NIPADDUWO 22
Zuze Ohikiwa Mu Kambura
ZUZE ona vyaka 17 bahi dha obaaliwa muthukuleliwiye wiJipito. Wenewale iyene wahigulihedhiwa mulobwana watxemerhiwa Potifari. Potifari onimulaba mwene wa Ejipito, ontxemerhiwa Farao.
Zuze onomulaba na guru vaddiddi mbuya waye, Potifari. Noona Zuze munuweliye, Potifari ohimuthoma ninga mwañganeli wa numba yaye yotene. Kito Zuze okalelini mu kambura mpu? Sabwa ya mwadhi Potifari.
Zuze ohunuwa bakala mulobwana wokoddela vaddiddi, nanda mwadhi Potifari onfuna agone na iyene. Mbwenye Zuze ohiziwa wila eji jabure, nanda iyene kanaakose eji. Mwadhi Potifari ohiludduwa vaddiddi. Noona mamunaye mudheeliye vatakulu, iyene ohizivala bagampanga dhahi: ‘Zuze oddule wabure wafuna addigonihe!’ Potifari ohimuroromela mwadhiye, nanda iyene ohiludduwa vaddiddi na Zuze. Noona iyene ohinfugeliha mu kambura.
Mohigoneela mwañganeli wa kamburaya ohoona wila Zuze muthu waderetu. Noona iyene ohimuthoma ninga mwañganeli wa afugeliwi ena otene. Vasogorhova Farao ohidha oludduwa na namaperheka waye wa dhomwa na namooba mikathe waye, nanda ohawika mu kambura. Omathiyu dhahi kadda muthu ohikaana yoroha ya vawoka, mbwenye awene kanziwa mutapuleloya wa dhoroha dhawa. Mmangwananimwa Zuze ohiloga dhahi: ‘Kaddipangeni dhoroha dhenyu.’ Nanda mukoselani eji, Zuze, na nikamihedho na Mulugu, ohapanga ejile entapulela dhoroha dhawa.
Wa namaperheka dhomwa, Zuze ohiloga dhahi: ‘Mwari mwa masiku mararu weyo onela oburutxiwa mu kambura, nanda onela okala wili namaperheka dhomwa wa Farao.’ Noona Zuze ohenjedhedha: ‘Ogabudduwa, kampange Farao mwaha wa miyo, nanda kaddikamihe obudduwa mumburoni mpu.’ Mbwenye wa namooba mikathe, Zuze ohiloga dhahi: ‘Mwari mwa masiku mararu bahi Farao onela ogwadda musorho wawo.’
Mwari mwa masiku mararu eji ehipadduwa wene ninga mwalogeli Zuze. Farao ohigwadda musorho wa namooba mikathe. Mwa dhaene, namaperheka dhomwa ohiburutxiwa mu kambura nanda ohiroma omulaba wili mwene. Mbwenye namaperheka dhomwa ohidduwala dhotene mwaha wa Zuze! Iyene kampangile Farao mwaha wa iyene, nanda Zuze ohikalavi mu kambura.
Wita 39:1-23; 40:1-23.