Tamela Wanddana Na Attu Ottiyana-ttiyana
Niparha na Makaniya
Nigatamelaga warabela attu ahinziveliwehuna ninelege wunuwihavi watanya wehu. Vina nigatamelaga okana omarho na abale anziveliwehuna ninele ottukuleleya wubuwela wila mukalelo wehu wa okosa dhilobo bukaliletxe opitta wa attu ena.
Txini Dhinloga Bibilia
“Ddirelení yokokene, muddifugulelaga [murima] wenyu.” —2 KORINTO 6:13.
Eji enttapulela nni? “Murima” masaka meena onaddiwana dhubuwelo na merelo ehu. Akala iyo ninoroma wakwela abale anligana na iyo, murima wehu onela ofugeleya na attu abo bahi. Wila niwodhe orabela murega obo ninofwanyela ogana okala amarho a attu anarabelihu.
Otamela Wandana na Attu Ottiyana-Ttiyana Onnikamihedha Dhavi
Nigamuziwa muttu mwawakwana-mwene, ninoroma ononelamo sabwaya enubuweliye na mukalelo wottiyana na wehu. Vina nigakala wofiyedheya na iyene ninoroma omoona ninga mmodha wa nikuru nehu. Dhawene ninelege omuriha venjene vina ninelege oziveliwa okala vamodha na iyene.
Karoma wona empaduwele Nazaré. Iyene wahikaana emanya ya watanyaga anawedda. Vasogorhova ohiloga emukamihedhile: “Miyo ddahigana oroma okala na awene, vina nilabaga vamodha. Ddeddetxa n’abale eddiwetxa na attu enjene a mmuruddani mwakalihu. Ddahidha waziwa attu anna elemelelo yottiyana vaddiddi na ejile yaloga attu a mwilaboni mwaga. Muttu agasunza yeddelo yottiyana-ttiyana, onozinddiyela wi dhinloga attu ena dhihittiyana vaddiddi na esile dhili attuya anlogeliwa; venevo onoroma oziveliwa na awene, onowakwela vina onottittimiha ejile elani.”
Txini Enfwanyeliwe Okosa
Katamela gari ya ologa na attu a elabo, nihimo obe elogeloya yottiyana na yawo. Ogafuna
Omukumbirhe wi awaddelelemo mwaha wa yeddelo yawa.
Omuwobe wi muje elobo-txilobo vamodha.
Ovuruwane dhologa dhawa vina ottamele wona ttima enani.
Akala weyo onotamela oziwa dhapadduwele mwigumini mwawa, onela okana efunelo ya ottittimiha nikuru nawa.