NIPADDUWO 56
Sauli—Mwene Woroma Wa Izraeli
KAMOONE Samueli bagakuthulela makura va musorho va mulobwana oddu. Ji ejene yalemeelilani omukosana muthu wila alagihe yawila iyene ohisakuliwa ninga mwene. Yehova ohimpanga Samueli wila akuthulele makuraya va musorho va Sauli. Aba makura a va woka oonukela.
Sauli koona ninga wofanyeela okala mwene. Iyene ohimpanga Samueli dhahi: ‘Miyo ddili wa ziza na Bejami, ziza niñgonona mu Izraeli. Nyuwo munlogela eni wila miyo ddinela okala mwene?’ Yehova ohiziveliwa Sauli sabwani iyene kafuna okala munddimuwa vina wa ethomo. Ji sabwa ya ejene emusakuleli Yehova wila akale mwene.
Mbwenye Sauli kayo muyelegi obe mulobwana muñgono. Iyene dda murala woreela, nanda iyene ddokoddela vaddiddi, mulobwana wolapa. Ovenya va dhithurini mpaka odhulu iyene ohilapa opitha muthu muthuvi mu Izraeli! Sauli vina namathamaga womaguva vaddiddi, vina mulobwana wa guru vaddiddi. Nlogo nihiziveliwa sabwa ya Yehova omusakula Sauli wila akale mwene. Awene otene ahiroma okuwa: ‘Mwene akalewo mudhidhi mwinjene!’
Amwiddani a Izraeli anolibavi. Awene anowatotelavi Aizraeli makathamiho menjene. Mohigoneela mumaleli Sauli wikiwa ninga mwene, akudda Amoni ahidha wila arabe koddo na Aizraeli. Mbwenye Sauli ohigumaniha nikuru nddimuwa na anyakoddo, nanda iyene ohapemberha akudda Amoni abale. Eji ehikosiha nlogo oziveliwa sabwa ya Sauli okala mwene.
Vyaka dhinjidhene dhihivira, Sauli ohasogorhela Aizraeli wapemberha dila dhinjidhene amwiddani awa. Sauli vina ohikaana mwana woliba murima ontxemerhiwa Jonatani. Nanda Jonatani ohimukamiha Izraeli wila apemberhe koddo dhinjidhene. Akudda Filistia balivi amwiddani owopiya a Aizraeli. Siku nimodha matxikwi na matxikwi a akudda Filistia ahidha wila arabe koddo na Aizraeli.
Samueli ohimpanga Sauli wila ajeedhe mpaka iyene odha wila akose mukutho, obe mvaho wa Yehova. Mbwenye Samueli onoyeluwa odhawa. Sauli onowova wila akudda Filistia anela oroma koddoya, noona iyene ohikosa mukuthoya mwinyene. Omagomelowa Samueli mudheeliye, iyene ohimpanga Sauli wila iyene ohivanya. Samueli ohiloga dhahi: ‘Yehova onela omusakula muthu mwina wila akale mwene wa Izraeli.’
Musogorhomwa Sauli ohivanya wili. Noona Samueli ohimpanga dhahi: ‘Jaderetu omwiwelela Yehova opitha omukosela mvaho wa nibila nikaliletxe. Sabwani weyo kumwiweleli Yehova, Yehova kanothiye okala mwene wa Izraeli.’
Iyo podi osunzamo nsunzo naderetu mwa ejene. Eji enonilagiha wila jofuneya omwiwelela Yehova dila dhotene. Vina, eji enonilagiha wila muthu waderetu, ninga mwakaleli Sauli, podi osadduwa nanda bakala wabure. Txipo iyo kaninfuna odha okala abure, ninofuna?
1 Samuwel makapitulu 9 mpaka 11; 13:5-14; 14:47-52; 15:1-35; 2 Samuwel 1:23.