NIPADDUWO 9
Noe Ohimusema Pangaya
NOE wahikaana muyana vina ana araru. Mazina a ana aye aali Semi, Kaani, na Jafe. Nanda kadda mwana wahikaana mwadhiye. Noona murala wa Noe wana athu atanu na araru.
Venevo Mulugu wahimuruma Noe okosa elobo yakooddile oziwiwa. Iyene wahimpanga wila amuseme pangaya munddimuwa. Pangaya oddu wali muwulu ninga paporo, mbwenye oddu wakaliletxe ninga kasha enddimuwa yolapa. Mulugu wahiloga wila ‘kamukose wa dhipaddi tharu dhowelana nanda kamwike makambirhinya.’ Kambirhinyadha dhali dha Noe na murala waye, dhinama vamodha na dhoja dhigafunile awene otene.
Mulugu vina wahimpanga Noe wila anfuge deretu pangayaya wila muhivolowe manje. Mulugu wahiloga dhahi: ‘Ddinfuna ddidhihe mpulo munddimuwa wa manje nanda dditolotxe elabo yotene. Muthu wotene ohinaakale mpangayani onela okwa.’
Noe na ana aye aahimwiwelela Yehova nanda aahiroma omusema pangaya. Mbwenye athu ena ela oteya bahi. Awene aahikalavi athu abure. Noe mwapangeliye ejile yafuna okosa Mulugu kavo wamurumeeli.
Ohivira mudhidhi mwinjene wa omusema pangaya sabwani wali munddimuwa vaddiddi. Omagomelowa, muvireli vyaka dhinjidhene, pangaya oddu wahigomihiwa. Venevale Mulugu wahimpanga Noe wila adhena dhinama wila avolotxe mpangayani. Mulugu wahimpanga wila malogo mena adhena biili biili kadda nlogo, pogo na mukolo. Mbwenye malogo mena a dhinama, Mulugu wampangile Noe wila adhena tanu na biili dha kadda nlogo. Mulugu vina wahimpanga Noe wila adhenamo malogo otene othiyana thiyana a balame. Noe wahikosa txibarene ninga mwalogeli Mulugu.
Mumaleliye, Noe na murala waye aahivolowa vina mpangayani. Venevo Mulugu wahifuga musowoya. Mwari mpule, Noe na murala waye aahijeedhela. Ovanene katanaalela weyo buli mpangayani na awene bugajeedhela. Onela okalawo wene mpulo ninga mulogeli Mulugu?
Wita 6:9-22; 7:1-9.