NIPADDUWO 24
Zuze Ohaweha Abali Aye
ZUZE onfuna aziwe akala abali aye 10 ahikaanavi obure vina otabala. Noona iyene ohiloga dhahi: ‘Nyuwo muli anamareza. Mudheeli moone apale vobanile elabo yehu.’
Awene ahiloga: ‘Nne, iyo kanili. Iyo nili athu oororomeleya. Iyo notene nili obali. Iyo nali 12. Mbwenye mbali wehu mmodha kawo, nanda ethogoiya oli mmudhi na babi wehu.’
Zuze ohivikosiha okala ninga kanarumeela awene. Iyene ohinfugela mu kambura mbali waye watxemerhiwa Simeoni, nanda ohathiya ena othukula dhoja badhowa mmudhi. Mbwenye iyene ohapanga dhahi: ‘Mugeyelaga, munofanyeela odhana mbali wenyu wa ethogoiya.’
Mwiyelelani mmudhi o Kana, abali aba ahimpanga babi wawa Yakobi dhilobo dhotene dhaapadduwile. Yakobi onokubanya vaddiddi. ‘Zuze kawo,’ iyene onokuwa, ‘ovano Simeoni vina kawo. Kaddinothiyeni omuthukula Bejami mwana waga wa ethogoiya.’ Mbwenye muromeli ovuguwa dhoja dhawa, Yakobi wahifanyeela wathiya awene odhowa na Bejami wiJipito wila athukule dhoja dhiina.
Ovanene Zuze ohawoona abali aye bagadha. Iyene ohiziveliwa vaddiddi sabwa ya omoona mbali waye wa ethogoiya Bejami. Txibarene, kavo mwa awene onziwa wila muthu oddu wa mpaddo munddimuwa ddi Zuze. Ovanene Zuze ohikosa elobo wila aawehe abali aye 10.
Iyene oharuma adhari aye odhaaliha dhoja mmathumbini awa otene. Abali aye s’ohiziwa, iyene oharuma adhari aye vina wika kopo yaye ya thima ya parata mu thumbini na Bejami. Otene mumalelani odhowa nanda mweddelani muna oleddo muñgonovi mu dila, munddunimwa Zuze oharuma adhari aye wathamagela. Mwafanyelani awene, adhari aba ahiloga dhahi: ‘Mwiyelini kopo ya parata ya nabuya wehu?’
Abali aba otene ahiloga dhahi: ‘Iyo kaniyile kopo yaye. Muganfanyana kopoya muthu muthuvi mwa iyo, muthu oddo apiwe.’
Noona adhari aba ahitamela mu thumbini dhotene, nanda ahifanya kopoya mu thumbini na Bejami, ninga munoonela weyo apa. Adhari aba ahiloga dhahi: ‘Nyuwo ena podi odhowa, mbwenye Bejami onofanyeela wiyela na iyo.’ Ovanene abali aba 10 anakose eni?
Otene vamodha na Bejami ahiyelela vatakulu va Zuze. Zuze ohapanga abali aye dhahi: ‘Nyuwo motene podi odhowa mmudhi, mbwenye Bejami onofanyeela ohala apano wila akale mudhari waga.’
Ovanene Yuda ohisusa nanda ohiloga dhahi: ‘Miyo ddigeyelela mmudhi, s’ohikaana muzombwe oddu, babi waga onela okwa sabwani iyene onomukwela vaddiddi. Noona ddinowuthiddani myeddo, kaddithiyeni miyo veneva ddikale mudhari wenyu, mbwenye mmuthiye muzombwe oddu adhowe mmudhi.’
Zuze ohoona wila abali aye ahisadduwa. Awene ahithiya obure vina otabala. Ndoweni noone ejile ekosile Zuze ovanene.
Wita 42:9-38; 43:1-34; 44:1-34.