NIPADDUWO 99
Mu Kambirhinya Ya Mudhulu
OVANENE obu omathiyu wa siku na Txinai, masiku meeli vasogorho. Yezu na arumiwi aye 12 ahidha mu kambirhinya eji enddimuwa ya mudhulu wila aje yoja ya Paskwa. Mulobwana oddu onimooniwe bagabudduwa ddi Yuda Iskarioti. Iyene ondowa aapange anamakutha mukalelo wa omuthidda Yezu.
Siku nimodha bahi mundduni, Yuda wahidhowa wa awene nanda baavuza dhahi: ‘Munaddivahe eni ddigawukamihani omuthidda Yezu?’ Awene ahiloga dhahi: ‘Kobiri makumi mararu dha mijila dha parata.’ Noona ovanene Yuda ondowa agumane na alobwana aba wila iyene aathukulele okule oli Yezu. Eji kayo elobo yowopiya?
Yoja ya Paskwa ehimala. Mbwenye ovanene Yezu ohiroma oja wina wa va woka. Iyene ohavaha arumiwi aye mukathe nanda ohiloga dhahi: ‘Kajani mukathe obu, sabwani obu ontapulela maningo aga abene anfuna operhekeliwa nyuwo.’ Mumaleliye ohavaha kopo ya vinyu nanda ohiloga dhahi: ‘Kamwani vinyu eji, sabwani eji entapulela nikami naga, nthene ninfuna okuthuleliwa sabwa yenyu.’ Bibilia ontxemerha eji ninga ‘Siarhi ya Nabuya,’ obe ‘Yoja ya Txiguwo ya Nabuya.’
Aizraeli annimuja Paskwa wila awubutxedhe mudhidhi ‘wavirile mungelo wa Mulugu vadhulu’ va numba dhawa mu Ejipito, mbwenye baapa ana athaji mu numba dha akudda Ejipito. Mbwenye ovanene Yezu onfuna wila anamafara aye amubuwelege iyene, vina mukalelo waperhekeliye egumi yaye. Ji sabwa ya ejene enapangeliye wila kadda yaka awene akosege mathanga aba a va woka.
Mumalelani oja Siarhi ya Nabuya, Yezu ohapanga arumiwi aye wila alibe murima vina akale a guru mu nroromeloni. Omagomelowa, awene ahimwibela Mulugu jibo nanda mumalelani ahibudduwa. Ovanene mathiyu vaddiddi, txino okwaranya vari va mathiyu. Ndoweni noone okule odhowilani.
Mateus 26:14-30; Lukas 22:1-39; Joau makapitulu 13 mpaka 17; 1 Korinto 11:20.