Epaddi 10
Elabo Eswa Yotikiniha Ethanddiwe Na Mulugu
1, 2. Txini enfuna opadduwa egavira koddo ya Armageddo ejene enfuna okuputha elabo?
EGAVIRA koddo ya Mulugu ya Armageddo, ejene enfuna okuputha elabo, txini enfuna opadduwa vasogorhova? Ninfuna nirome nsaka niswa noñganimela. Abale anfuna oviluwa va Armageddo, bamalile wooniha wila anororomeleyela olamulela wa Mulugu, anela wikiwa mwilaboni eswa. Nthi ninakale nsaka nohagalaliha vaddiddi na okalawo wa nlogo na athu, venevo vanakalegewo mareeliho ootikiniha anfuna obudduwaga wa Mulugu bagadhowa wa nlogo na athu!
2 Mutxiddo mwa musogorhelo wa Omwene wa Mulugu, anamaviluwa anela oroma wunuwiha paraizu. Guru dhawa dhinfuna dhilabihedhiwege mabasa aderetu anfuna wakaliha athu otene anakalegewo. Elabo ya vati enela oroma osadduliwa ekale murala wokoddela, wa murenddele vina wohagalaliha wa nlogo na athu.
Oderetu Onohala Vamburoni Va Obure
3. Nifuruleyo gani ninfuna okalawo mudhidhi muñgonovi Armageddo agamala ovira?
3 Dhotene esi dhinela okalihiwawo modheela otolotxiwa wa elabo ya Satana. Kunakale viina relijiau dhihili dhebaribari esene dhintota magawano, kunakale viina malamulelo a omuthu. Nne kunakale viina miselu dha othambi dha Satana wila dhaapupurutxe athu; miparha dhotene dhinsasanya esene dhinela otolowa vamodha na elabo ya Satana. Ovanene katanaalela dhahi: mburo wotene wowopiha wa elabo ya Satana bugomihiwe kakamwe! Nthi ninakale nifuruleyo nddimuwa vaddiddi!
4. Katapulela musadduwo wa osunziha onfuna okalawo.
4 Vasogorhova dhubuwelo dhotabala dha olamulela wa omuthu dhinela otxinjiwa na nsunziho ninwaraliha ninda wa Mulugu. “Miyo ddinere osunziha nlogo nawo.” (Izaiya 54:13) Na nsunziho ntho naderetu, yaka na yaka, ‘mwilaboni munela odhaala malago a Nabuya, ninga endhaala manje mbara.’ (Izaiya 11:9) Athu kanaasunze viina dhabure, mbwenye “vowi vanathongenyu elabo na athuyámo, panasunzani enafunana nyuwo” obe ‘anamakala va mathakani ambaala misapo txibarene anela osunza oligana.’ (Izaiya 26:9, NM) Dhubuwelo vina merelo anlibiha banakosiwege kadda siku.—Merelo 17:31; Filipi 4:8.
5. Txini enfuna opadduwela obure wotene vina avuti?
5 Dhaene, athu kanapiwe viina, kunakale otimbwini, ogonihiwa womageleliwa, wiya obe dhopanga dhiina. Kavo muthu onatabuwe sabwa ya merelo abure a athu ena. Gano dh’olelana 10:30 onloga dhahi: “Txipo muligani kankumuwa; muthu wovuta kangonela mwilaboni.”
Egumi Yowakwana Enela Okalihiwawo Wili
6, 7. (a) Ebaribari gani ehinrabeleya enfuna ogomihiwa olamulela wa Omwene ogalabaga? (b) Yezu olagihile dhavi ejene bali velaboni ya vati?
6 Mwilaboni eswa munela ogomihiwa vañgono vañgono dhabure dhotene dhitotiwe na osadduwa woroma. Motagiha, olamulela wa Omwene onela ogomiha oredda vina wuluvala. Nsaka na ovanene, masiki akala ohikaana muna egumi yaderetu, ebaribari ehinrabeleya jawila ogoluvala, mento awo anokaana sisinya, meno awo anomothamo, maru awo kaniwetxa, thebe yawo ya maningo enokaana makunyari, vyano dhawo dha mwari dhinonyowa mpaka omagomelowa bukwa.
7 Noona mohigoneela, dhabure esile dhinooniha goi, esilene dhibaaliwihuna na amambali ehu ooroma dhinela ovira. Onowubuwela ejile yoonihile Yezu mwaha wa egumi bali velaboni ya vati? Bibilia onloga dhahi: “Athu enjene afiyavo, adhagana aredda awa: akwethenkwe, aliba ohona, aliba ohiwa, na aredda ena enjene. Afiyana valiye; iyene oavulumutxa. Athuyá antikina vothabwa onaga wi aliba ohiloga anologa, aragali anowogowa, akwethenkwe anowedda pama, aliba ohona anowona.”—Mateu 15:30, 31.
8, 9. Katapulela osanzaya onfuna okalawo mwilaboni eswa egumi yowakwana egakalihiwawo wili.
8 Onela okala osanzaya onddimuwa vaddiddi mwilaboni eswa venevo vanfuna ogomihiwa maredda ehu otene! Goi entoteya sabwa ya egumi yowobana kinda viina onitabutxa. “Kanakalemo onaloge: ‘Miyo ddili muredda.’” “Siku-ntho mento a aliba ohona anere ofuguwa, aliba ohiwa anerege wiwa, akwethenkwe anere othamaga ninga nahe; muliba ohiloga onerokuwa n’othaba.”—Izaiya 33:24; 35:5, 6.
9 Kinakale elobo yohagalaliha vaddiddi ovenya kadda omembesi nanda buziwa wila ovanene onojavo egumi yaderetu vaddiddi? Kinakale elobo yotamaaleleya vaddiddi wa awuluvali oziwa wila ahiyihedhiwa guru dha ozombwe vina yawila anela okaana wakwana okulene wajilevo Adamu na Eva omaromo? Nroromeliho na Bibilia thi nthi: “Onokala ninga mwaliye.” (Job 33:25) Enakale elobo yoziva vaddiddi ovoka yokolo, dhipano dhinikiwa omaruni wila muthu ewe deretu, mikongozo, mipaddo dha maroda, vina mirobwe dha ovulumutxana maredda! Masipitale, adotoro, vina anamasasanya meno kanaafuneye vina.
10. Txini enfuna opadduwela okwa?
10 Athu anajegevo egumi ejo yaderetu vaddiddi kanakwe. Vina kanafanyeele okwa, sabwani nlogo na athu kaninakale vina mmadani mwa ohakwana wobaaliwana vina okwa. “Enofuneya Kristu athonge mpaka [Mulugu] vanànyigalihe amwidanaye otene. Mwiddani womariha onamutolotxiye, ddi okwa.” “Mulugu onnithambirhiha mvaho oli egumi yohimala.”—1 Korinto 15:25, 26; Roma 6:23; koona vina Izaiya 25:8.
11. Ovuhulela ongumaniha dhavi vamodhavi mareeliho a mwilaboni eswa?
11 Mogumaniha vamodhavi mareeliho anfuna obudduwa wa Mulugu oddwene ontanaala bagadhowa wa nlogo na athu Mparaizu, nivuru nomariha na Bibilia ninloga dhahi: “[Mulugu] oner’okuputha muntori bu muntori wa mmentoni mwawa. Kunakale vina okwa, kutho, obulela, segedho, vowi dhamwilaboni yawale dhivira.”—Ovuhulela 21:3, 4.
Abale Akwile Anela Wiyela
12. Yezu walagihile dhavi ewodhelo yaye yanvahile Mulugu ya ovenya mu okwani?
12 Yezu wahikosa dhilobo gwe opitha wavulumutxavi aredda vina wawogola aragali. Iyene vina wahavenyiha athu aali mmasiye. Dhaene iyene wahilagiha ewodhelo yotikiniha ya ovenyiha mu okwani ejene yanvahile Mulugu. Onowubuwela mudhidhi wadhowile Yezu vatakulu va mulobwana dhahi wakweliwe mwanaye wa muyana? Yezu wahiloga dhahi na mwana muyana oddule wakwile: “Mwana-muyana, kavenya!” Txini yapadduwilevo? “Mudhidhi wakene mwana ovenya, oroma wedda.” Moonelani ejilene athu abale aali venevale “etene ahuma milomo.” Awene kaawodhile omaalana osanzaya wawa!—Marko 5:41, 42; koona vina Luka 7:11-16; Joau 11:1-45.
13. Mukalelo gani wa athu anfuna ovenyihiwa mukwani?
13 Mwilaboni eswa, “athu apama na abure anere ovenya mukwani.” (Merelo 24:15) Nsaka ntho Yezu onela olabihedha ewodhelo envahile Mulugu wila aavenyihe athu akwile, sabwani iyene ologile wila “Miyo ddili onvenyiha mukwani, ddili egumi. Onddiroromela miyo, onokalawovi, masiki akwe.” (Joau 11:25, 26) Iyene vina wahiloga dhahi: ‘Ninofiya nsaka ninewe aliba mmasiye [mmubuweloni mwa Mulugu] nzu naye, [na Yezu] nanda bavenya mukwani.’—Joau 5:28, 29.
14. Sabwa yawila okwa kunakalewo viina, dhilobo gani dhinfuna ogomihiwa?
14 Onddimuwa onakale ohagalala wa elabo yotene ya vati venevo vanfuna gatha na gatha dha athu aakwile okalawo wili, wila agumane na amudhi awa! Kunakale viina miselu dha olaleyiwa amarafula, esene dhinakubanyihege athu abale amalile oviluwa. Mbwenye, onfuna opadduwege yothiyana na ejene: olaleyiwa wa athu aswa avenyihiwe mu okwani wila amudhi awa athabege. Noona, kunakale viina mithupo dha weyiwa athu, gonoddo dhoddumeyiwavo athu akwile, numba munddumeyiwa athu akwile, obe masiye!
Elabo Ya Murenddele Watxibarene
15. Nivuhulo na Mikeya ninfuna wooneya dhavi na mukalelo watxibarene kakamwe?
15 Onela okalawo murenddele watxibarene mmikaleloni dhotene dha egumi. Koddo, anamatota koddo, vina osasanyiwa futhi onakale dhilobo dha wale. Sabwa yani? Sabwani dhimanya dha ogawana wa dhilabo, wa maziza vina malogo onela ogoma. Venevo, na mukalelo watxibarene kakamwe, “kunakale nlogo ninarabe koddo na malogo mena; mmuthethenimwá kamunasunziwe vina mabasa a koddo.”—Mikeya 4:3.
16. Mulugu onfuna okosa eni wila koddo dhihirabiwe viina?
16 Eji enkala ninga elobo yowumiha milomo nigañgana okalawo wa athu, okwene onkaletxawo koddo. Mbwenye esene dhimpadduweletxa sabwa ya nlogo na athu okala mutxiddo mwa olamulela wa omuthu vina wa odomonyo. Mwilaboni eswa, mutxiddo mwa olamulela wa Omwene, enfuna opadduwamo ji eji: “Dhaunoni, mone dhirile Nabuya . . . Iyene onogomiha koddo: mwilaboni mwetemwene, onowunda ura, okothokola myalago, oddumeya vibarelodhá.”—Masalmo 46:8, 9.
17, 18. Mwilaboni eswa, wandana gani onfuna okalawo vari va athu na dhinama?
17 Athu na dhinama anela okalaga vamodhavi na murenddele, ninga mwakalelani mu Edeni. (Wita 1:28; 2:19) Mulugu onloga dhahi: “Nsaka nene-ntho ddinere ologa na vinama dholudha, na balame dhodhulu, na vinama dhonyongotowa, . . . wi nlogo naga nijevo osanzaya.”—Ozeya 2:20.
18 Murenddele obu onfuna wunuwe mpaka vavi? “Mwinji onere okalaga vamodha na mwana-nibila; nyarugwe onere ogonaga na mbuzi; mwana-n’gombe na poddogoma anere osapaga vamodha; mima ddinakumbuzege.” Dhinama kadhinda viina watxutxa athu obe otxutxana mukalelani. Masiki “poddogoma na ngombe anajege mani vamodha”!—Izaiya 11:6-9; 65:25.
Elabo Ya Vati Enela Osadduliwa Ekale Paraizu
19. Elabo ya vati enfuna esadduliwe bikala eni?
19 Elabo yotene ya vati enela osadduliwa bikala murala wa paraizu wila nlogo na athu nikalegevo. Ji sabwa ya ejene Yezu yamuroromelihedhiye mulobwana oddule wamuroromeli wila: ‘Onela okala na miyo Mparaizu.’ Bibilia onloga dhahi: “Eddeddere vamodha na murudda wouma dhinela osanzaya, vina murethe wowuma onele othaba vina onele otaburuwa ninga njano. . . . Sabwani mwiddeddereni munela ofumbuwa manje vina ngwarha dha manje mmuretheni mowuma.”—Luka 23:43; Izaiya 35:1, 6.
20. Dala enakooddele eni wawooniha viina athu goi?
20 Mutxiddo mwa Omwene wa Mulugu, athu matxikwi na matxikwi kanatabuwe viina na dala. “Mminddani munere odhala tirigu, thukuwa dhinere okuneleya na milima.” “Miri dha muddebe dhinerege obala misapo dhawa, mindda dhinerege wandela milima. Awene anere okala mwilaboni mwawa ofwaseyene.”—Masalmo 72:16; Ezekiyel 34:27.
21. Txini enfuna opadduwela otuwa vogona, mirudda dha ayelegi, vina mirudda dhabure dhowaddamela?
21 Kunakale viina oyelega, athu ahina vogona, mirudda dha ayelegi, obe mirudda dhowaddamela dhodhaala opanga. “Athu a nlogo naga anere omaga numba dhawa, akalegemo; anere otxeya mvidera dhawa, ajege anya. Kanamagelege numba athu ena; kanatxeyege wi enagu ajege.” “Dhawene muthu ddi muthu oner’okala wofwasa, mutxiddo mwa miri dhaye dhamilima, ahimovaga muthu-wene.”—Izaiya 65:21, 22; Mikeya 4:4.
22. Bibilia ontapulela dhavi mareeliho a olamulela wa Mulugu?
22 Mparaizu athu anela oreelihiwa na dhilobo esi dhotene vamodha na dhiina. Masalmo 145:16 onloga dhahi: “Nyuwo [Mulugu] munotapula nlada nenyu, munowavaha aliwo dhetene dhinunlelani.” Ji sabwa ya ejene enlogela nivuhulo na Bibilia dhahi: “Akurumuwi aner’okala anya a elabo, aner’ojavo murenddele munddimuwa. . . . Athu apama aner’okala anya a elabo, akalegemo masiku etene.”—Masalmo 37:11, 29.
Dha Wale Dhinogomihiwa
23. Omwene wa Mulugu onfuna ogomiha dhavi goi dhotene esile dhinihuna?
23 Olamulela wa Omwene wa Mulugu onela ogomiha dhabure dhotene dhikoseliwe nlogo na athu mwari mwa vyaka dhivirile matxikwi matanu na nimodha. Othaba wa nsaka ntho onela opitha goi goivi ejuwene yakaanilege athu. Egumi kinazuzumihiwege na wubuwela goi dha wale. Dhubuwelo na mabasa anlibiha banakosiwege masiku otene na athu abuwene anfuna odduwala vañgono vañgono wubuwelaga goi.
24, 25. (a) Izaiya othagile ologa eni ejene enfuna opadduwa? (b) Ninfanyeelela eni okaana ebaribari yawila kaninobuwelege goi ya wale?
24 Mulugu oddwene ontanaala onloga dhahi: “Miyo ddinopaddutxa erimu [nlamulelo niswa nthene ninfuna olamulela nlogo na athu], elabo eswa [nlogo na athu noligana]; dhawale kadhinobuweliwe vina, dhivirile dhinodduwaliwa mudduwalelo. Thambazaní, thabelaní dhilobo dhinfuna miyo opaddutxa.” “Ovano elabo yotene efwasa, enojavo murenddele, enowiba n’othaba.”—Izaiya 14:7; 65:17, 18.
25 Noona, modheela Omwene waye, Mulugu onela osaddula kakamwe ntowa nthene ningoneelaga mudhidhi mwinjene. Na mukalakala iyene onela olagiha ntanaalo naye nddimuwa ninnikaaneliye modheela orubwiha mareeliho abene ampitha ogomiha wiwa opa wanihuna nsaka na mundduni. Masoso aakaanilihu wale anela orimeela vañgono vañgono mmusorhoni mwehu, vasogorhova banidduwala kakamwe.
26. Mulugu onfunela eni oniliva sabwa ya goi goivi etabuwilihuna nsaka na mundduni?
26 Bu mukalelo obu onfuna Mulugu oniliva sabwa ya goi ejene txino etabuwilihuna mwilaboni mpuno. Iyene onoziwa wila ona muladduya wa iyo obaaliwa ohakwanene kayo iyo, sabwani iyo nibaaliwena ohakwana wa ababi ehu ooroma. Kayo iyo ona muladduya wa obaaliwa mwilaboni ejino ya Satana, sabwani Adamu na Eva komuroromela Mulugu, iyo nigahibaaliwa mparaizu. Noona, na nthebwa nddimuwa, Mulugu kanakalele olivavi dhabure dhikoseliwihu wale.
27. Mavuhulo gani anfuna osoriheya mwilaboni eswa?
27 Mwilaboni eswa, nlogo na athu ninela okaana murenddele othagiwe ologiwa va Roma 8:21, 22: “Dhopaddutxiwa dhinojyedha ovuniwa mmadani modhari ontolotxa, dhidhé ojavo ofuru, nthithimiho ninakele ana Mulugu. Pu mwenemo: iyo niziwa wi ofiyedha ddabuno dhopaddutxiwa dhotene dhinobulelavi n’ekalelo enbulela muyana, oli omanini.” Vasogorhova athu anela woona osoriheya wowakwanela wa nlobelo ninloga: “Omwene wenyu odhele iyo, ofuna wenyu okosiwege vati apano ninga odhulu.” (Mateu 6:10) Makalelo ootikiniha a Paraizu ya velaboni wa vati anela wooniha ejile eli dhilobo dha odhulu.
[Mafoto vanikukuni 23]
Mwilaboni eswa, awuluvali anela okaana wili guru ya ozombwe
[Foto vanikukuni 24]
Mwilaboni eswa maredda otene vina dhoragala dhinela ogomihiwa
[Foto vanikukuni 25]
Mwilaboni eswa, abale akwile anela ovenyihedhiwa okalawo
[Foto vanikukuni 26]
‘Kanaasunze viina koddo’
[Mafoto vanikukuni 27]
Mparaizu athu na dhinama anakalege mmurenddeleni kakamwe
[Foto vanikukuni 27]
‘Mulugu onela otapula nlada naye baavaha aliwo dhetene dhinunlelani’
[Foto vanikukuni 28]
Omwene wa Mulugu onela okosa dhilobo opitha okalela ogomihavi goi ejene etabuwilihuna