Jedeau Ohapemberha Akadda Midia

Movira wa mudhidhi, akadda Izrayel attiya omulaba Yehova, baroma walaba amulugu onyengetta. Akadda Midia ahiya dhifuwo dha ana Izrayel vina addumeya mindda, ahikosa ejuwene mwa vyaka tanu na bili. Aizrayel attawela mugurugudhani dha mwango. Amuloba Yehova wi avune. N’eji Yehova omuruma mungelo wi anfanye muzombwe Jedeau. Mungeloya ologa dhahi: ‘Jedeau, Yehova ousakula wi okale namawana koddo munddimuwa.’ Jedeau onvuza: ‘Ddinawodhe dhavi omvuna Izrayel? Miyo kaddili elobwene.’

Jedeau agaziwile dhavi wila txibarene wamusakulile wali Mulugu? Iyene ottanddika ttebe ya nibila vati nanda omuloba Yehova: ‘Mangwana na membesi, omyo ogattottela vattebenivi apa bahi, mattaka akala awumene, panaziwemi wi muner’omvuna Izrayel na nlada naga ninga mulogelinyu.’ Mmangwananimwa, moya wa ttebeya wahinyetta, oku mattaka bali awumene! Masiki dhawene Jedeau omuloba Yehova wila omenbesi mwina ttebeya yume, mattaka anyette. Mpadduwelani, Jedeau paziwileye wila txibarene Yehova wahimusakula. Nona, wahatugumaniha anyakoddo aye wi awane na akadda Midia.

Yehova omwaddela Jedeau: ‘Ddinele wapemberhiha ana Izrayel. Vowila okaana anyakoddo gwé, ogapenberha munfuna mubuwelege ninga mupemberhile na guru dhenyu. Wapange otene anova wi eyelele owani-wawa.’ N’eji anyakoddo 22.000 ahiyela, bahala 10.000 bahi. Yehova omwaddela vina dhahi: ‘Anyakoddoya ahinjivavi. Kattukulele oli manje wawaddele wi otene amwe. Wasakule bahi abale anila amwaga agang’ana mpapa.’ Awodhile okosa ejuwene ali anyakoddo 300 bahi. Yehova olibela wi abene ang’onovi agahapemberha anyakoddo 135.000 a akadda Midia.

Mumattiyunimwa, Yehova omwaddela Jedeau dhahi: ‘Ovano kaabeddegele akadda Midia.’ Jedeau ohagawela anyakoddo aye parhaza na mukatte mwekiwe sakarhi yottidda. Mmaleliye ohawaddela: ‘Enona nyuwo miyo ddiraga erani nyuwo vina.’ Jedeau omoba parhaza waye, otwa mukatte, odhudha sakarhi ya motto nanda okuwa: ‘Supadda na Yehova, supadda na Jedeau!’ Anyakoddo aye 300 otene akosa yakeene. Akadda Midia attiddiwa wova, attamagela oku-n’oku. Movelo wovani aroma opana anya-anya. Venevo Yehova ohakamihedha ana Izrayel wapemberha amwiddani awa.