Epaddi 6
Mulugu Othiyeli Eni Goi Okalagawovi
1, 2. Amambali ehu ooroma anongile dhavi maromo aderetu avahile Mulugu?
YAVIRIGANILEVOYA jivi? Txini yapadduwile ejene enongile maromo aderetu vaddiddi abene aavahile Mulugu amambali ehu ooroma Mparaizu wa Edeni? Othiya okalagawo murenddele vamodha na wiwanana wa Paraizu, onkaleletxawo eni obure na goi mwari mwa vyaka matxikwi na matxikwi?
2 Sabwaya ja Adamu na Eva olabihedha na mukalelo wabure ofuru wawa wa osakula. Awene aahithiya ononelamo yawila kathanddeliwe weeddeleya deretu s’ohimugayela Mulugu vamodha na malamulo aye. Awene aahigana okoodda omugayela Mulugu, obuwelaga wila okosa dhaene ogahogola dhigumi dhawa. Dhaene awene aahilupa maddile a ofuru wa osakula abene alamulile Mulugu.—Wita kapitulu 3.
Mwaha Wa Olamulela Onddimuwa Wa Elabo Yotene
3-5. Mulugu wakooddele eni watolotxa Adamu na Eva nanda bawita wili athu ena eeli?
3 Ki Mulugu wakooddeleni watolotxa Adamu na Eva nanda bawita wili athu ena eeli? Sabwa ya olamulela waye onddimuwa wa elabo yotene, kuloga dhahi, ofanyeela waye wa mukalakala wa olamulela, wahivaaneliwa.
4 Nivuzona nali nthi: Bani onfanyeela olamulela, nanda olamulela okalile kwa ani? Okala waye wa guru dhotene vina Mpaddutxi wa dhothanddiwa dhotene ononvaha Mulugu ofanyeela olamulela dhothanddiwadha. Vowila iyene ddwa zelu dhotene, olamulela waye kwaderetu vamentoni va dhothanddiwa dhaye dhotene. Mbwenye olamulela wa Mulugu wahivaaneliwa. Ki vina yothanddiwa yaye—muthu yahikaana yovirigana? Vasogorhova ninela osekeserha mukalelo oyilemo mwaha wa ororomeleya wa muthu.
5 Sabwa ya muthu okoodda omugayelaga Mulugu, nivuzo niina nahitatamuliwa: Athu agaheeddeleya deretu kohilamuleliwaga na Mulugu? Txibarene mpaddutxi wahiziwa yowakulaya, mbwenye mukalelo waderetu wa athu ozinddiyela wali wa wavaha kakamwe ofuru wafunani. Awene ahisakula dila eji ya ofuru wawa wa osakula, noona Mulugu wathiya.
6, 7. Mulugu wathiyedheleni athu ofuru kakamwe wogoneela?
6 Modheela wathiyedha athu mudhidhi wowakwana olabihedha na ofuru kakamwe, Mulugu agahigomiha kakamwe magudulano awila peno athu aneeddeleya deretu agalamuleliwaga na Mulugu obe agavilamulelaga woka. Nanda mudhidhiya ogathiyedhiwani wanfanyeela ogoneela mofanyeela wila wathiye athu ofiyedha obule ogatxemerhilani okala mutompi wa odhowa vasogorho wa politika, makumpaniya, siensia vina sipitale.
7 Noona, Mulugu ohavaha athu mudhidhi wowakwana mpaka ovanene wila alagihe mohaganyedha akala olamulela wa muthu s’ohimugayela Mulugu ogaheeddeleya deretu. Dhaene muthu onosakulaga okala wa sisi obe okala mutabala, okwela obe widda, oligana obe ohiligana. Mbwenye iyene vina onogumanaga na dhodhavo dha osakula waye: oderetu na murenddele obe obure na goi.
Osadduwa Wa Dhothanddiwa Dha Omuyani
8, 9. (a) Osadduwa oromile dhavi wumburoni wa omuyani? (b) Adamu na Eva balivi, bani ena aapupurutxile Satana?
8 Ohikala elobo yina enfanyeela opepesiwa. Kayo ababivi ehu ooroma aasadduweli olamulela wa Mulugu. Ki ena aaliwo mudhidhene obule bani? Dhothanddiwa dha omuyani. Mulugu ahinathi wathandda athu, iyene wahithandda egumi ya thima, muthengo munddimuwa vaddiddi wa anju, wila akalege wumburoni wa odhulu. Awene vina athanddiwena ofuru wa osakula vina na efunelo ya wiwelela olamulela wa Mulugu.—Job 38:7; Masalmo 104:4; Ovuhulela 5:11.
9 Bibilia onlagiha wila osadduwa oromile wumburoni wa omuyani. Yothanddiwa dhahi ya omuyani yafuna ofuru kakamwe. Vina iyene wafuna wila athu amwebedhege. (Mateu 4:8, 9) Muya obu osadduwile bu obwene wapakelitxi Adamu na Eva osadduwa, bagaloga wila Mulugu wela wawimana elobo yaderetu. (Wita 3:1-5) Dhaene iyene ontxemerhiwa Ddiabo (Namazivalela) vina Satana (Mwiddani). Musogorhomwa, iyene wahinyengetha dhothanddiwa dhiina dha omuyani osadduwa. Awene ahiziweya ninga adomonyo.—Olibiha 32:17; Ovuhulela 12:9; 16:14.
10. Osadduwa wa athu vamodha na dhothanddiwa dha omuyani ototile eni?
10 Sabwa ya athu omusadduwela Mulugu, aahivithiya opakeliwa na Satana vamodha na adomonyo aye. Ji sabwa ya ejene enlogela Bibilia wi Satana ddi “mulugu wa vatapano,” oddwene “onakoddiha [athu] wona warya wa Muthaka.” Vina, nzu na Mulugu ninloga wila, ‘elabo yotene eli mmadani mwa satana.’ Mwinyene Yezu wamuloga Satana okala “mweneyá” wa elabo ejino.—2 Korinto 4:4; 1 Joau 5:19; Joau 12:31.
Mwaha Mili
11. Satana onvaaneli Mulugu na mwaha gani mwina?
11 Satana wahitatamula mwaha mwina obwene wamukosela mapoka Mulugu. Mwa txibarene, iyene wammageedhile Mulugu wila wahiviriganiha mukalelo Wathanddileye athu vina yawila kawo nne ngafuna mmodha agafunile okosa elobo yaderetu agadideliwa. Txibarene, iyene walogile wila mutxiddo mwa wehiwa awene agahifiyedha omuruwana Mulugu. (Job 2:1-5) Na ejene Satana wahitotela waganyedha ororomeleya wa dhothanddiwa dha omuthu.
12-14. Mudhidhi ogalagihile dhavi ebaribariya mwa mwaha mili esene dhatatamulile Satana?
12 Vina, Mulugu ohithiya mudhidhi wofanyeela wila dhothanddiwa dhotene dha zelu dhoone mukalelo ogasasanyedhiwe mwaha obu vina mwaha wa olamulela onddimuwa wa Mulugu. (Kaladdaniha na Obudduwa 9:16.) Yowireya ya musogorho ya nipadduwo na athu egahilagiha ebaribari ya mwaha esi mili.
13 Vadhulu va dhotene, mudhidhi ogalagihile eni mwaha wa olamulela onddimuwa, ofanyeela wa Mulugu olamulela? Athu agahiwodha ovilamulela deretu woka s’ohilamuleliwaga na Mulugu? Nlamulelo nlamulelovi na athu nohikala na Mulugu nigahikosiha elabo ya vati okala yosanzaya yohikaana koddo, opanga vina ohiligana? Ogahikala nlamulelo nigaagomihile oyelega nanda banadheelana athu otene oreela? Ogahikala nlamulelo nigaagomihile maredda, wuluvala na okwa? Nlamulelo na Mulugu nisasanyeliwe okosa dhotene esi.—Wita 1:26-31.
14 Mowiwanana na mwaha wanawili, txini egalagihile mudhidhi mowiwanana na ofanyeela wa yothanddiwa ya omuthu? Wali ovirigana Mulugu wathandda athu na mukalelo wakosileye? Mwa athu aba vagahikala ngafuna mmodha agakosile elobo yaderetu mutxiddo mwa wehiwa? Muthu ddi muthu agahilagiha yawi anofuna olamulela wa Mulugu akooddaga nlamulelo na athu?
[Foto vanikukuni 13]
Mulugu ohathiyedha athu mudhidhi wila afiye va mutompini wa odhowa vasogorho wawa
[Yorumeeliwa va Linyani 13]
Shuttle: Based on NASA photo