NIPADDUWO 58
Davidi Na Golias
AKUDDA Filistia ahidha wili oraba koddo na Izraeli. Ovanene abali araru anddimuwaya a Davidi ali mu nikuruni na anyakoddo na Sauli. Noona siku nimodha Jese ohimpanga Davidi: ‘Kathukula dhoja na mikathe wavahe abali awo. Kaziwa mukalelo olani.’
Davidi mufiyeliye va sanjarha ya nikuru na anyakoddo, iyene ohithamagela okule warabiwa koddoya wila aatamelewo abali aye. Mukudda Filistia mukango Golias ohidha wila aabedde Aizraeli. Iyene onokosa ejene omembesi oli wotene vina omathiyu mwari mwa masiku 40. Iyene ohikuwa: ‘Kamusakuleni mmodha mwa alobwana enyu wila awane na miyo. Iyene agapemberha nanda agaddipa, iyo ninela okala adhari enyu. Mbwenye miyo ddigapemberha nanda ddigampa iyene, nyuwo munela okala adhari ehu. Ddinowuvaanelani wila mmusakule muthu muthuvi wila awane na miyo.’
Davidi ohavuza anyakoddo ena: ‘Txini enavahiwe mulobwana onampe mukudda Filistia oddu nanda afurula wa Izraeli manyazo aba?’
Munyakoddo mmodha ohakula dhahi: ‘Sauli onela onvaha mulobwana oddo dhoreela dhinjidhene. Vina iyene onela onvaha mwana waye wila akale mwadhiye.’
Mbwenye Aizraeli otene anomova Golias sabwani iyene munddimuwa vaddiddi. Iyene olapile okwaranya makono 3, vina ohikaana munyakoddo mwina onimuthukulela muthitho waye.
Anyakoddo ena ahidhowa bampanga Mwene Sauli wila Davidi onfuna awane na Golias. Mbwenye Sauli ohimpanga Davidi dhahi: ‘Weyo kunwodha owana na mukudda Filistia oddu. Weyo oli muzombwe vaddiddi, nanda iyene munyakoddo egumi yaye yotene.’ Davidi ohakula dhahi: ‘Miyo ddahipa nikurukumwa vina poddogoma aathukulile mabila a babi waga. Nanda mukudda Filistia oddu onela okala ninga modha mwa dhinama esile. Yehova onela oddikamiha.’ Noona Sauli ohiloga dhahi: ‘Kadhowa, nanda Yehova akale na weyo.’
Davidi ohititela mmwinjeni nanda ohiddodda myarha mitanu dhozirhezirheya, nanda ohika mbudduni mwaye. Mumaleliye ohithukula fijiga yaye vina ohidhowa ogumana na mukango oddule. Golias mumooneliye Davidi, iyene kaawodha orumeela eji. Iyene onoona ninga ompa Davidi kunarutxe wene.
Golias ohiloga dhahi: ‘Kadhawuno, nanda miyo ddinela ovaha maningo awo balame na dhinama wila dhije.’ Mbwenye Davidi ohiloga dhahi: ‘Weyo onddidheela na supadda, na mwalago vina moba, mbwenye miyo ddinudheela na nzina na Yehova. Siku na ddabuno Yehova onela wuperheka mmadani mwaga nanda miyo ddinela wugwihedha vati.’
Venevale Davidi ohithamagela okule wali Golias. Iyene ohiburutxa mwarha mbudduni mwaye, ohika ofijigani waye, nanda ohooba mwarha obu na guru dhaye dhotene. Mwarhaya ohivava bunyaalela musorho wa Golias, nanda iyene ohimotha vati bakwa! Akudda Filistia moonelani wila mvuni wawa ohigwa, awene otene ahizugunuwa vina ahithamaga. Aizraeli ahathamagiha vina ahipemberha koddoya.
1 Samueli 17:1-54.