Ezdra Wansunziha Nlamulo na Mulugu

Vahivira vyaka 70 a Izrayel mwiyelelani owaniwa o Jeruzalemi, oku eena akalagavi dhipaddi dhottiyana-ttiyana dha elabo y’o Pérsia. Mmodha mwa attu aba akoddile wiyela wali namakutta Ezdra, wasunziha Nlamulo na Yehova. Ezdra vewaliye wila nlogo nali o Jeruzalemi kanafwara nlamulo, wavilevela odhowa okamihedha. Mwene w’o Pérsia Artaserse omwaddela: ‘Mulugu owira muziwi, w’osunziha nlamulo naye. Kaattukule attu otene anfunewe odhowana.’ Ezdra wahatamela otene abale afuna wiyelela o Jeruzalemi. Amuloba Yehova wi abarele mu oleddonimwa, nomala avenya.

Movira wa myeri, afiya o Jeruzalemi. Anddimuwayamo ampanga Ezdra: ‘Aizrayel attiya wedda na Yehova, ahatela ayana anawebedha amilugu abure.’ Txini ekosile Ezdra? Iyene wahidhowa osogorho wa nlogo notene, okokora, olobela eraga: ‘Nabuya, oromana wale napanovi, nihuttegelani oku nyuwo munilevelelaga.’ Mmalelani attuyá atxinuwa, mbwenye kattiyile weddana dhilobo dhabure. Ezdra owasakula anamattonga na makolo wi ang’ane makani aba. Sivirile myeri miraru, otene abale ahamulaba Yehova arumiwa odhowa.

Vahivira vyaka kumi na bili. Mudhidhene obo rhinga dhetene dha Jeruzalemi dhimagiwa. Ezdra owagumaniha attu wi awengesele Nlamulo na Mulugu. Mfugulele Ezdra nivuruná, attu otene avenya. Iyene omuttittimiha Yehova, etene alivo avenyihedha mada odhulu alagihaga wakulela. Nomala Ezdra ovenya ohengesa Nlamulo, attu avuruwana. Arumela wi amwiyelele Yehova, ahunla. Siku n’owili, Ezdra ohawengesela Nlamulona wili. Asunza wila yali yaderetu oja Mattanga a Mmisasani. Momaguva-mwene aroma osasanyedha mattangayá.

Mwa malabo matanu na meli amalilani ajaga mattanga, attu ahiziveliwa mpaka omutamalela Yehova sabwa ya dhosinanga dhanani. Oromana malabo aliwo Jozuwé mpaka venevo kunakalaga mattanga ninga abuwene. Mmalele mattanga, attu agumana na Ezdra balobela dhahi: ‘Nabuya nyuwo munivuna mudharini, munijiha mwiddeddereni, vina munivaha elabo eji yokoddela. Nanda veli-veli nihuttegelani. Neravi dhawene, kamwattiya onirumela anamavuhulela enyu, mbwenye iyo kanavuruwana. Munivilelavi. Muhakwaniha yamulibelelinyu mudhari wenyu Abaramu. Ovano Nabuya ninolibela ouwiwelelani.’ Avenya aleba yalibelelani. Aleviti na anamakutta afugana nddorho yawa dhalebilanidhá.