NIPADDUWO 21
Abali A Zuze Ahimwidda
KOONA mukalelo onkubanya vina osegedheyile muzombwe oddu. Oddu ddi Zuze. Abali aye alomuguliha wene na alobwana aba andowa wiJipito. Wenewo Zuze onela okala mudhari. Abali aye akoseli eni elobo eji yabure? Sabwani awene anomukaanela aje Zuze.
Babi wawa Yakobi wanziveliwa Zuze vaddiddivene. Iyene wahilagiha wila onombona modheela omusonihedha iyene kapoti wolapa vina wokoddela. Abali aye 10 anddimuwaya moonelani mukalelo wamukwela Yakobi Zuze, awene aahiroma omukaanela aje vina omwidda Zuze. Mbwenye wahikala vina sabwa yina yamwiddelani.
Zuze wahikaana dhoroha biili. Mwa dhoroha dhobiili dha Zuze abali aye aahimukokorela iyene. Zuze mwapangeliye abali aye dhoroha esi, awene ahithabwiha omwiddawa.
Dhaene siku nimodha abali anddimuwaya a Zuze bagakumbuza mabila a babi wawa, Yakobi ohimukumbirha Zuze wila adhowe oone mukalelo olani. Abali a Zuze mmoonelani iyene bagadha, ena mwa awene ahiloga dhahi: ‘Ndoweni nimpe!’ Mbwenye Rubeni, mbali munddimuwa, ohiloga dhahi: ‘Nne, munakose ejo!’ Othiya ompa, awene ahimuthidda Zuze nanda ahinvokedha muntxelani nowuma. Mumalelani awene ahigilati wila alaganele ejile yafunani omukosana.
Mudhidhene obu alobwana ena a Aismaeli ahifiya. Yuda ohiloga na abali aye dhahi: ‘Ndoweni nimugulihedheni Aismaeli.’ Nanda ji ejene ekosilani. Awene ahimuguliha Zuze na muthengo wa kobiri dha mijila 20 dha parata. Oku wali otabala vaddiddi vina otuwa thagaraga!
Abali aye anampange eni babi wawa? Awene ahipa mbuzi nanda ahimbwiniha wili wili kapoti wokoddela wa Zuze munikamini na mbuzi. Nanda mumalelani ahimuthukulela kapotiya vatakulu ahimperhekela babi wawa Yakobi nanda aahiloga dhahi: ‘Nihifanya eji. Kamwañgane oddu, nanda kamoone akala kayo kapoti wa Zuze.’
Yakobi ohimoona wila ddi oddwene. ‘Enama ya mwini txino ehimpa Zuze,’ iyene onokuwa. Ji ejene wene yafuna abali a Zuze wila babi wawa obuwele. Yakobi onokubanya vaddiddivene. Iyene ohilila mpaka masiku menjene. Mbwenye Zuze kakwile. Ndoweni noone txini empadduweli okule othukuleliwiye.
Wita 37:1-35.