Muya Kayo Athu Aakalilewo Velaboni Ya Vati Nanda Bakwa

Muya dhihikalawo txibarene! Wumburoni wohooneya wa muya, ohikala muya dhaderetu vina dhabure. Aba athu aakalilewo wale velaboni ya vati nanda bakwa?

Nne, aba kayo. Muthu agakwa, iyene kanvirela mwilaboni ya muya, ninga munubuwela athu enjene. Iyo niziwile dhavi ejene? Sabwani Bibilia onloga dhaene. Bibilia thi nivuru na ebaribari nthene nidheeli wa Mulugu mmodha wa ebaribari, ona nzina na Yehova. Yehova oddwene wathanddile athu; iyene ddinziwa deretu txini enapadduwela awene agakwa.—Salmo 83:18; 2 Timoteo 3:16.

Bibilia onloga wila Mulugu wahimuba Adamu, mulobwana woroma, “na mbwebwe wa mathaka.” (Wita 2:7) Mulugu wahimwika mParaizu, mundda wa Edeni. Adamu kowiwelela nlamulo na Yehova, iyene kagakwile; iyene agahikalawovi velaboni ya vati mpaka ovanene. Mbwenye Adamu mulupeliye nlamulo na Mulugu na pudha, Mulugu wahimpanga iyene dhahi: “Weyo [onela] wiyelela o mathakani, sabwani wenewo kuthukuliwe weyo. Sabwani weyo oli mbwebwe nanda o mbwebweni onela wiyelelawo.”—Wita 3:19.

Eji entapulela eni? Kapima eji, Adamu wali wuvi Yehova ahinathi omuthandda na mbwebwe? Iyene kaali wego. Iyene kaali odhulu ninga muya ohinathi obaaliwa. Iyene kaaliwo. Noona Yehova mwalogeliye wila Adamu ‘agahiyelela o mathakani,’ iyene waddana yawila Adamu agahikwa. Iyene kaalupeli wumburoni onkala muya. Va makwelo, Adamu wahiyelela wili ohikaana egumi, okoodda okalawo kakamwe. Okwa ku ohikalawo wa egumi.

Kito athu ena abale akwile? Awene vina kawo? Bibilia onowakula dhahi:

• “Otene [athu na dhinamadha] andowa mburo mmodha. Otene adheeli o mbwebweni, nanda otene aniyelela o mbwebweni.”—Eklesiaste 3:20.

• “Abale akwile . . . kanziwa wene elobo.”—Eklesiaste 9:5.

• “Okwela wawa vina niwogo nawa, vina aje yawa ehigoma.”—Eklesiaste 9:6.

• “Kuli mabasa nne kunlaganeliwa elobo nne eziwelo nne zelu o Seol [masiye], mburo obuwene ondowa weyo.”—Eklesiaste 9:10.

• “[Muthu] onowiyelela o mathakani waye; siku nene ntho dhubuwelo dhaye dhinogoma.”—Salmo 146:4.

Weyo onoona ninga orumeela malebo aba onorutxa? Akala onoona dhaene, kobuwela eji: Mmiralani dhinjidhene, mulobwana onothambirha kobiri wila asapele ntakulu naye. Mulobwanaya agakwa, dila dhinjidhene muralaya onotabuwa. Dila dhiina mwadhiyeya vamodha na anaya kankaana kobiri yowakwana ya ogulana yoja. Txino anela opujiwa na amwiddani a mulobwana oddule. Ovanene kavivuze: ‘Akala mulobwana oddule okwile oli mwilaboni ya muya, onkooddela eni osapelagavi murala waye? Iyene onkooddela eni ovuneela murala waye mwa avuti?’ Sabwani malebo anloga ebaribari. Yawila mulobwana oddule kawo, kanwodha okosa elobo.—Salmo 115:17.

Eji entapulela yawila abale akwile kanadhe viina okalawo wili? Nne, kintapulela ejene. Nigamala ninela ologa mwaha wa ovenya mu okwani. Mbwenye eji entapulela yawila athu akwile kanziwa elobo ejuwene enkosa weyo. Awene kanwodha wuwoona, wuwiwa, obe ologa na weyo. Weyo kunfanyeela wawova awene. Awene kanwodha wukamiha, vina kanwodha wuputhula.—Eklesiaste 9:4; Izaia 26:14.