NIPADDUWO 52
Jideau Na Alobwana Aye 300
WEYO onowoona eji empadduwa apa? Aba otene anyakoddo a Izraeli. Alobwana aba aworomile anomwa. Mulobwana oddu wimelile waddamana na awene ddi Namathonga Jideau. Iyene onowañgana mukalelo ommwani manjeya.
Kañgana deretu mikalelo dhothiyana thiyana dhimmwa alobwana aba. Ena anowika kove yawa mmanjeni kakamwe. Mbwenye mmodha onoruga manjeya na mada aye, wila awodhe woona ejile empadduwa mpaddi wotene. Eji jofuneya, sabwani Yehova wahimpanga Jideau wila aasakule bahi alobwana ammwa oku bagañganela. Abale ena, Mulugu walogile wila anofanyeela orumiwa mmudhi. Ndoweni noone sabwaya.
Wili Aizraeli ali mmakathamihoni menjene. Sabwaya jawila awene kamwiweleli Yehova. Nlogo na Midia nela walamula awene nanda nela wavoreya. Noona Aizraeli ankuwa wa Yehova wila aakamihe, venevo Yehova ohiwa okuwa wawa.
Yehova ohimpanga Jideau wila athukule nikuru na anyakoddo, noona Jideau ohagumaniha vamodhavi anyakoddo 32.000. Mbwenye ohikala nikuru na anyakoddo owakwana 135.000 omusadduwela Izraeli. Nanda masiki dhaenevi Yehova ohimpanga Jideau: ‘Alobwana ana weyo ahinjiva vaddiddi.’ Yehova walogelini eji?
Sabwani Izraeli kopemberha koddoya, txino agahubuwela wila awene apemberhile woka. Txino awene agahubuwela wila kafunile nikamihedho na Yehova wila apemberhe. Noona Yehova ohimpanga Jideau: ‘Kaapange alobwana otene anova wila eyelele mmudhi.’ Jideau mukoseliye eji, 22.000 mwa anyakoddo aye ahidhowa mmudhi. Eji ehimuthiya Jideau na anyakoddo owakwana 10.000 bahi wila arabe koddo na anyakoddo abale otene 135.000.
Mbwenye kavuruwana! Yehova ohiloga dhahi: ‘Weyo ohikaanavi alobwana vaddiddi.’ Noona iyene ohimpanga Jideau wila aarume alobwana abale omwa mmwinjeni mpu nanda agamala aarume mmudhi athu otene anika kove yawa kakamwe mmanjeni wila amwe. Yehova ohiroromeliha wila: ‘Ddinela wukosiha weyo opemberha na alobwana 300 abene anañganela oku bagamwa’.
Ohifiya mudhidhi wa oraba koddoya. Jideau ohagawa alobwana aye 300 bakala makuru mararu. Iyene ohinvaha kadda mulobwana parhaza na murhinga muli sakarhi. Bili vari va mathiyu, awene otene ahigumana ozugunuwa sanjarha ya anyakoddo a amwiddani. Mumalelani, mudhidhi mmodhene, awene otene ahawoba aparhaza awa vina ahitwa mirhinga dhawa, nanda ahikuwa: ‘Supadda na Yehova vina na Jideau!’ Anyakoddo a amwiddani mururumuwelani, awene ahizuzuma vina anowova. Awene otene ahiroma othamaga, nanda Aizraeli ahipemberha koddoya.
Anamathonga makapitulu 6 mpaka 8.