NIPADDUWO 92
Yezu Ohavenyiha Athu Aakwile
MWANAMUYANA onimooniwe apa ona vyaka 12 dha obaaliwa. Yezu ohithiddeela nlada naye, nanda mai na babi waye eemelile waddamana na iyene. Weyo onoziwa sabwa ekalelani oosanzaya? Ndoweni niziwe.
Babi wa mwanamuyanaya ddi mulobwana wovuwa ontxemerhiwa Jairo. Siku nimodha mwana waye ohikala muredda, nanda ohiginantihiwa va gorini. Mbwenye iyeneya kakaanile embwenyimbwenyi. Iyene olothabwavi bahi. Jairo na mwadhiye anozuzuma vaddiddi, sabwani enkala ninga mwana wawa muñgono onela okwa. Iyene ddi mwana wawa mmodha bahi. Noona Jairo ohidhowa omutamela Yezu. Iyene wahiwa sabwa ya matikiniho ankosa Yezu.
Jairo munfanyeliye Yezu, vahikala muthithi munddimuwa wamurijile Yezu. Mbwenye Jairo ohivira vari va muthithiya nanda ohigwela va manyaloni a Yezu. Iyene ohiloga dhahi: ‘Mwana waga muredda vaddiddivene.’ Iyene ohimukumbirha: ‘Ddinowuthiddani myeddo mudhowe mwamukalihe deretu.’ Yezu ohiloga wila onela odhowa.
Awene bageedda, muthithiya onofinyana wila awaddamele. Morurumutxa Yezu ohiimela. Iyene ohivuza: ‘Oddiddiginyile bani?’ Yezu ohiwa guru ebudduwile mwa iyene, noona iyene ohiziwa yawila akala omuddiginyile. Kito bani? Ddi muyana wali muredda vaddiddi mwari mwa vyaka 12. Iyene wahidha baddiginya dhabalo dha Yezu nanda bavulumuwa!
Eji ehimukosiha Jairo wiwa deretu, sabwani iyene ohiwodha woona wila onvulumutxa muthu kunimurutxa Yezu. Mbwenye mumalelani ohifiya mpaganyiwi. Iyene ohimpanga Jairo dhahi: ‘Kumunyonye viina Yezu. Mwanaya wenyu ohimala okwa.’ Yezu ohiwa eji nanda ohimpanga Jairo dhahi: ‘Kukubanye, iyene onela okala deretu.’
Omagomelowa awene mufiyelani vatakulu va Jairo, athu anolila na okubanya onddimuwa vaddiddi. Mbwenye Yezu ohiloga dhahi: ‘Kamulile. Mwanaya kakwile. Iyene onogona bahi.’ Mbwenye awene ahiteya vina ahimbedda Yezu, sabwani aahiziwa wila mwanaya ohikwa.
Mumalelani Yezu ohimuthukula babi na mai wa mwanamuyanaya vamodha na arumiwi aye araru bavolowa mu kambirhinya mwaginantihiwe mwanaya. Yezu ohimuthidda nlada nanda ohiloga dhahi: ‘Kavenya!’ Nanda iyene ohisisimuwa, ninga munooneliwe apa. Vina iyene ohivenya nanda oheedda! Ji sabwa ya ejene ensanzayela vaddiddivene mai na babi waye.
Oddu kayo muthu woroma ovenyihiwe mu okwani na Yezu. Woromaya onimuloga Bibilia ddi mwana wa mulobwana wa mamukwela wakala mu sidadi ya Naimi. Musogorhomwa, Yezu vina ohinvenyiha mu okwani Lazaro, murogori wa Maria na Marta. Yezu agalamulelaga ninga mwene wa Mulugu, iyene onela wakalihawo wili athu gwe akwile. Kaninfanyeela ohagalala sabwa ya ejene?
Lukas 8:40-56; 7:11-17; Joau 11:17-44.