NIPADDUWO 57
Mulugu Ohimusakula Davidi
ONOWOONA epadduwile? Mwanamulobwana oddu ohivuna nibila nthi niñgono mwano mwa nikurukumwa. Nikurukumwana nahidha nanda banithukula nibila nthi niñgono nanda nafuna nidhowe naje nibilana. Mbwenye mwanamulobwanaya wahathamagela awene, nanda bavuna nibila nthi niñgono omulomoni wa nikurukumwa. Nanda nikurukumwana mwavenyelani, mwanamulobwanaya wahithidda nikurukumwana nanda batutuka nthi vati banikwa! Mudhidhi mwina iyene wahivuna nibila mmadani mwa poddogoma. Kayo mwanamulobwana woliba murima? Weyo onomuziwa iyeneya bani?
Oddu ddi muzombwe Davidi. Iyene onkala mu sidadi ya Belemi. Bibi waye wali Obede, mwana wa Ruti na Boaji. Weyo onowawubuwela awene? Nanda babi wa Davidi ddi Jese. Davidi onkumbuza mabila a babi waye. Davidi wabaaliwe muvireli vyaka 10 Yehova bamusakulile Sauli wila akale mwene.
Ohifiya mudhidhi ompangile Yehova Samueli: ‘Kathukula makura a va woka nanda odhowe vatakulu va Jese o Belemi. Ddihimusakula mmodha mwa ana a alobwana aye wila akale mwene.’ Samueli mumooneliye Eliabe mwana munddimuwaya wa Jese, iyene ohiloga yeka: ‘Oddu ddimusakulile Yehova txibarene.’ Mbwenye Yehova ohimpanga iyene: ‘Kuwañgane mulapelo waye vina mukoddelelo waye. Kaddimusakulile iyene wila akale mwene.’
Noona Jese ohimutxemerha mwana waye Abinadabe nanda ohimuthwanyutxa vamentoni va Samueli. Mbwenye Samueli ohiloga dhahi: ‘Nne, Yehova vina kamusakulile iyene.’ Vasogorhova, Jese ohidhana mwana waye Sama. Samueli ohiloga dhahi: ‘Nne, Yehova vina kamusakulile iyene.’ Jese ohidhana atanu na eeli mwa ana aye a alobwana vamentoni va Samueli, mbwenye Yehova kamusakulile nne mmodha mwa awene. Samueli ohivuza: ‘Analobwanaya otene ba abene?’
Jese ohiloga dhahi: ‘Ohikalawo ethogohiya. Mbwenye iyene onkumbuza mabila.’ Mudheeliwena Davidi, Samueli ohoona wila iyene mwanamulobwana wokoddela. Yehova ohiloga dhahi: ‘Ddi oddwene. Kamukuthulele makuraya.’ Nanda ji ejene ekosile Samueli. Onela ofiya mudhidhi onakale Davidi mwene wa Izraeli.
1 Samueli 17:34, 35; 16:1-13.