NIPADDUWO 81
Okuluvela Nikamihedho Na Mulugu
OTHAMAGELA athu 50.000 ahikosa oleddo wolapa ovenya mBabilonia mpaka o Yeruzalemi. Mbwenye awene mufiyelani, Yeruzalemi eji ebumwa enddimuwa bahi. Kavo onkalamo. Aizraeli aahifanyeela omaga wili dhilobo dhotene.
Modha mwa dhilobo dhooroma dhimagilani ji ebuwa. Obu mburo onfanyeelagani omperhekelavo obe omukosela Yehova mivaho dha dhinama. Myeri dhiñgonovi musogorho Aizraeli ahiroma omaga mparha. Mbwenye amwiddani ankala mu dhilabo dhaddamelile kanfuna wila Aizraeli amage mparhaya. Noona awene ahitamela watxutxa wila awene eemele. Omagomelowa, amwiddani aba ahimukosiha mwene muswa wa Persia okosa nlamulo na wimetxa mabasaya a omaga.
Vyaka dhihivira. Ovanene dhihakwana vyaka 17 ovenya mudhidhi wiyelile Aizraeli o Babilonia. Yehova oharuma anamavuhula aye Ajeu na Zakariya wila aapange athu arome omaga wili. Athu ahikuluvela nikamihedho na Mulugu, nanda ahawiwelela anamavuhulaya. Awene ahiroma omaga wili, masiki nlamulo valogani wila kanfanyeela omaga.
Noona kazembe wa mukudda Persia ontxemerhiwa Tatenai ohidha nanda ohavuza Aizraeli nrumeelelo gani nikaanilani na omaga mparha. Aizraeli ahimpanga wila awene bali mBabilonia, Mwene Siru wahapanga awene: ‘Kadhowani ovanene, o Yeruzalemi nanda mmage mparha wa Yehova, Mulugu wenyu.’
Tatenai ohirumihedha karta o Babilonia nanda ohivuza akala Siru, oddwene wamalile okwa, wahiloga txibarene ejile. Mohigoneela karta yovenyedha wa mwene muswa wa Persia ehiyela. Eji enloga wila Siru txibarene wahiloga eji. Noona mwene ohileba dhahi: ‘Kathiyeni Aizraeli amage mparha wa Mulugu wawa. Vina ddinowurumani wila mwakamihe awene.’ Othamagela vyaka nai mparhaya ohigomihiwa, nanda Aizraeli ahiziveliwa vaddiddi.
Vyaka dhiina dhinjidhene dhihivira. Ovanene dhili othamagela vyaka 48 ovenya mudhidhi ogomihiwe mparhaya. Athu mu Yeruzalemi ayelegi, nanda sidadiya vina mparha wa Mulugu kukoddelitxi. Okule o Babilonia, Muizraeli Esdra ohiziwa mwaha wa ofuneya wa okoddeliha mparha wa Mulugu. Weyo onoziwa txini enkosiye?
Esdra ohidhowa ogumana na Aritaserse, mwene wa Persia, nanda mwene oddu waderetu ohinvaha Esdra sagwati dhinjidhene wila adhowena o Yeruzalemi. Esdra ohakumbirha Aizraeli mBabilonia wila amukamihe othukula sagwati esi adhowena o Yeruzalemi. Othamagela athu 6.000 ahiloga wila anela odhowa. Awene ahikaana parata gwe na nddarhama vina dhilobo dhiina dha thima wila athukule.
Esdra onoribiwa murima, sabwani mudilamwa muhikala athu abure. Athu aba podi wawakiha parata na nddarhamaya dhawa, vina waapa awene. Noona Esdra ohagumaniha athuya vamodhavi, ninga munwodheliwe woona va nladdanihoni. Mumalelani awene ahilobela wa Yehova wila aabarele mu oleddoni wawa wolapa wa wiyelela o Yeruzalemi.
Yehova ohabarela txibarene. Nanda muvireli myeri minai dha oleddo, awene ahifiya deretu mu Yeruzalemi. Eji kinlagiha wila Yehova onowodha wabarela abale animukuluvela iyene wila aakamihe?
Ezdra makapitulu 2 mpaka 8.