NIPADDUWO 41
Nowa Ya Safurhi
ENKALA ninga nowa ya txibarene epotheelile muri? Eji kayo ya txibarene. Nowa eji ekosiwe na safurhi. Yehova wahimpanga Moize wila atomeye nowa eji vamurini wila athu añganege nanda akalegewovi. Mbwenye nowa dhiina dhili vati sa txibarene. Esi dheela waluma athu vina wabuleliha. Weyo onoziwa sabwaya?
Sabwani Aizraeli eela ologa momusadduwela Mulugu vina Moize. Awene aahiloga thogorogo: ‘Oniburutxelini wiJipito wila nikwe mwiddeddereni mpu? Mpuno kamuli dhoja obe manje. Nanda iyo kaninwodha viina oja mana aba.’
Mbwenye mana yoja yaderetu. Modheela ntikiniho Yehova weela wavaha awene. Nanda modheela ntikiniho iyene weela wavaha vina manje. Mbwenye athuya kaatamaalela mukalelo waakoya Mulugu. Noona Yehova ohiruma nowa esi dhowopiya wila aasothothe Aizraeli. Nowadha dhihaluma awene, nanda enjene mwa awene ahikwa.
Omagomelowa athuya ahinfiyedha Moize nanda ahiloga dhahi: ‘Nihithega, sabwani nihiloga momusadduwela Yehova vina weyo. Ovanene kalobela wa Yehova wila aburutxevo nowa esi.’
Noona Moize ohilobelela nlogo. Nanda Yehova ohimpanga Moize wila akose nowa eji ya safurhi. Iyene ohiloga wila eeke nowa eji vamurini, wila muthu muthuvi agalumiwa añgane nowa eji. Moize ohikosa txibarene ejile elogile Mulugu. Nanda athu abale aalumiwa annañgana nowa ejile ya safurhi nanda anvulumuwa wili.
Ohikala nsunzo ninfanyeela osunziwa mwa ejene. Iyo notene nili, na mukalelo mwina, ninga Aizraeli abale aalumiwa nowa esile. Notene nili mmukaleloni mwa okwa. Kañgana mpaddi wotene, nanda weyo onela woona wila athu anowuluvala, anobulela, vina anokwa. Eji eli dhaene sabwani mulobwana na muyana woroma, Adamu na Eva, aahimusadduwela Yehova, nanda iyo notene nili ana awa. Mbwenye Yehova ohikosa musasanyedho wila iyo niwodhe okalawo na mukalakala.
Yehova wahimuruma Mwana waye, Yezu Kristu, velaboni ya vati. Yezu wahitomeyiwa va pingirizini, sabwani athu enjene oobuwela wila iyene ddabure. Mbwenye Yehova wahimperheka Yezu wila anivune. Nigamwañgana iyene, vina niganfara iyene, panakaanihu egumi ya mukalakala. Mbwenye ninela osunza venjene mwaha wa eji musogorho.
Olebeliwa 21:4-9; Joau 3:14, 15.