazu aba: ‘Maningo aye anele okaloa masawa opitta a muzombwe, iyene onele wiyelela masaka a muzombweni mwaye vaniye guru.’—Job 33:25.
Nota: Masiki arumelaga wi Mulugu onovaha nikamihedho, Anamoona a Yehova anotamela nikamihedho na amediku agakana eredda ehina mirobwe. (Marko 2:17) Mbwenye kaninvaha malago a murobwe onfwanyela olabihedhiwa, ninottiya wi muttu-muttu akose dhogana dhaye.