NIPADDUWO 50
Ayana Eeli Ooliba Murima
AIZRAELI muvolowelani mmakathamihoni, awene ankuwa wa Yehova. Yehova ohawakula awene modheela wavaha asogorheli ooliba murima wila aakamihe. Bibilia onatxemerha asogorheli aba anamathonga. Josue wali namathonga woroma, nanda anamathonga ena adhilewo mumaleli iyene aatxemerhiwa Otinieli, Eude, na Sangari. Mbwenye eeli mwa athu amukamihile Izraeli ba ayana antxemerhiwa Debora na Jaeli.
Debora namavuhula wa muyana. Yehova ononvaha iyene miselu mwaha wa musogorho, nanda iyene agamala opanga nlogo esile dhilogile Yehova. Debora vina namathonga. Iyene ongilati mutxiddo mwa nyagororo mmuruddani wa thukuwa, nanda athu anonfiyedha wila akamihiwe na makathamiho awa.
Mudhidhi obu Jabi ddi mwene wa Kana. Iyene ona magareta a koddo 900. Nikuru naye na anyakoddo tha guru vaddiddi mpaka Aizraeli enjene omageleliwa okala adhari a Jabi. Kazembe wa nikuru na anyakoddo a Mwene Jabi ontxemerhiwa Sizera.
Siku nimodha Debora ohimutxemerhiha Namathonga Baraki, nanda ohimpanga dhahi: ‘Yehova ologile dhahi: “Kaathukule alobwana 10.000 nanda odhowena o Mwangoni Tabori. Wenewale ddinela wudheelanina Sizera. Nanda ddinela wukosihani nyuwo ompemberha iyene vina nikuru naye na anyakoddo.”’
Baraki ohimpanga Debora: ‘Miyo ddinela odhowa akala weyo vina onodhowa na miyo.’ Debora ohidhowa vamodha, mbwenye iyene ohimpanga Baraki dhahi: ‘Weyo kunaavahiwe ntamaalelo na opemberhawa, sabwani Yehova onela omperheka Sizera mmadani mwa muyana.’ Nanda ji ejene epadduwile.
Baraki ohititela mutxiddo ovenya va Mwangoni Tabori wila agumane na anyakoddo a Sizera. Morurumutxa Yehova ohitota muneri, nanda anyakoddo enjiya a amwiddani ahibwina. Mbwenye Sizera ohitita va garetani yaye bathawa.
Muvireli mudhidhi muñgonovi Sizera ohidha va musasani wa Jaeli. Jaeli ohimuwobelela ovolowa, nanda ohinvaha mukaka. Mukaka obu ohimutotela thurho, nanda mohigoneela iyene ohigonavo wene kakamwe. Mumaleliye Jaeli ohithukula ntxikwa na musasa nanda bakomela vamusorho va mulobwana oddu wabure. Vasogorhova, Baraki mudheeliye, Jaeli ohimulagiha iyene Sizera bakwile! Noona weyo podi woona wila esile dhalogile Debora dhahisoriheya.
Omagomelowa Mwene Jabi ohipiwa vina, nanda Aizraeli ahikaana murenddele wili mwari mwa mudhidhi muñgonovi.
Anamathonga 2:14-22; 4:1-24; 5:1-31.