NIPADDUWO 94
Iyene Onowakwela Aima Añgono
KAMWAÑGANE Yezu apa bamukumbathile mwanamulobwana oddu muñgono. Weyo podi woona wila Yezu onowatanala aima añgono txibarene. Alobwana aba anañgana ba arumiwi aye. Yezu onapanga eni? Ndoweni niziwe.
Yezu na arumiwi aye alowiyela wene wuleddoni wolapela. Bali mu dila arumiwiya ahakulana mukalelani. Noona mumaleli oleddoya Yezu ohavuza dhahi: ‘Nyuwo mwakulanela mu dila sabwa yani?’ Txibarene, Yezu ohiziwa sabwa yakulanelani. Mbwenye iyene ohikosa nivuzo nthi wila oone akala arumiwi anela ompanga.
Arumiwiya kakulile, sabwani mu dila awene akulanela mwaha wa bani mwa awene oli munddimuwa vaddiddi. Arumiwi ena anfuna akale a makamaka vaddiddi opitha ena. Yezu onapange dhavi wila kayo yaderetu ofunaga okala munddimuwa vaddiddi?
Iyene ohimutxemerha mwanamulobwana muñgono, nanda ohimwimetxa vamentoni va awene otene. Mumaleliye ohapanga anamasunza aye dhahi: ‘Ddinfuna wila nyuwo muziwe txibarene wila, Mugahisadduwe bamukala ninga aima añgono, nyuwo txipo kamunavolowe mu omweneni wa Mulugu. Muthu munddimuwa vaddiddi mu omweneni ddi oddule onkala ninga mwana oddu.’ Weyo onoziwa sabwa yalogeli Yezu ejene?
Indde, aima añgono vaddiddi kanzuzumela okala anddimuwa obe okaletxa a makamaka opitha athu ena. Noona na mukalelo obu arumiwi anfanyeela osunza okala ninga aima nanda okoodda owanela okala munddimuwa obe wa makamaka.
Wahikala midhidhi dhiina vina, dhalagihile Yezu wila onowatanala vaddiddi aima añgono. Myeri dhiñgonovi musogorhomwa athu ena ahidhana aima awa wila amoone Yezu. Arumiwi ahitamela wasusihavo. Mbwenye Yezu ohapanga arumiwi aye dhahi: ‘Kathiyeni aima adhe wa miyo, nanda kamwabarele, sabwani omwene wa Mulugu bwa athu ninga awene.’ Mumaleliye Yezu ohathukula aimaya mu myononi dhaye, nanda ahareeliha. Kayo yaderetu oziwa wila Yezu onowakwela aima añgono?
Mateus 18:1-4; 19:13-15; Markos 9:33-37; 10:13-16.