Epaddi 7
Txini Epadduwile Sabwa Ya Osadduwa?
1-3. Mudhidhi olagihile dhavi wila Yehova ddonyaala?
MOWIWANANA na mwaha wa ofanyeela wa Mulugu olamulela, txini empadduwaga mwari mwa vyaka esi mazana menjene a olamulela wa athu s’ohimugayela Mulugu? Ngani athu anolagihaga okala alamuleli aderetu ompitha Mulugu? Nigañgananiha dhowireya dha otabala wa muthu na muthu mukwaye, ninowoona txibarene wila nne.
2 Amambali ehu ooroma mwakooddelani olamulela wa Mulugu, nadhilevo nali ntowa. Awene ahivitotela goi vamodha na murala wotene wa athu obaalilani. Nanda awene kana muthu oddwene agampwathelihani muladdu, mbwenye muladduya wali wawa. Nzu na Mulugu ninloga dhahi: “Nyuwo mumuthegela, kamunfwanyela okala anaye; muli ana a mudila.”—Olibiha 32:5.
3 Mapadduwo ahimulagiha Adamu na Eva onyaala wa nlago na Mulugu nawila awene kobudduwa mmasasanyedhoni a Mulugu, agahinyowa nanda omagomelowa bakwa. (Wita 2:17; 3:19) Awene ahinyanyala olamulela wa Mulugu, nanda na mudhidhi ahinyowa nanda bakwa wene.
4. Iyo notene nimbaaleliwa eni oohakwanene, ninkaaneletxa eni maredda vina ninkwela eni?
4 Yapadduweli ana awa otene munddunimwa yali ninga munlogela Roma 5:12 “Ovanya wa muthu mmodha bahi [Adamu, musorho wa nlogo na athu] ovolotxa othega mwilaboni; othegawá ototelamo okwa. Ddabuno okwa onomuthidda muthu-muthu.” Noona amambali ehu ooroma mwavanyelani musogorhelo wa Mulugu, aahikala athegi. Mowiwanana na malamulo oobaaliwana, ohakwana bahi kugavahilani anawa otene. Ji sabwa ya ejene iyo notene nibaaliwana ohakwana, nigakaanetxa maredda vina nigakwa.
5, 6. Mapadduwo anlagiha eni mwaha wa guru dha muthu wila adhena murenddele vamodha na oreela watxibarene?
5 Dhihivira vyaka mazana menjene. Mamwene ahifiya nanda bavira. Mukalelo wotene wa malamulelo onotagihiwaga. Na dhaenevi, wili wili, dhilobo dhowopiha dhinopadduwela murala wa nlogo na athu. Muvireli vyaka matxikwi matanu na nimodha, muthu muthuvi agahubuwela wila athu anfanyeela odhowa vasogorho mpaka wimetxa murenddele velaboni yotene ya vati, eninfanyeela muthu, vina oreela nanda yawila mpaka ovanene athu anfanyeela olemelela mikalelo dhaderetu dha oderetu, thagaraga, vina wiwanana.
6 Mbwenye, ebaribariya kili dhaene. Kuli mukalelo wa nlamulelo na muthu nthene nobuweliwe navahile athu otene murenddele vina oreela. Mu vyaka zana dha 20 woka, nihoona opiwa wa athu matxikwi menjene va Holocausto vina opiwa wa athu okwaranya miliau 100 mu koddoni. Mu nsaka nehu muthengo wohengeseya wa athu ahisoosiwa, ahipiwa vina ahifugeliwa sabwa ya wuma okothi vina sabwa ya ovapana wa politika.
Esile Dhimpadduwa Ovanene
7. Mikalelo dha murala wa athu ovanene dhili dhavi?
7 Mowenjedhedha, kobuwela mukalelo wotene wa murala wa athu ovanene. Opanga na otimbwini ohakwaneliwa. Ohikala mulili wa oja mirobwe dhinviriganiha ogogo. Ohikala ezini ya maredda anraviwa mu ogonihanani. Eredda yowopiha ya SIDA enowafanya athu matxikwi na matxikwi. Kadda yaka athu matxikwi makumi na makumi anokwa na dala obe na maredda, oku athu añgonovi bahi bareelile. Athu anotakaliha vina anothapatha elabo ya vati. Mpaddi wotene, egumi vamodha na thima dha mweeddelo wa murala dhihinongeya. Txibarene, ovanene egumi enlagiha olamulela wabure wa ‘mulugu wa elabo eji’ Satana. Elabo ejino eliye nabuya kina okwela, ja otabala vina jovirigana kakamwe.—2 Korinto 4:4.
8. Ninkooddela eni otxemerha dhowira dha nlogo na athu okala odhowa vasogorho watxibarene?
8 Mulugu ohathiyedha athu mudhidhi wowakwana wila afiye va mutompini wa odhowa wawa vasogorho mpaddi wa siensia vina oreela. Ngani oku wahikalaga odhowa vasogorho webaribari vansadduliwa ura na nyambusa badhitxinjiwa na futhi dha makina, tanki, balau dhimponya bomba vina na bomba dha motho? Wahikalaga odhowa vasogorho vanwodha athu okosa oleddo odhulu, oku ahiwodhaga okala vamodhavi mmurenddeleni velaboni ya vati? Wahikalaga odhowa vasogorho vanova athu weedda mmarampani na mathiyu obe na mutana mmimburoni dhiina?
Ejile Elagihile Mudhidhi
9, 10. (a) Ovira wa mudhidhi wa vyaka mazana menjene olagihile eni txibarene? (b) Mulugu okooddeli eni wawaka athu ofuru wa osakula?
9 Dhotagiha dha vyaka mazana menjene dhilagihile wila athu kanwodha osogorhela tharho dhawa na weeddeleya deretu s’ohigayela olamulela wa Mulugu. Kinwodheya ninga muhinwodhelani okalawo s’ohija, omwa vina ovuma. Enowooneya wila: Nithanddeliwe ogayela mweeddihedho wa Muthanddi wehu ninga muthanddeliwehu ogayela dhoja, manje vina muya onvumiwa.
10 Sabwa ya othiya obure, Mulugu ohilagiha kakamwe dhodhavo dhoweeddiha thagaraga dha olabihedha mwabure ofuru wa osakula. Nanda ofuru wa osakula, obu mvaho woñganimela, othiya wawaka, Mulugu ohathiya athu woona ejile entapulela olabihedhawa mwabure. Nzu na Mulugu ninloga ebaribari nigalogaga wila: Muthu “kanwodha opima yeka tharho dhaye.” Vina nzu na Mulugu ninloga ebaribari nigalogaga dhahi: “Ddifwanya wi athu ena ali anya, ena anotabuwa n’opujiwa.”—Jeremiya 10:23; Kohelét 8:9.
11. Ohikala olamulela olamulelavi wa athu wagomihilege goi?
11 Sabwa ya Mulugu othiya olamulela wa athu mwari mwa vyaka matxikwi matanu na nimodha txibarene enlagiha wila muthu kanwodha ogomiha goi. Kuli mudhidhi wagomihilegiye goi. Motagiha, mmasikuni a Mwene Salomau wa Izrayel, na zelu yaye yotene, oreela vamodha na guru, kawodhile wogola dhilobo dha weeddiha thagaraga dha olamulela wa athu. (Kohelét 4:1-3) Na mukalelo wakakene, mmasikuni ehu asogorheli a elabo, masiki na odhowa vasogorho wopitha, kanwodha ogomiha goi. Nanda yothabwaya, mapadduwo alagihile wila athu ahingayela olamulela wa Mulugu ahenjedha goi othiya ovugula.
Mulugu Onowoona Oddayi
12-14. Dhopuramo gani dha oddayi dhidhilevo sabwa ya Mulugu othiya goi okalagawovi?
12 Mulugu othiya goi ononitotelaga opa. Mbwenye iyene onowoona oddayi, aziwaga dhodhavo dhaderetu esene dhinfuna okalawo omagomelowa. Dhothanddiwa dhinela opuramo moonelo wa Mulugu, othiya mwari mwa vyaka dhiñgonovi, mbwenye vyaka matxikwi na matxikwi, indde, na mukalakala.
13 Musogorho mpo mugakala mukalelo onimukosiha muthu olabihedha mwabure ofuru wa osakula wila atote waganyedha mukalelo onkosa Mulugu dhilobo, kinafuneye onvaha mudhidhi wila atamele olagiha moonelo waye. Wathiya anamasadduwa mwari mwa vyaka matxikwi na matxikwi, Mulugu ohimala wimetxa yotagiha ya nlamulo ejene enathiddihedhiwe mabasa na mukalakala mudhidhi mudhidhivi mpaddi wotene.
14 Sabwa ya Yehova othiya obure vamodha na goi mudhidhi obuno, enowooniha yawila kuli elobo elobovi ejene ehiniwanana na iyene eneeddeleye deretu. Mohaganyedha enela olagihiwa yawila kuli marhe a muthu ahinimugayela Mulugu obe dhothanddiwa dha omuyani esene dhinadhena dhopuramo dhogoneela. Dhaene, txibarene Mulugu onela omutataka momaguva namasadduwa namasadduwavi. Onela ‘watolotxa avuti etene.’—Masalmo 145:20; Roma 3:4.
[Foto vanikukuni 15]
Mumaleli amambali ehu ooroma osakula okoodda omugayela Mulugu, omagomelowa ahuluvala nanda bakwa
[Mafoto vanikukuni 16]
Olamulela wa muthu s’ohimugayela Mulugu ohilagiha okala wa ntowa
[Yorumeeliwa va Linyani]
U.S. Coast Guard photo