NIPADDUWO 80
Nlogo Na Mulugu Nihibudduwa Mbabilonia
WADDAMELA vyaka biili dhihivira ovenya mudhidhi wathukuliwe Babilonia na akudda Medo na Persia. Nanda kañgana eji empadduwa ovanene! Indde, Aizraeli anobudduwa mBabilonia. Awene afurulei dhavi? Bani wathiyile awene odhowa?
Ddi Siru, mwene wa Persia. Wale Siru ahinathi obaaliwa, Yehova wahimuruma namavuhula waye Izaia wila alebe mwaha wa iyene: ‘Weyo onela okosa txibarene ejile enfunimi wila weyo okose. Misuwo dhinela othiyiwa dhofuguwadhene wila weyo othukule sidadiya.’ Nanda Siru ohisogorhela txibarene mwa omuthukula Babilonia. Akudda Medo na Persia avolowile mu sidadimwa na mathiyu mmisuwoni dhathiyiwe dhofuguwadhene.
Mbwenye namavuhula wa Yehova Izaia vina wahiloga wila Siru agahigwiha nlamulo wila Yeruzalemi na mparhaya omagiwe wili. Siru ohigwiha nlamulo nthi? Indde, iyene ohigwiha. Siru ohapanga Aizraeli eji: ‘Kadhowani ovanene, o Yeruzalemi nanda mmage mparha wa Yehova, Mulugu wenyu.’ Nanda ji ejene txibarene endowa Aizraeli aba okosa.
Mbwenye kayo Aizraeli otene mBabilonia awodhile okosa oleddo wowiyelela o Yeruzalemi. Obu oleddo wolapa, olapa wa othamagela makilometuru 800 nanda athu enjene ahuluvala vaddiddi obe aredda vaddiddi wila akose oleddo wolapa. Ohikala sabwa dhiina dhikooddeli athu ena odhowa. Mbwenye Siru ohapanga abale ahindowa: ‘Kavaheni parata na nddarhama vina sagwati dhiina athu abale aniyelela ommaga Yeruzalemi na mparhaya.’
Noona, sagwati dhinjidhene dhihivahiwa Aizraeli aba ali mu oleddoni wawa wa o Yeruzalemi. Vina, Siru ohavaha dhibale na kopo dhathukulile mwene Nabukoddonozori mu mparhani wa Yehova mwamutolotxeliye Yeruzalemi. Nlogona nihikaana dhilobo gwe dha wiyelana.
Muvireli othamagela myeri minai dha oleddo, Aizraeli ahifiya o Yeruzalemi mmudhidhinimwa txibarene. Esi dhili txibarene vyaka 70 ovenya mudhidhi watolotxiwe sidadiya, nanda elaboya bithiyiwa s’ohikaana athu wene. Mbwenye masiki Aizraeli ovanene veyelelani mwilaboni yawa awene anela okaana midhidhi dhorutxa, ninga munasunzelihu vasogorho.
Izaia 44:28; 45:1-4; Ezdra 1:1-11.