Egumi Mwilaboni Eswa Ya Murendele

Ogan’gana na ofwaseya dhinkoseya vanikukuni apa, oniwamo eni? Kunsilila murima wawo murendele, osanzaya na mareliho anoneya venevale? Txibarene inde. Kodi onkala oroha obe masalapitho orumela wi makalelo ninga abene labo nimodha anele akalawo vati apano?

Athu enjene mohaganyedhani anona ninga txibarene. Dhopaduwa dhinoneya ovanene mwilaboni koddo, opanga, dala, oreda, wuluvala​—wi ntagiye dhin’gonovi. Mwa dhotene, ehikalawo sabwa ya wi nikane nroromelo. Bagan’gana osogoro, Bibilia onologa “odhulu oswa na elabo eswa enjedhelihu ninga munlibelela nzu naye [na Mulugu], mwenemo munele okala oligana”.​—2 Peduru 3:13; Izaia 65:17.

‘Odhulu oku oswa’ na ‘elabo eji eswa’, ninga munlogela Bibilia, kaiye odhulu wamento obe elabo ninga munonelihu. Elabo na odhulu ninga munonelihu dhisasanyiwa na wakwanela, vina Bibilia onolagia wi dhinela okalawo na mukalakala. (Salmo 89:36, 37; 104:5) “Elabo eswa” enakale nikuru na athu oligana anakale vati apano, “odhulu oswa” onakale omwene obe nlamulelo na pama na odhulu, ninalamulele nikuru nthi na athu vati apano. Jebaribari orumela wi “elabo eswa”, obe elabo eswa yon’ganimela, enela owodhea?

Kona wi makalelo aba ankosa epadi ya efunelo yoroma ya Mulugu na mwilaboni ya vati. Iene omwika muteliwi woroma Mparaizu vati apano mu Edeni, na onvaha nlamulo notikinia na wi: “Gumanani wi mwinjivane, dhaliani elabo, y vina lamulelani.” (Wita 1:28) Inde, Mulugu wafuna wi akane ana y na osogorowa atapule Paraizu yaie wi yakwane mwilaboni motene. Masikini awene asakulilevi ohimwiwelela Mulugu, avoniaga dhaene oifwanhelela okalawo na mukalakala, efunelo yoroma ya Mulugu kisadhuwile. Enofwanyela wi yreye mwilaboni eswa!​—Izaia 55:11.

Txibarene, weyo ogalobelaga Baba-wehu, okumbiraga wi Omwene wa Mulugu odhe, weyo onkumbira wi omwene obo wa odhulu ovune obure wa vati apano y vina olamulele elabo eji eswa. (Mateus 6:9, 10) Poddi okala njedhelo na wi Mulugu onela wakula nlobelo nthile, sabwa Nzu naye n’nolibela: “Athu oligana anele okana elabo ya vati y vina anele okalamo na mukalakala.”​—Salmo 37:29.

Egumi Mwilaboni Eswa ya Mulugu

Omwene wa Mulugu onela odhana majiho ohiladaniheya vati apano, akaliaga ebaribari dhilobo dhotene dhapama dhobuwela Mulugu omaromo wi athu aye otene ajevo vati apano. Owogo vamodha na waganyedhana kunakalewo, omagomelowa athu otene vati apano anele okala amarho ebaribari, muthu na muthu mukwaie. M’Bibiliani Mulugu onolibela wi ‘onela ogomiha koddo mpaka okomoni wa elabo’. “Kanavenyiwe supadda nlogo na nlogo mukwaye y txipo kanasunze vina koddo.”​—Salmo 46:9; Izaia 2:4.

Osogorowa elabo yotene enelo okana makalelo ninga abale ononeya mujaridi. Onloga dhi Bibilia: “Ededere vamodha na murudha wouma dhinela osanzaya, vina murethe wouma onele othaba y vina onele otaburuwa ninga njano . . . . Sabwani mwidedereni munela ofumbuwa manje y vina n’guala dha manje m’muretheni mouma. Mathaka ozwa na oviha anela osaduwa akale ninga mathaka odhala mahaga, y mathaka anthona ninga mathuku a manje.”​—Izaia 35:1, 6, 7.

Onela okala dhotene dhinanikalie na oziveliwa m’paraizu vati apano. Txipo athu kanakane dala na sabwa yohikalawo oja. “Mathaka anele ovaha txibarene dhobala dhaye”, onloga dhi Bibilia. (Salmo 67:6; 72:16) Otene anele ojavo dhobala dha mabasa awa, ninga munlogela Mpadutxi wehu: “Anele otxeia miri dhinkosiwa vinyu y anele oja dhobala dhawa . . . kanatxeie nanda mwinagu wohikala mwinya baja.”​—Izaia 65:21, 22.

Mwilaboni eswa ya Mulugu, athu kanakale ofunyana vamodhavi munyumbani dha perediu obe m’misasani moifwanyela okaliwa sabwani Mulugu olibele dhai: “Anele omaga nyumba wi agonemo . . . Kanamage wi agonemo mwina.” Bibilia vina onolibela: “Kanalabele yovi.” (Izaia 65:21-23) Mwa dhaene, athu anele okana mabasa orela na ozivela m’mentoni. Egumi kinakale yolemiha.

Na mudhidhi, Omwene wa Mulugu onele odhana wili wiwanana na wandana wali mujardi mu Edeni, anenama na anenama, y anenama na athu. Bibilia onologa: “Mwinji, onela okala mudhidhene na mwana nibila, nyaruge mwinyene onela oginanti vamodha na mwana m’buzi, mwana n’gombe na podhogoma mwiti wa moiya, na mwana enama wokuma, otene vamodha; mukumbuziya wawa onakale mwana mulobwana mun’gono.”​—Izaia 11:6-9; Ozeya 2:18.

Konamo wi mwilaboni mwa paraizu maredha otene na oragala wotene wa maningo onela ovulumutxiwa! Nzu na Mulugu n’nolibela: “Kavo namakalawo m’modha onele: ‘Dhili mureda.’” (Izaia 33:24) “[Mulugu] onela okuputha m’mentoni mwawa mintori dhotene, y kunakale okwa, ne vina wunla, ne okubanya y ne obulela. Dhotene dha wale dhivira.”​—Ovuhulela 21:4.

Onafwanye na Makalelo Gani

Txibarene murima wawo vano othekenyeya na oziveliwa na sabwa dholibela esi dha Mulugu mwari mwegumi na wiwanana mwilaboni yaye eswa yoligana. Masiki athu ena one ninga oderethu wothabwetxa maruriho aba a elabo wi arumeliwe ninga a txibarene, kathabwiletxe nigobwela wi anda mwa Mpadutxi wehu wokweleya.​—Salmo 145:16; Mikeya 4:4.

Wi nidhe okalawo namukalakala M’paraizu vati apano, ahikalawo magano anfwanyela wi asorihiwe. Yezu ohilagiha na makamakana alogaga munlobeloni wa Mulugu: “Eji entapulela egumi yohimala, wi akane eziwelo yawo, Mulugu m’modha webaribari, na odhule omurumilewe, Yezu Cristo.”​—Joau 17:3.

Dhaene, akala txibarene ninofuna okala mwilaboni eswa ya Mulugu, ninofwanyela wi voroma nisunze efunelo ya Mulugu nigamala nikose. Eji ebaribari: “Elabo ejino enovira, na efunelo yaye, mazi odhule onkosa efunelo ya Mulugu onele ohala namukalakala”, wi ajevo na mudhidhi wohimala maruriho anfuna okuthuliwa na Babihu Mpadutxi wokweleya.​—1 Joau 2:17.

Ogaikale ntonyedho ninagu, men’geselo ali apa athukuliwe mbibiliani mwa Tradução do Novo Mundo das Escrituras Sagradas​—⁠Com Referências.