NIPADDUWO 25
Murala Ohimwalela Wijipito
ZUZE kanwodha viina wañganela mewelo aye. Iyene ohapanga adhari aye otene wila abudduwe mba. Balivo yeka na abali aye, Zuze ohiroma olila. Iyo podi wubuwela mukalelo ontikina abali aye, sabwani awene kanziwa sabwa enlilela iyene. Omagomelowa iyene ohiloga dhahi: ‘Miyo ddili Zuze. Babi waga ohikalawovi?’
Abali aye anotikina vaddiddi mpaka wuma milomo. Awene anowova. Mbwenye Zuze ohiloga dhahi: ‘Ddinowukumbirhani, kasuselani okuno.’ Mukoselani ejene, iyene ohiloga dhahi: ‘Miyo ddili mbali wenyu Zuze, oddule wamugulihedhinyu wiJipito.’
Zuze ohidhowa bagalogavi na thagaraga: ‘Kamuvivahe muladdu sabwa ya nyuwo oddiguliha okuno. Txibarene wali Mulugu waddirumile wiJipito wila ddivune egumi ya athu. Farao wahiddikosa mulamuleli wa elabo yotene ya Ejipito. Noona ovanene keyelani na omaguva wa babi waga nanda mumpange ejene. Nanda mumpange iyene wila adhe akalege okuno.’
Mumaleliye Zuze ohitapula myono dhaye nanda ohakumbatha abali aye, vina ohasosona awene otene. Farao mwiweliye wila abali a Zuze ahidha, iyene ohimpanga Zuze: ‘Kaathiye awene athukule magareta nanda adhowe amuthukule babi wawa na mirala dhawa nanda eyelele okuno. Miyo ddinela wavaha murudda okaliletxe wa mu Ejipito wotene.’
Ji ejene yakosilani. Apa weyo podi omoona Zuze bagagumana na babi waye mudheeliye wiJipito na murala waye wotene.
Murala wa Yakobi wahidha okala munddimuwa vaddiddi. Mudhidhi wamwalelani wiJipito otene vamodhavi aali athu 70, banigamwengesa Yakobi na ana aye vina adhuli aye. Mbwenye wahikala vina awadhi awa, nanda txino vina adhari enjene. Otene aba aahisama wiJipito. Awene aatxemerhiwa Aizraeli, sabwani Mulugu wahisaddula nzina na Yakobi banikala Izraeli. Aizraeli aahidha okala nlogo na va woka vaddiddi na Mulugu, ninga munfunelihu woona musogorho.
Wita 45:1-28; 46:1-27.